05. jan. 2018 - 16:01Vilhjálmur Birgisson

Tvöföldun Vesturlandsvegar við Kjalarnes

Ég velti því upp í gær hvort við ættum að kanna alla möguleika á því að flýta möguleikum á því að fá stjórnvöld til að auka umferðaröryggi okkar með því að tvöfalda veginn frá Hvalfjarðargöngum upp að Kollafirði.

Ég gerði mér algerlega grein fyrir því að mjög skiptar skoðanir væru á þessu máli og þetta væri eldheitt mál en ég tel hins vegar umræðuna nauðsynlega og þarfa.

Ég var bara að velta upp þessari hugmynd í ljósi þess að við misstum ungan mann í fyrradag í blóma lífsins m.a. vegna þess að vegakerfið uppfyllir ekki lágmarksöryggi. Það er gríðarleg umferð um Kjalarnesið og ég get ekki séð að stjórnvöld ætli sér að gera neitt í því að tvöfalda akstursleiðirnar til að auka öryggi okkar sem ökum þarna oft um.

Að sjálfsögðu myndi ég vilja að ríkið myndi ráðast strax í þessar framkvæmdir til að auka öryggi vegfarenda og hætt yrði að innheimta vegtolla enda afar ósanngjarnt að þetta séu einu jarðgöngin sem rukkað er í og má alveg velta því fyrir sér hvort slíkt sé brot á jafnræðisreglu.

En ef hægt yrði að rukka í 2 til 3 ár til viðbótar og veggjaldið yrði lækkað umtalsvert og líka að þeir sem þurfa að sækja nám eða vinnu daglega myndu fá skattaafslátt eða eitthvað slíkt eins og þekkist t.d. í Noregi þá finnst mér þetta vera hugmynd sem megi ræða og skoða.

Eina sem vakir fyrir mér er að koma í veg fyrir alvarleg slys og ótímabær dauðsföll í umferðinni og ef þessi leið myndi bjarga einu mannslífi þá yrði ég glaður en ég ítreka að ég myndi glaður vilja að ríkið myndi ráðast strax í þessa framkvæmd en ég veit að svo verður ekki næstu árin, því miður.

Ég skil það bara mjög vel að fólk sé alls ekki tilbúið að sitja undir þessari mismunun lengur, ég bara skil það fullkomlega og virði þá skoðun algerlega. Eina sem ég hef áhyggjur af er að ekkert verði gert í þessum málum og við missum enn fleiri í hræðilegum slysum á þessari leið.

Ég vissi vel að þetta er hitamál en ef þessi innheimta í 2 til 3 ár til viðbótar myndi leiða til þess að hægt væri að bjarga mannslífum og fækka slysum með því að ráðast í tvöföldun á þessari leið þá finnst mér persónulega allt í lagi að ræða það með málefnalegum hætti.

Langflestir gera það, en ég ítreka það svo sannarlega að ég ber fulla virðingu fyrir skoðunum annarra í þessu máli og skil þeirra sjónarmið fullkomlega enda er ég sammála því að ríkissjóður eigi að tryggja að þjóðvegir landsins séu öryggir. En ég treysti því miður ekki ríkisvaldinu til að gera það eins og sagan sýnir okkur síðustu áratugi eða svo.

Ég held að það væri hægt að finna leið þar sem þeir sem stunda nám og vinnu myndu fá góðan skattaafslátt eins og gert er t.d. í Noregi eins og áður sagði og svo væri hægt að lækka gjaldið niður í 120 til 150 krónur ferðina en láta erlendu ferðamennina greiða áfram fullt gjald og nota þessa fjármuni strax í að tvöfalda leiðina um Kjalarnesið.

En eins og áður sagði er þessi umræða hjá mér tilkomin vegna þess að ég finn mikið til með móður drengsins sem lést í fyrradag en þetta var einkasonur hennar. Kannski á maður ekki að láta tilfinningar og samkennd hlaupa með sig í „gönur.“

Allavega finnst mér þetta vera eitthvað sem hægt sé að ræða málefnalega og virðum skoðanir allra og ég ítreka það að ég skil þá sem eru algerlega á móti þessari hugmynd fullkomlega.

Það má t.d. líka spyrja stjórnvöld og vegagerðina að því hvað ríkissjóður hefur sparað mikla fjármuni frá því Hvalfjarðargöng voru tekin í notkun 11. júlí 1998. Er þá ekki að tala um öll mannslífin sem hugsanlega hafa bjargast með þessari bestu umferðarbót Íslandssögunar sem Hvalfjarðagöngin eru, en eins og við öll munum þá voru alvarleg slys og banaslys nánast á hverju ári í Hvalfirðinum.

Hugsið ykkur sparnað ríkissjóðs hvað varðar viðhald og umbætur á veginum um Hvalfjörð frá því Hvalfjarðargöngin komu til en kostnaður ríkisins vegna viðhalds á veginum í Hvalfirði hefur eðli málsins samkvæmt dregist gríðarlega saman vegna þess að nánast öll umferð fer í gegnum göngin.

Svo má ekki gleyma að Vegagerðin þurfti oft að hlaupa undir bagga með Akraborginni til að hægt væri að halda rekstri hennar áfram á sínum tíma enda sjá Vegagerðin um rekstur Akraborgarinnar. Allt þetta hefur ríkissjóður sparað sér og því má klárlega halda því fram að þessi sparnaður sem ríkissjóður hefur sparað frá komu Hvalfjarðarganga sé jafnvel mun meiri en sá kostnaður sem fylgir því að tvöfalda Vesturlandsveginn um Kjalarnes.

En tökum málaefnalega umræðu um öryggismál á vegunum á okkar svæði og veltum öllum möguleikum fyrir okkur því það eru jú mannslífin sem skipta okkur mestu máli.




31.okt. 2017 - 11:35 Vilhjálmur Birgisson

Hvað munu Framsóknarmenn gera?

Hugsið ykkur í hvaða stöðu Framsóknarflokkurinn er, en eins og allir sjá þá er hann í þeirri stöðu að erfitt verður að mynda ríkisstjórn á Íslandi án þeirra aðkomu.
13.okt. 2017 - 11:24 Vilhjálmur Birgisson

Samfélagsbanki fyrir íslenskan almenning

Algjörlega sammála því að við erum í dauðafæri til að breyta fjármálakerfinu þannig að það sé í þágu almennings en ekki til þess að neytendur og heimili séu blóðmjólkuð af kerfinu í formi okurvaxta, verðtryggingar og himinhárra þjónustugjalda.
10.okt. 2017 - 11:08 Vilhjálmur Birgisson

Þessu er ég ekki búinn að gleyma!

Í umræðum um komandi Alþingiskosningar í ríkissjónvarpinu á sunnudagskvöld spurði Þorvaldur frá Alþýðufylkingunni Katrínu Jakobsdóttur formann Vinstri grænna um af hverju kjósendur ættu að treysta þeim í ljósi þátttöku þeirra í ríkisstjórninni á árunum 2009 til 2013.
27.sep. 2017 - 11:43 Vilhjálmur Birgisson

Það þarf bara að bæta við tveimur orðum

Jæja, ofbeldið gegn íslenskum heimilum og almenningi heldur áfram af fullum þunga og þetta ofbeldi er með fullri vitneskju þeirra sem starfa á Alþingi. Ég hef í mörg ár fjallað um það að það er ekki bara að við íslendingar séum nánast eina þjóðin í heiminum sem þarf að þola það að skuldir almennings og heimila séu verðtryggðar heldur þurfum við líka að þola það að verðbólgan hér á landi er mæld með öðrum hætti en í þeim löndum sem við viljum bera okkur saman við en hér er ég að tala um að við erum með svokallaðan húsnæðislið inni í mælingunni á hækkun á neysluvísitölunni.
18.sep. 2017 - 13:28 Vilhjálmur Birgisson

Hvaða stjórnmálaflokkar ætla að standa með alþýðunni?

Er að velta því fyrir mér hvert kosningaloforð Sjálfstæðisflokksins, Viðreisnar og Bjartrar framtíðar verði í komandi kosningum.
11.sep. 2017 - 13:09 Vilhjálmur Birgisson

Ólíðandi að stjórnvöld hækki skattbyrði þeirra sem höllustum fæti standa

Það er afar sorglegt að fá það staðfest að skattbyrði þeirra sem höllustum fæti standa í íslensku samfélagi skuli hafa snarhækkað á síðustu 18 árum eða svo.
29.ágú. 2017 - 13:26 Vilhjálmur Birgisson

Sveiattan!

Í gær sendi hagdeild ASÍ frá sér skýrslu þar sem fram kemur að skattbyrði hafi aukist mest hjá þeim tekjulægstu frá árinu 1998 til ársins 2016. Þetta kemur mér alls ekki á óvart enda liggur fyrir að ætíð er níðst mest á þeim tekjulægstu og nægir að nefna hvernig farið hefur verið með þróun á persónuafslættinum á liðnum árum og áratugum.
28.júl. 2017 - 14:57 Vilhjálmur Birgisson

Viðskiptabankarnir þrír fengu skotleyfi á íslenska alþýðu

Ofsagróði íslensku bankanna heldur áfram á fullum þunga en í gær tilkynnti Landsbankinn að fyrstu 6 mánuði þessa árs hafi hagnaður bankans numið 12,7 milljörðum. Rétt er að geta þess að viðskiptabankarnir þrír sem báru stóra ábyrgð að hér varð hrun með skelfilegum afleiðiingum fyrir almenning í þessu landi hafa skilað í hagnað frá hruni fyrir skatta samtals 656,7 milljörðum.
21.júl. 2017 - 10:05 Vilhjálmur Birgisson

98 milljarðar voru færðir frá skuldsettum heimilum yfir til fjármálafyrirtækja

Enn og aftur er það meðal annars hækkun á leigu-og húsnæðisverði sem keyrir verðbólguna áfram. 12 mánaða verðbólgan er 1,8% en takið eftir að án húsnæðisliðar er verðbólgan neikvæð sem nemur 3,1%!! Semsagt það er bullandi verðhjöðnun! Takið líka eftir að ef húsnæðisliðurinn væri ekki inni í neysluvísitölunni hvað varðar vexti og verðtryggingu þá hefðu verðtryggðar skuldir heimilanna lækkað um 62 milljarða á síðustu 12 mánuðum en raunin varð hins vegar sú að þær hækkuðu um 36 milljarða.
20.júl. 2017 - 11:26 Vilhjálmur Birgisson

Við getum alls ekki látið þessi einræðis vinnubrögð ASÍ klíkunnar átölulaus stundinni lengur!

Hann er yfirgengilegur hrokinn í forseta ASÍ og forystu Samtaka atvinnulífsins en núna telja þessir aðilar að þeir þurfi nú ekkert að fara eftir alvarlegum athugasemdum sem Fjármálaeftirlitið gerði gagnvart lífeyrissjóðunum og lýtur að valmöguleika launafólks á hinum almenna vinnumarkaði að velja sér vörsluaðila til að ávaxta aukið framlag atvinnurekanda í séreignasjóð sem samið var um árið 2016.
19.júl. 2017 - 10:35 Vilhjálmur Birgisson

Enn eitt hneykslismálið

Hérna kemur að mínu áliti enn eitt hneykslismálið upp en eins og allir vita þá fékk Ólafur Ólafsson afskrifaða skuld uppá 64 milljarða í hruninu en á sama tíma og þessi afskrift átti sér stað kom félag í eigu Ólafs með tæplega tvo milljarða króna til landsins í gegnum fjárfestingarleið Seðlabanka Íslands í desember 2012. Miðað við núverandi gengi gæti félagið hans Ólafs innleyst um 809 milljónir í gengishagnað, samkvæmt útreikningum Markaðarins sem birtist í dag.
17.júl. 2017 - 13:16 Vilhjálmur Birgisson

Brot úr ræðu á Sumarþingi fólksins

Eins og fram hefur komið þá flutti ég ræðu á Sumarþingi fólksins sem haldið var nánast fyrir fullum sal í Háskólabíói á síðasta laugardag. Ég skal fúslega viðurkenna að ég varð gjörsamlega orðlaus um tíma að sjá uppundir 1000 manns samankomna í Háskólabíói og það um hásumarorlofstímann, enda átti ég alls ekki von á að svo margir myndu sjá sér fært að mæta. Það er morgunljóst að fólk var mætt í Háskólabíó til að lýsa yfir vanþóknun og fyrirlitningu á þeirri spillingu, græðgi og misskiptingu sem nú hefur tekið sér bólfestu enn og aftur í okkar samfélagi.
10.júl. 2017 - 13:09 Vilhjálmur Birgisson

Fulltrúum frá SA, ASÍ og lífeyrissjóðunum skellt á lærið og þeir rassskelltir hressilega

Ég tek eftir því að stórfrétt sem birtist um helgina hefur alls ekki fengið þá athygli sem hún á svo sannarlega skilið að fá. En sú frétt sem ég er að tala um er bréf sem Fjármálaeftirlitið sendi lífeyrissjóðunum vegna svokallaðrar tilgreindar séreignar en í þessu bréfi er fulltrúum frá Samtökum atvinnulífsins, Alþýðusambandi Íslands og lífeyrissjóðunum skellt á lærið og þeir rassskelltir hressilega af FME.
05.júl. 2017 - 13:21 Vilhjálmur Birgisson

Hræsnin, misskiptingin og óréttlætið ríður ekki við einteyming í þessu landi okkar

Enn og aftur er dregið í lottói hjá elítunni en núna voru fjórir stjórnendur LBI með allar lottótölurnar réttar og fá hver í sinn hlut um 90 milljónir! Rétt er að geta þess að þeir sáu sjálfir um að draga lottótölurnar. Um daginn var dregið í lottói hjá Framtakssjóði Íslands sem lífeyrissjóðirnir eiga og þar hlaut framkvæmdastjórinn 20 milljóna vinning fyrir það eitt að hafa náð að starfa í þrjú ár fyrir sjóðinn.
04.júl. 2017 - 13:42 Vilhjálmur Birgisson

Ógeðsleg hræsni!

Jón G. Hauksson, ritstjóri Frjálsrar verslunar, bendir á að 200 efstu forstjórarnir séu með 2,8 milljónir á mánuði að jafnaði en þeir voru með 2,6 í fyrra. Þetta er aukning um 200 þúsund á mánuði. Takið eftir að 200 efstu forstjórar fyrirtækja á Íslandi hækkuðu um 200 þúsund á mánuði á einu ári og eru komnir með að meðaltali tæpar 3 milljónir í laun á mánuði. Í þessu samhengi er rétt að geta þess að árið 1996 var lægsti taxti verkamanns 60 þúsund á mánuði en er í dag kominn í 257 þúsund á mánði og hefur hækkað um 197 þúsund á 21 ári.
03.júl. 2017 - 09:56 Vilhjálmur Birgisson

Það er ljóst á öllum fréttum að aðkoma Costco hefur haft gríðarleg áhrif á vöruverð á Íslandi

Ég tel gríðarlega mikilvægt að Hagstofan upplýsi almenning í þessu landi hvort það sé virkilega rétt að aðili sem kemur inn á íslenskan verslunarmarkað eins og Costco sé utan verðbólgumælinga. Þetta tel ég vera mikilvægt vegna þess að við vitum öll að verðlag í Costco hefur verið í mörgum tilfellum mun lægra í mörgum vöruflokkum en í öðrum verslunum. En slíkt getur skipt íslensk heimili miklu máli því stór hluti af fjárskuldbindingum heimilanna tekur hækkunum samkvæmt hækkun neysluvísitölunnar.
27.jún. 2017 - 15:13 Vilhjálmur Birgisson

Kjararáð hefur lagt línurnar

Það er morgunljóst að fjölmargir af okkar félagsmönnum eru agndofa og æfir af reiði yfir þeirri ákvörðun kjararáðs að hækka enn og aftur þá sem heyra undir kjararáð um allt að 300 þúsund á mánuði með afturvirkni sem nær í sumum tilfellum allt að eitt og hálft ár aftur í tímann.
15.jún. 2017 - 13:21 Vilhjálmur Birgisson

Einn maður stjórnar lífeyrissjóði sem er jafn stór og allir íslensku sjóðirnir til samans

Hugsið ykkur að einn maður að nafni Steve Edmundson stýrir 35 milljarða dala lífeyrissjóði fyrir opinbera starfsmenn í Nevada í Bandaríkjunum. Takið eftir að miðað við gengi Bandaríkjadollarans í gær er þessi lífeyrissjóður sem þessi eini maður stjórnar jafn stór og allt lífeyriskerfið okkar eða um 3500 milljarðar íslenskrar króna. Það kemur líka fram í þessari frétt að árslaun Steve eru rétt rúmir 127 þúsund dalir, eða sem nemur 1,1 milljón á mánuði.
14.jún. 2017 - 10:42 Vilhjálmur Birgisson

Þetta rugl sem er í kringum lífeyrissjóðina

Ég er ekki í neinum vafa um að nú verður að skoða þetta rugl sem er í kringum lífeyrissjóðina en það kostar um eða yfir 10 milljarða að reka lífeyriskerfið á ári. Hér er til dæmis verið að greiða framkvæmdastjóra Framtakssjóðs Íslands 20 milljóna mætingarbónus fyrir það eitt að hafa náð að vinna fyrir sjóðinn í 3 ár! Í þessu samhengi er mikilvægt að átta sig á því að það eru íslensku lífeyrissjóðirnir sem eiga uppundir 70% í Framtakssjóði Íslands.
06.jún. 2017 - 13:44 Vilhjálmur Birgisson

Blóðtaka í atvinnulífi okkar Akurnesinga

Vissulega er það jákvætt skref að boðið verður upp á rútuferðir, en því miður eru alltof margir sem ekki munu hafa tök á að þiggja vinnu í Reykjavík og ástæðan er einföld, vinnudagurinn lengist um 2 tíma án þess að starfsmenn muni fá greitt fyrir ferðatímann. Einnig gengur það ekki upp hjá mörgum að þiggja starf í Reykjavík, sérstaklega fyrir þá sem eru með börn í leik- eða grunnskóla.
01.jún. 2017 - 12:58 Vilhjálmur Birgisson

Er það lögbrot að lækka verð til heimila og fyrirtækja?

Ég tek svo sannarlega undir þessi sjónarmið hjá Viðari Garðarsyni að stjórnvöld verði að marka sér skýra eigendastefnu fyrir Landsvirkjun. Ég skora á fólk að horfa á myndbrotin sem koma fram með þessum pistli frá aðalfundi Landsvirkjunar, en í þeim kemur fram hjá forstjóra Landsvirkjunar að á síðustu 7 árum hafi Landsvirkjun átt eftir 200 milljarða og takið eftir, þá hefur allur rekstrarkostnaður fyrirtækisins verið greiddur, allur!
29.maí 2017 - 11:23 Vilhjálmur Birgisson

Hvaða mál eru brýnni fyrir hagsmuni almennings og skuldsettra heimila?

Ruglið í kringum hækkun á neysluvísitölunni heldur áfram. Í dag er 12 mánaða verðbólgan 1,7% en án húsnæðisliðar er hún neikvæð sem nemur 2,6%. Sem sagt, enn og aftur er það hækkun á fasteignaverði og leigu sem knýr verðbólguna áfram og enn og aftur horfa ráðamenn og þingmenn aðgerðalausir á þessa staðreynd.
23.maí 2017 - 13:08 Vilhjálmur Birgisson

Stjórnvöld eiga að vera á tánum en ekki hnjánum

Þetta eru nú meiri snillingarnir hjá Samtökum fyrirtækja í sjávarútvegi en nú kallast það ábyrg byggðastefna hjá HB Granda að stúta fjöreggi okkar Skagamanna í atvinnumálum á einni nóttu. Að hugsa sér að sjávargreifarnir reyni að réttlæta það að það fyrirkomulag sem við erum með við stjórnun fiskveiða sé búið að leggja að velli þriðju stærstu verstöð landsins á nokkrum árum er ótrúlegt og jafnvel ósvífið.
27.apr. 2017 - 15:48 Vilhjálmur Birgisson

Hví í ósköpunum gera alþingismenn ekkert í þessu?

Hví í ósköpunum gera alþingismenn ekkert í þessu? Nú kemur í ljós að 12 mánaða verðbólga á Íslandi er 1,9% en takið eftir án húsnæðisliðar þá er hún neikvæð um 1,8%. Þetta þýðir á mannamáli að verðtryggðar skuldir heimilanna hafa hækkað um 38 milljarða á síðustu 12 mánuðum en ef fjárskuldbindingar heimilanna myndu miða við neysluvísitölu án húsnæðisliðar þá hefðu skuldir heimilanna lækkað um 36 milljarða, en hér hafa verið hafðir af heimilnum 74 milljarðar! Með öðrum orðum þá er það einungis hækkun á húsnæðisverði og leiguverði sem knýr verðbólguna áfram en það er bullandi verðhjöðnun á öðrum liðum neysluvísitölunnar.
27.mar. 2017 - 18:37 Vilhjálmur Birgisson

„Sorglegt og dapurt“

Kátir voru karlar á kútter Haraldi. Til fiskiveiða fóru frá Akranesi. Og allir komu þeir aftur!
21.mar. 2017 - 12:35 Vilhjálmur Birgisson

Af hverju er verið að selja erlendum hrægömmum slíka gullgæs?

Það er sorglegt til þess að vita að hrægömmunum hefur nú tekist að steypa sér niður og læsa klónum í einn af viðskiptabönkum landsmanna, en eins og allir vita hafa hrægammarnir flögrað yfir íslensku viðskiptalífi um langt skeið í þeirri von að fá tækifæri til læsa klónum í arðsama bráð sína og nú hefur þeim svo sannarlega tekist það.
19.mar. 2017 - 16:47 Vilhjálmur Birgisson

Fyrirgefið orðbragðið

Fyrirgefið orðbragðið, en djöfull er ég sammála Mikael Torfasyni að við eigum að skammast okkur hvernig við komum fram við þá sem höllumstum fæti standa í íslensku samfélagi. Ég veit ekki hvað ég hef skrifað marga pistla og flutt ræður um að það er með ólíkindum að vera með lágmarkslaun og launataxta sem eru langt undir öllum neysluviðmiðum sem velferðaráðuneytið hefur gefið út.
16.mar. 2017 - 13:23 Vilhjálmur Birgisson

Ófriður er ekki verkafólki og iðnaðarmönnum að kenna

Það er alltaf gaman og fróðlegt að hlusta á félaga Brynjar sem sagði að hér væri alltaf allt logandi í verkföllum og að besti árangurinn til að lækka vexti væri friður á vinnumarkaði! Það er mikilvægt fyrir Brynjar og fleiri að vita að verslunarmenn, verkafólk og iðnaðarmenn á Íslandi hafa vart farið í verkfall 30 til 40 ár! Svo tala menn um ófrið á vinnumarkaði! Þessi ófriður er alls ekki verkafólki og iðnaðarmönnum að kenna.

14.mar. 2017 - 13:56 Vilhjálmur Birgisson

Til hamingju Ragnar Þór!

Ég get ekki annað en óskað vini mínum Ragnar Þór Ingólfsson innilega til hamingju með þennan glæsilega sigur og trúðu mér, þú áttir hann svo sannarlega skilið. Þetta mun hafa gríðarlega jákvæð áhrif á baráttu verkalýðshreyfingarinnar í heild sinni því samstarf og samvinna Verkalýðsfélags Akraness og Ragnars Þórs á þingum ASÍ hefur verið órjúfanleg. Nægir að nefna í stórum hagsmunamálum eins og afnámi verðtryggingar, að tekið sé á okurvöxtum og auknu lýðræði í lífeyrisjóðunum, allt eru þetta mál sem Ragnar Þór hefur tekið þátt í að styðja okkur í VLFA með.


Vilhjálmur Birgisson

Fæddur 5. ágúst 1965. Fjögurra barna faðir og Skagamaður í húð og hár. Hefur alla tíð unnið verkamannavinnu þar til hann tók við formennsku í Verkalýðsfélagi Akraness 19. nóvember 2003.

Er óflokksbundinn og hefur þá trú að forystumenn í verkalýðshreyfingunni eigi ekki að vera eyrnamerktir stjórnmálaflokkum. Hefur brennandi áhuga þjóðfélagsmálum og segir sína meiningu umbúðalaust.

Hannes Hólmsteinn Gissurarson
Hannes Hólmsteinn Gissurarson - 27.12.2017
Koestler og bæjarstjórnarkosningar
Hannes Hólmsteinn Gissurarson
Hannes Hólmsteinn Gissurarson - 30.12.2017
Koestler og tilvistarspekingarnir
Börkur Gunnarsson
Börkur Gunnarsson - 02.1.2018
Konan talar upp úr svefni
Vilhjálmur Birgisson
Vilhjálmur Birgisson - 05.1.2018
Tvöföldun Vesturlandsvegar við Kjalarnes
Hannes Hólmsteinn Gissurarson
Hannes Hólmsteinn Gissurarson - 06.1.2018
Bókabrennur
Davíð Már Kristinsson
Davíð Már Kristinsson - 11.1.2018
Ísland hefur leik á EM í Króatíu
Hannes Hólmsteinn Gissurarson
Hannes Hólmsteinn Gissurarson - 13.1.2018
Trump, Long og Jónas frá Hriflu
Hannes Hólmsteinn Gissurarson
Hannes Hólmsteinn Gissurarson - 17.1.2018
Því var bjargað sem bjargað varð
Börkur Gunnarsson
Börkur Gunnarsson - 18.1.2018
Þegar ég verð borgarstjóri
Hannes Hólmsteinn Gissurarson
Hannes Hólmsteinn Gissurarson - 20.1.2018
Líftaug landsins
Þórhallur Heimisson
Þórhallur Heimisson - 22.1.2018
Átökin um landið helga
Fleiri pressupennar