10. maí 2011 - 12:37Aðsend grein
Pétur S. Jónsson.
Allir sem interneti geta valdið hafa heyrt talað um samskiptaumhverfið Twitter, sem leyfir þér að skrifa í 140 stöfum það sem þér liggur helst á hjarta þá stundina.
Sjálfur er ég nokkuð harður Twitter notandi, og nýt þess að umgangast þar fjölbreyttan hóp fólks. Twitter, rétt notað, getur lífgað upp á fúla mánudaga og gert heimsatburði sprellifandi á tölvuskjám okkar í rauntíma.
Ég heyri fólk í sífellu tala um að það sé ekkert varið í Twitter, það sé búið að prófa og hafi ekki fundist það neitt merkilegt. Ég veit út af hverju, því að þetta er nákvæmlega það sama og kom fyrir mig þegar ég prófaði fyrst. Það er nefnilega ekki alveg augljóst í fyrstu hvernig hámarka má Twittergleðina, en þegar það tekst, er það vinnunnar virði. Fjölmargir skrá sig inn, senda frá sér sitt fyrsta tíst, eitthvað eins og "Best að prófa þetta Twitter". Ekkert gerist, og þeir sjást aldrei aftur. "Ömurlegt, þetta Twitter," skrifa þeir svo á Facebook, sem þeir voru fljótir að læra á, og fá strax fimm læk.
Þetta eru skiljanleg viðbrögð, en þeim má líkja við að ganga einn inn í ókunnugt herbergi, tala þar smá við sjálfan sig, og fara svo. Ekkert sérstaklega gefandi.
Twitternotendur telja hvorki meira né minna en 190 milljónir. Þó er einungis brotabrot af þessum notendum duglegir að tísta* og mun mun færri enn hafa eitthvað áhugavert að segja, alveg eins og úti í hinum stóra heimi. *(já, tísta, að 'tweeta' er ekki falleg íslenska, og íslenskir notendur kusu einróma sögnina að tísta í staðinn, eftir lýðræðislega kosningu).
LEYNDARDÓMUR TWITTER
Vindum okkur beint að stærsta leyndardómi Twitternotkunar. Twitter er alveg eins og lífið sjálft. Ef þú umkringir þig áhugaverðu fólki með sömu áhugamál og þú, þá er það gefandi, og þar er hægt að eignast vini og félaga á mjög skömmum tíma.
Twitternotendur (eða twittlingar, eins og þeir eru stundum kallaðir) verða meira að segja einstaka sinnum félagar í kjötheimum líka. Íslenskir Twitter notendur hittast til dæmis af og til og fá sér bjór saman, alveg viljandi.
HVERNIG BYRJAR ÞÚ AÐ NOTA TWITTER
Stofnaðu Twitter aðgang á
www.twitter.com. Það er auðveld athöfn, og reynir lítið á greindarfar og tölvureynslu. Síðan seturðu inn mynd, af þér eða einhverju sem getur verið tákngervingur þes sem þú stendur fyrir. Skrifaðu svo stutta, hnitmiðaða, og helst skemmtilega lýsingu á því hver þú ert og hvað þú hafir upp á að bjóða. Þú getur sett inn bakgrunnsmynd líka á einfaldan hátt. Eða ekki.
NOTAÐU TWITTER FORRIT
Twitter vefurinn sjálfur er orðinn miklu merkilegri og betri en hann var frá upphafi, en það er auðveldast að njóta Twitter með góðu rauntímaforriti. Sjálfur nota ég Tweetdeck, sem er aldeilis fríkeypis og má finna hér:
www.tweetdeck.com. Þar sérðu öll tíst, leitarniðurstöður og atburði í rauntíma. En á meðan þú ert að velja þér þá fyrstu sem þú ætlar að fylgja getur verið gott að notast við vefinn.
HVERJUM Á AÐ FYLGJA
Nú kemur að því að velja hverjum þú ætlar að fylgja á Twitter. Góð byrjun getur verið að leita uppi þá sem skrifa eitthvað um áhugamálin þín.
Ef þú ert til dæmis forfallaður bútasaumsfíkill, geturðu prófað að slá inn 'quilting' í leitina á Twitter síðunni, eða í forritinu sem þú notar. Þá spretta jafnharðan upp tíst sem innihalda það orð. Ef þú rekst síðan á mjööög áhugaverð skrif um nýja og byltingarkennda strauma í bútasaumi, gætirðu kosið að fylgja þeim sem skrifaði, í von um að læra meira. Poppstjörnur, kvikmyndastjörnur, tölvunördar og fullt af venjulegu, skemmtilegu fólki, allt er þetta innan seilingar. Eitt klikk og þú fylgir.
Veldu þér þó varlega þá sem þú ætlar að fylgjast með. Kíktu á tímalínuna þeirra, og sjáðu hvort síðustu tístin þeirra innihalda eitthvað sem þér líkar. Eru þeir skemmtilegir? Fræðandi? Traustvekjandi? Þú getur auðvitað alltaf skipt um skoðun síðar, en þú ert að byggja upp Twitterhópinn þinn, og því betur sem hann er valinn, því skemmtilegri verður upplifun þín.
AÐ FYLGJA OG VERA FYLGT
Hér eru mismunandi skoðanir um hvernig eigi að bera sig að. Margir gera þá kröfu að þeir sem þeir fylgja, fylgi þeim til baka. Þetta kýs ég ekki að gera, af þeirri einföldu ástæðu að nokkrir þeirra sem mér fylgja skrifa ekki um neitt sem ég hef áhuga á.
Mér fylgir til dæmis afskaplega hress Salsaskóli í Bandaríkjunum, en þangað hafa greinilega ekki borist fréttir af því hvernig ég dansa. Þar sem ég hef engan áhuga á ástríðufullri salsaumræðunni þeirra, kýs að menga ekki tímalínuna mína með henni.
Sumir ákveða að fylgja þér út af stikkorðaleit. Aðrir af því að einhver annar fylgir þér. Enn aðrir algerlega handahófskennt. Og svo er það ruslararnir. Hluti af lífinu af Twitter er að vera fylgt af ruslprófílum sem vilja selja þér stinningarlyf, erótískar samræður, rússneskar eiginkonur og falskar tennur. Virtu þá að vettugi. Nema þú hafir áhuga á því, auðvitað.
Taktu Twitterprófílum með verðskulduðum fyrirvara. Þar sem auðvelt er að stofna til þeirra, er auðvelt að villa á sér heimildir. Gerðu ráð fyrir því að kynþokkafulla konan sem tjáir sig á heillandi og opinskán hátt um kynlíf geti verið einmana bóndi í Nebraska. Ekkert er endilega eins og það sýnist.
HVERNIG FÆ ÉG FYLGJENDUR?
Til þess að fólk taki upp á því hjá sjálfu sér að fylgja þér á Twitter eru nokkrar leiðir. Ef þú skrifar til dæmis einhverja óborganlega snilld sem ég síðan les, get ég ákveðið að endurvarpa eða "retweeta" tístinu þínu. Þannig birtist það öllum þeim sem fylgja mér. Einhver af þeim getur þannig tekið ákvörðun um að fylgja þér í kjölfarið, af því að kisumyndin þín eða Icesavebrandarinn var í hæsta gæðaflokki.
Á föstudögum er líka hefð fyrir því að mæla með þeim sem þér finnast skemmtilegir við aðra. Sú hefð er kölluð Follow Friday, og getur skapað þér fylgjendur.
Eins og í kjötheimum er heillavænlegt að eiga orðaskipti og umræður við þá sem þú fylgir á Twitter. Með því að setja @ fyrir framan twitternafn þess sem þú ávarpar, geturðu svarað tísti, og þannig hafið samræður, sem allir sjá, en eru þó ykkar á milli og birtast í sérstökum og þar til gerðum svardálki.
Einnig er hægt að senda einkaskilaboð notenda á milli, að því gefnu að þeir fylgi hvor öðrum. Mundu samt að þessi einkaskilaboð hafa á sér það orðspor að vera auðlesanleg af öðrum, notaðu þau því fyrir neitt sem ekki þolir dagsins ljós, eins og kreditkortanúmerið þitt og aðdáun þína á Kenny G.
TUNGUMÁL
Það borgar sig fyrir þig að velja þér tiltölulega snemma tungumálið sem þú ætlar að tjá þig á. Ef samskipti þín munu að öllum líkindum eiga sér mest stað á íslensku, haltu þig þá við hana, því annars munu þeir sem fylgjast með þér erlendis frá sitja uppi með óskiljanlegt hrognamál á tímalínunni sinni. Örfáum hefur tekist að tísta á íslensku og ensku samtímis eða til skiptis á viðunandi hátt, en þeir eru fáir.
FYRIRTÆKI Á TWITTER
Fyrirtæki og stjórnmálafólk dúkka oft upp á Twitter, en oftast á snarvitlausum forsendum. Oftar en ekki gera fyrirtækin (og stjórnmálafólk fyrir kosningar) lítið annað en að pota fram hlekkjum á greinar og síður með eigin efni, taka lítinn þátt í samræðum, fylgjast ekki með öðrum, og halda að með þessu séu þau að 'nýta sér samfélagsmiðlana'. Þetta er í flestum tilfellum misskilningur. Þó eru undantekningar á þessu. Síminn, Iceland Express, og nokkur fleiri íslensk fyrirtæki hafa nýtt sér Twitter til þess að þjónusta og opna samræður við viðskiptavini sína, og hlotið góðan róm fyrir.
Viðvera slíkra fyrirtækja á Twitter er góð fyrir neytendur. Ef þú hefur til dæmis yfir einhverju að kvarta, og viðkomandi fyrirtæki mannar Twitterinn með einhverjum sem hefur vald og getu til að redda hlutum, getur þú vænst hraðrar úrlausnar, því aðfinnsla þín er opinber og eftir henni tekið. Síminn leiðrétti þannig við mig afskaplega hvimleiða ofrukkun á örfáum mínútum, án þess að ég þyrfti að hlusta á tærandi leiðinlega biðtónlist, vera númer 22 í röðinni og vera svo vísað á milli deilda. Besta mál.
ATBURÐIR - HASHTAG
Það er gaman að fylgjast með alþjóðlegum atburðum á Twitter. Ég er til dæmis yfirlýstur Júrovision andstæðingur, en hef alltaf gaman af því þegar sjálf keppnin á sér stað. Ég horfi nefnilega á hana á Twitter.
Yfirleitt opna ég einn kaldan, slæ inn leitarforsendur keppninnar, sem iðulega eru einkenndar með auðkenni sem kallað er hashtag. Hashtag getur verið eitthvað eins og til dæmis #esc2011,(sem mér þykir líklegt að notað verði til að auðkenna júróið þetta árið), og þeir sem tísta um keppnina munu hafa þetta auðkenni með í tístum sínum, svo að tístin hafni í rauntímaleit þeirra sem fylgjast með keppninni.
Síðan getur maður bara lækkað í sjónvarpinu, og notið þess að horfa á straum fyndinna athugasemda um keppnina, klæðaburð og framkomu þátttakenda og tilgangleysi alþjóðlegra keppna í vondri tónlist.
Eyjafjallajökull sannaði svo um munar fyrir mörgum að Twitter getur líka verið frábært til að fylgjast með heimsatburðumn og áhrifum þeirra. Oft var hægt að fylgjast með gosfréttum mun hraðar þar en á hefðbundnum netmiðlum.
AÐ LOKUM
Þetta ætti að vera flestum nóg til að byrja. Mitt stærsta heilræði til tilvonandi Twitternotenda er eftirfarandi: Vertu þú sjálf/ur. Og eins og í öllum partíum, talaðu við annað fólk, svaraðu því og láttu mál þig varða.
Að lokum, góða skemmtun. Og ef þú heldur að þú getir haft gaman af því að fylgjast með röflinu í mér, þá geturðu fundið mig á Twitter undir notendanafninu @medialux.
Pétur S. Jónsson
Tónlistarframleiðandi