Fylgdu þessum ráðum ef þú vilt auka hjá þér fitubrennnslu!

Stórar æfingar eru frábær leið til að auka fitubrennslu!

Fitubrennslubransinn er risastór á heimsvísu og veltir milljörðum. Það eru alltaf að koma fram einhverjar skyndilausnir og fáránlegar aðferðir til þess að brenna fitu. Fólk gleypir við því eins og hverju öðru og stendur alltaf í stað eða nær aldrei þeim árangri sem vörurnar lofa á stuttum tíma.

Að brenna fitu er ekkert rosalega flókið ferli og jú margir eru mismóttækilegir og það getur verið kúnst að finna hvað hentar hverjum og einum. Þetta er þolinmæðisvinna og á ekki að gerast á nokkrum dögum eða viku. Ég vona allavega að þeir sem vilja létta sig, vilji gera það til frambúðar.

En hér eru nokkur atriði sem gott er að hafa í huga ef markmiðið er að skafa af sér smjörið.

• Undiráætlaðu hitaeiningarnar yfir daginn: Ekki fara of langt undir daglega orkuþörf því þá fer líkaminn í svokallað svelt og rígheldur í bestu orkuna, sem er fitan. Með svelti, þá hægir þú einnig á efnaskiptum líkamans. Gott er að undiráætla um ca. 300 hitaeiningar á dag. Þú léttist að vísu örlítið hægar en þú ert væntanlega að breyta um lífstíl þannig þú vilt að árangurinn haldist.

• Borðaðu góða fitu: Holla og góða fitan hefur ótal marga góða eiginleika fyrir hjarta og æðakerfi, efnaskipti og ónæmiskerfi svo eitthvað sé nefnt. Þú færð holla fitu úr hnetum, möndlum, feitum fisk, avocado o.m.fl.

• Ekki sleppa máltíðum: Það er rosalega mikilvægt að borða reglulega yfir daginn til þess að halda orkustiginu og blóðsykrinum í jafnvægi yfir daginn. Ef þú borðar sjaldan yfir daginn, þá eru meiri líkur á að þú troðir í þig þegar þú borðar. Það kemur ójafnvægi á líkamsstarfsemina. Góð leið er að skipuleggja máltíðirnar fyrirfram og þeir sem eru of þungir, urðu ekki of þungir á einni nóttu. Þannig þú verður ekki fit á einni nóttu. Þetta er þolinmæðisvinna.

• Drekktu nóg af vatni.

• Mikilvægt er að viðhalda eða auka prótein inntöku: Þegar þú ert að undiráætla hitaeiningarnar þínar yfir daginn, er mikilvægt að þú sért ekki að missa út mikilvæg prótein. Það er nauðsynlegt að halda í allan þann vöðvamassa sem er til staðar, því þeir hjálpa að sjálfsögðu við fitubrennsluna.

• Lyftu lóðum og hafðu þau í þyngri kantinum: Að lyfta lóðum (ekki þessum bleiku litlu) étur upp miklu fleiri hitaeiningar en að dúlla sér á brettinu. Brettið er gott í þolþjálfun, en ef þú ætlar virkilega að láta hitaeiningarnar fuðra upp, þá mæli ég með styrktarþjálfun. Tala nú ekki um alla orkuna sem fer í að jafna sig eftir góða lyftingaræfingu, þannig þú ert að brenna hitaeiningum löngu eftir æfingu.

• Veldu stórar æfingar í ræktinni: Ekki endilega vera einangra hvern vöðva fyrir sig, nema þú sért á leið upp á svið að pósa. Notaðu stórar æfingar sem reyna á fleiri ein ein liðamót/vöðvahópa í einu. Líkaminn þarf að vinna meira og þú eykur efnaskiptin og fitubrennsluna.

• Ekki sprengja skalann um helgar: Ef þú ert að undiráætla hitaeiningar yfir daginn um ca. 300 þá ertu að lækka þig um 1500 hitaeiningar á virkum dögum vikunnar. Það er ekkert mál að fara langt langt yfir þá  tölu um helgar með sukki, þannig ég mæli með að þú hafir „nammidaginn“ hóflegan, þannig þú standir ekki bara í stað viku eftir viku.

Eflaust hafa allir heyrt þetta áður en sannleikurinn er samt sá að það er gott að láta minna sig á þetta reglulega. Mér finnst það allavega og ef maður er í þeim pælingum að létta sig, þá innbyrðir maður þessar upplýsingar aldrei of oft.