27. jún. 2012 - 21:24Þórhallur Heimisson

Getur nær-dauða reynsla varpað ljósi á líf eftir dauðann?

„Nær- dauða-reynsla“ er grófleg þýðing mín á ensku skilgreiningunni Near death experience. Það er erfitt að skilgreina og skýra hvað átt er við með nær-dauða-reynslu. Með einhverjum fyrirvörum má þó segja þetta: Nær- dauða -reynsla er reynsla þess einstaklings sem hefur verið við dauðans dyr, hefur dáið í læknisfræðilegri merkingu, en hefur síðan snúið aftur til lífsins, verið endurlífgaður, og vitnar um að hann hafi verið einhversstaðar annars staðar en í myrku meðvitundarleysi hins dána líkama.

Það eru til fjölmargar reynslusögur sem lúta að þessu. Sumir segja svo frá að þeir hafi farið á einhvern hátt út úr líkamanum og séð sjálfa sig að ofan, horft niður úr loftinu á skurðarborðið, þar sem læknar börðust við að endurlífga dáinn líkamann. Þeir hinir sömu lýsa þessu ferðalagi meðvitundarinnar utan líkamans sem hægfara svifi, eins og hitastreymi sem ber þá upp og lætur þá svífa utan og ofan þess sem er að gerast í kringum þá. En svo eru önnur sem vitna um allt öðruvísi ferðalag. Þau segja svo frá að þau hafi ferðast á miklum hraða gegnum einhverskonar göng, oft í átt að sterkum ljóskjarna, stundum í átt að fjölskyldu og vinum sem hafa látist fyrir löngu.

Lýsing í smáatriðum

Sum þeirra sem upplifa sig svífandi yfir líkama sínum á skurðarborði geta stundum lýst í smáatriðum því hvað var um að vera í skurðstofunni. Hin, sem efast um að þessi reynsla hafi átt sér stað í raun og veru, benda gjarnan á að þarna hafi undirmeðvitund sjúklingsins líklegast verið að verki. Sjúklingurinn sé bara að „endurspila“ gamlar minningar úr kvikmyndum eða sjónvarpsþáttum eða fyrri reynslu sína af spítalavist. Það sé vísindalega sannað að meðvitundin geti ekki verið fyrir hendi utan líkamans. Þess vegna hljóti þessi reynsla að eiga sér eðlilega skýringu. Maðurinn sé aðeins tölva. Meðvitundi sé eins og tölvuforrit. Þegar rafmagn fer af tölvunni slokknar á forritinu.

Um allan heim eru samt til  frásagnir karla og kvenna sem búa að þessari reynslu. Frásagnir þeirra hafa margar verið skráðar og rannsakaðar og gefnar út. Slíkar rannsóknir voru sérstaklega viðamiklar á sjöunda og áttunda áratug síðustu aldar, þó nokkuð hafi dregið úr þeim síðan. Þá var líka mikill almennur áhugi á þessum málefnum, en fjarað hefur undan honum hin síðari árin. Svo nefnd sé ein þekkt rannsókn, þá gaf sálfræðingurinn Raymond Moody út rannsóknir sínar árið 1975 í bók sem hann nefndi „Life after life“, eða Lífið eftir lífið, en hún varð metsölubók og var meðal annars þýdd á íslensku. Þar ræddi Moody við fjölda sjúklinga og skráði sögu þeirra og reynslu.

Allir höfðu sjúklingarnir upplifað eftirfarandi að sögn Moody:
  • Undarleg hljóð: Suð eða hringing samfara þeirri vissu að maður væri látinn.
  • Frið og lausn undan þjáningu: Sú þjáning sem fylgdi sjúkdómi eða aðgerð sem sjúklingur gekkst undir hvarf um leið og meðvitundin yfirgaf líkamann. Alger friður fylgdi í kjölfarið.
  • Meðvitund fyrir því að vera utan líkamans: Hinn deyjandi fékk þá tilfinningu að hann svifi út úr líkamanum – hann horfði á læknana að ofan, og honum leið vel.
  • Göngin: Margir vitnuðu um göngin – að þeir löðuðust að dimmum göngum og fóru í gegnum þau á miklum hraða. Við endi ganganna skein bjart ljós.
  • Ljósverur: Þegar komið var út úr göngunum sögðust sumir sjúklingar mæta látnum einstaklingum sem ljómuðu af innra ljósi. Gjarnan voru þetta látnir ástvinir sem komu til að taka á móti þeim.
  • Ljósveran eina: Eftir að hafa hitt ljósverurnar mörgu bar hinn látna fyrir eina skínandi andlega veru sem viðkomandi upplifði sem Guð, Jesús eða aðra trúarleg vera.
  • Andstaða við að snúa aftur: Ljósveran sagði hinum látna að hann yrði að snúa aftur til lífsins. Stundum fékk  viðkomandi að velja hvort hann sneri aftur eða héldi áfram inn í ljósið. Það var fyrst og fremst umhyggja fyrir ástvinum á jörðinni sem réði þeirri ákvörðun, ef hún gafst.
Íslenska hlið mála

Hér á Íslandi var lögð nokkur stund á rannsóknir í þessum fræðum á liðinni öld. Þar fór fremstur í flokki dr.Erlendur Haraldsson, fyrrum prófessor við Félagsvísindadeild Háskóla Íslands. Hann ritaði bókina „At the Hour of Death“ ásamt Karlis Osis, en hún kom út kom árið 1977. Hún var gefin út hér á landi 1979 undir heitinu Sýnir á dánarbeði. Karlis Osis var forstöðumaður rannsóknardeildar American Society for Psychical Research.

Þeir Erlendur og Osis nálguðust þessar frásagnir á annan hátt en Moody. Moddy sagði sögu þeirra sem höfðu dáið en síðan verið endurlífgaðir. Erlendur og Osis fjölluðu um sýnir fólks rétt fyrir andlátið. Erlendur hélt þessum rannsóknum áfram og gaf meðal annars út árið 1978 bókina „Þessa heims og annars – könnun á dulrænni reynslu Íslendinga, trúarviðhorfum og þjóðtrú“, og „Látnir í heimi lifenda, niðurstöður rannsóknar um reynslu Íslendinga af látnu fólki“, árið 2005.

Ekki má gleyma að nefna rannsóknir hjartalæknisins Michael Sabom sem hann gaf út árið 1982 í bók sinni „Recollections of death: A medical Investigation“. Hann hafði lesið bók Moodys og fannst hún ekki nægilega vísindalega fram sett. Það merkilegasta við bók Saboms er að mínum dómi viðbætir aftan við megintexta. Í viðbætinn skráði hann frásagnir tuttugu og átta sjúklinga sem höfðu látist og snúið aftur og lýstu upplifun sinni af annarri vídd, tilvist handan þessa skynheims okkar. Um þá vídd og gerð hennar voru þeir ótrúlega sammála.

Tvennt einkenndi allar frásagnir þeirra. Annað mætti kalla veðurfarslýsing. Hitt var lýsing á sveit eða sveitalegu umhverfi. Annar helmingur þessara 28 sjúklinga taldi sig hafa séð umhverfi sem var ekkert nema himinn. Himininn í þessari handanveröld líktist hinum jarðneska himni. Hann var blár, sólin skein en líka sást í stöku ský. Jafnvel þoka var á sveima einhverstaðar í nánd. Tveir sjúklingar sem höfðu sérstakan áhuga á veðurlýsingum töluðu um bláan himinn með stöku skýi í nánd.

Hinn helmingur þeirra sem lýstu reynslu sinni af þessari handanveröld sögðu frá görðum, grænu túni eða engjum þar sem sást í einhverskonar hlið. Þessar himnesku lendur voru að mestu leiti óbyggðar. Það sást ekki í nein hús, dýr eða persónur. Aðeins endalaus tún og engi og garðlendi. Nokkrir sögðust þó hafa skynjað búfénað á beit, og einhverjir höfðu tekið eftir fólki af öllum þjóðernum við einhverja iðju.

Hvað þýðir þetta?

Það er hægt að túlka þessar sýnir með ýmsu móti. Sjúklingarnir gætu verið að upplifa eitthvað alveg einstakt, eitthvað sem þeim þyrkir stórkostlegt, en er þeim um leið algerlega framandi. Þeir túlka þessa reynslu sína samkvæmt eigin hugmyndum um himnaríki – eða lífið eftir dauðann. Þannig túlka sjúklingarnir líka reynsluna af því að snúa aftur til heimsins út frá fyrri reynslu sinni og skoðunum. Þeir tala um að þeim sé á einhvern hátt kippt niður í gegnum göngin sem áður voru nefnd.

Vörubílstjóri lýsti þessum göngum til dæmis eins og pípulögn eða röraræsi á vegi. Þess vegna má draga þá ályktun að þessi tilvist sé ekki svona eins og hér að ofan sé lýst. Þetta sé aðeins mannleg túlkun á því sem orð ná ekki yfir.

En svo gæti líka verið að að hinn látni, sjúklingurinn sem dó og var vakinn aftur til lífsins, hafi raunverulega séð inn í tilvistina sem býður eftir dauðann. Hann væri þá að lýsa raunverulegri reynslu. Og þessi tilvist væri þá raunverulega eins og hann lýsir henni - himinn, sól, ský, engi, tún, fegurð, dýr, fólk í fjarska, hlið. Þessa reynslu er auðvitað ekki hægt að sanna. Því þessa tilvist er ekki hægt að rannsaka vísindalega. Hún er algerlega utan okkar reynslusviðs – ef hún er til myndi einhver bæta við.
Ef við gefum okkur að reynsla þessara sjúklinga sé sönn og frásagnir þeirra sömuleiðis, þá er þessi tilvist sem þeir segja frá utan okkar heims, á öðru sviði.

Þetta er tilvistarsvið sem við getum ekki nálgast fyrr en við deyjum.

Og það er eitthvað algerlega annað en okkar heimur.

Ef til vill er það einmitt sú staðreynd, að meðvitund þeirra sem ganga í gegnum nær-dauða-reynslu, losnar undan undan áreitum þessa heims okkar eitt augnarblik, sem veldur því að þeir geta litið handan núverandi tilvistar og inn í þá næstu. Stillt sig inn á bylgjulengd sem vanalega er utan okkar færis að stilla okkur inn á. Truflanir lífsins eru svo miklar. Þetta er ef til vill sama bylgjulengd og dulspekingar alla trúarbragða reyna að stilla sig inn á. Þetta er bylgjulengd kristinna mystikera, múslímskra súfista og jógameistara búddista og hindúa. En meira að segja þeirra skynjun verður aldrei eins skýr og hinna sem deyja og snúa aftur til lífsins í þessum heimi.

Ekki hafa allir jákvæðu sögu að segja af þessari reynslu af tilvistinni handan dauðans. Það verður að nefnast eins og satt er. Í einni rannsókn þar sem 700 einstaklingar sögðu frá reynslu sinni af handanvíddinni, lýstu 105 henni henni sem „óþægilegri“. Það voru þó engir púkar eða brennandi eldar sem biðu handan ganganna – óþægindin virtust fremur stafa af því hvernig sjúklingarnir sjálfir litu á það sem var að gerast – hvernig þeir mátu það sem þeir sáu. Þeir sáu sömu aðstæður og hinir sem höfðu jákvæða upplifun. En þessar aðstæður virkuðu ógnandi á þá af einhverjum ástæðum.

Að lokum má ekki gleyma því að nær-dauða-reynsla er aðeins innlit í aðra tilvist – einskonar sýnishorn af dauðanum. Við getum ekki með vissu vitað hvert framhaldið er – sýnin endar þegar viðkomandi snýr aftur til jarðlífsins. Það er eins og ef við myndum millilenda á flugvellinum í París á leiðinni til Ítaliu. Þá gætum við ekki komið heim úr ferðalaginu og sagst hafa ferðast um Frakkland. En við gætum alla vega staðfest það fyrir vinum okkar að Frakkland væri til í raunveruleikanum – þó svo að við hefðum aðeins séð það út um gluggann á flugvélinni stutta stund.

Og svo er það spurningin: Er þetta raunverulegur dauði sem hér hefur verið lýst– ef hægt er að endurlífga hinn látna? Er hann þá látinn? „Hvað er dauði“ - eins og einn vinur minn, læknir og áhugamaður um dulsálarfræði spurði mig að? Eru þessar myndir og lýsingar sem hér hafa verið gerðar að umfjöllunarefni, ef til vill aðeins síðasta skynjun veru sem síðan slokknar algerlega á, eins og efasemdarmenn halda án efa fram? Tölvunnar sem kulnar? Svarið fáum við ef til vill aldrei í þessum heimi.

Ég læt Erlend Haraldsson og Karlis Osis hafa lokaorðið, sem er fengið úr bók þeirra Sýnir á dánarbeði:

Það er hvorki raunsætt né í anda vísindanna að sniðganga slíkar (dulsálfræðilegar) rannsóknir eða láta sem sú vitneskja, sem fengist hefur um þetta efni, sé ekki til. Sérstaklega á þetta við þegar grunur leikur á að niðurstöðurnar bendi til þess að ríkjandi skoðun vísindanna um dauðann sé ekki á rökum reist, og ný þekking kunni því að valda verulegum breytingum á ýmsum sviðum (Sýnir á dánarbeði, Skuggsjá 1979)






15.nóv. 2014 - 08:00 Þórhallur Heimisson

Börn og skilnaður

Því miður er það staðreynd að stór hluti hjónabanda endar með skilnaði, gott ef það á ekki við rúmlega 36% árið 2013.
06.nóv. 2014 - 17:09 Þórhallur Heimisson

Kynlíf: Níu leiðir til aukinnar vellíðunar

Eins og þú efalaust veist af fréttum og ef til vill af eigin reynslu þá veldur kynhvötin oft miklum erfiðleikum hjá okkur nútímamönnunum.  Þrátt fyrir mikla umræðu og framfarir víða um heim eru konur víða beittar kynlífskúgun, kynlífssala og misnotkun er beitt gagnvart börnum, konum og varnarlausum fórnarlömbum, og hættulegir kynsjúkdómar eins og eyðni grassera. Önnur einkenni kynlífsvandans endurspeglast í hómófóbíu ákveðinna hópa samfélagsins (hómófóbía=sjúklegur ótti við samkynhneigða), og ranghugmynda um kynlíf og ást sem glanstímarit, kynlífsblöð og fjölmiðlaiðnaðurinn framleiða til að græða peninga.
31.okt. 2014 - 18:53 Þórhallur Heimisson

Allra sálna og heilagra messa

Þann 1. og 2. nóvember heldur heimskirkjan upp á tvær af sínum stærstu hátíðum, allra heilagra og allra sálna messu. Allra heilagra messa á sér fornar rætur í kirkjunni og ber upp á 1. nóvember ár hvert. Í forn- kirkjunni var snemma tekið upp á þeim sið að koma saman við gröf þeirra sem liðið höfðu píslarvætti fyrir trú sína á dánardægri þeirra. Þar héldu menn vöku og neyttu saman kvöldmáltíðarsakramentisins. Þessar minningarstundir þróuðust síðan yfir í messur helgaðar píslarvottunum sem urðu margir hverjir dýrlingar með tíð og tíma.
21.okt. 2014 - 20:21 Þórhallur Heimisson

Trúarpælingar VI - Inferno/Víti

Samkvæmt latneska texta Postullegu trúarjátningarinnar stendur, að eftir dauða sinn hafi Jesús “descendit ad inferos” sem þýðir beint, “stigið niður til þeirra fyrir neðan”. Gríski textinn, sem er upprunalegastur, segir “katelthonta eis ta katotata”, sem þýðir “til hins neðsta”.
18.okt. 2014 - 17:48 Þórhallur Heimisson

Trúarpælingar V. Krossinn - skuldauppgjör við Guð?

Eitt af því sem við getum verið alveg viss um varðandi Jesú er þetta: Hann var krossfestur, dó á krossi. Um það eru allir á sama máli, lærisveinar hans, kristnar heimildir og andstæðingarnir sem hæddu hann vegna þessa. Jesús var svikinn, dæmdur og tekinn af lífi af mönnum sem óttuðust hann og öfunduðu og töldu að öxin og jörðin myndu geyma hann best – svo notað sé dæmi úr íslenskri sögu. Sjálfur lít ég þannig á að krossfestingin undirstriki að engin kvöl sé svo stór í lífinu að Jesús hafi ekki verið á þeim stað þar sem hún er.
14.okt. 2014 - 10:21 Þórhallur Heimisson

Trúarpælingar IV – Jesús, óskilgetinn!

Um fáar kenningar kirkjunnar hefur verið meira deilt í gegnum tíðina en þá, hvort María móðir Jesú hafi orðið þunguð fyrir heilagan anda, en ekki eftir náttúrulegum leiðum, og hafi síðan fætt son sinn í heiminn, sem er einnig sonur Guðs, verandi enn meyja. Þessi kenning kallast kenningin um meyfæðinguna. Og þó við kristnir menn förum með þessa trúarjátningu í hverri messu “Ég trúi á Jesú Krist, sem getinn er af heilögum anda og fæddur af Maríu mey,” þá eru nú margir sem eru blendnir í trúnni hvað þessa kenningu varðar.
11.okt. 2014 - 13:05

Trúarpælingar III :En hvaðan koma allar þessar sköpunarsögur?

Að Guð skapaði heimsins er ein af grunn trúarstoðum kristninnar, rétt eins og gyðingdóms og íslam. Guð er skapari segir Biblían, Kóraninn og Postullega trúarjátningin.

09.okt. 2014 - 08:00 Þórhallur Heimisson

Trúarpælingar II: Hver er eiginleg þessi Guð, El Sjaddaj, YHWH, Allah, Tortímandi?

Þið sem lásuð síðasta pistil hjá mér tókuð eftir því, að nú er ég farinn af stað með pistlaröð um Trúarjátninguna svokölluðu. Nú er komið að pistli númer tvö. Og þá er spurningin: Hver er eiginlega þessi Guð/ Allah/ Jahve – eða hvað við viljum nú kalla hann/hana?
08.okt. 2014 - 08:46 Þórhallur Heimisson

Trúarjátningarpælingar

Nú verður farið í rannsóknarleiðangur í gegnum hina Postullegu trúarjátningu í nokkrum pistlum.
14.sep. 2014 - 12:30 Þórhallur Heimisson

Kristin talnaspeki: Talan 12

Jæja, þá er ég búinn að vera að pæla í talnaspekinni síðan löngu fyrir gos og allir örugglega löngu orðnir leiðir á þessu – sem á annað borð hafa fylgst með.
07.sep. 2014 - 18:25 Þórhallur Heimisson

Kristin talnaspeki: Talan sjö

Talan sjö er ein helgasta tala fornaldar sem kemur víða við og á sér margar skírskotanir. Upphaflega tengist hún án efa tungldýrkuninni, því tunglmánuðurinn er 28 dagar, eða 4 x sjö dagar, sem gerir töluna fjóra einnig mjög helga. Tunglið var tignað sem móðurgyðjan til forna en sólin var hið karllega eðli alheimsins. Það skýrist af því að tíðahringur kvenna fellur saman við tunglmánuðinn og þess vegna töldu menn þetta tvennt tengjast í tunglgyðjunni. Tunglmánuðurinn gæti síðan hafa verið rótin að skiptingu vikunnar í sjö daga og mánaðarins í fjórar vikur.
03.sep. 2014 - 16:23 Þórhallur Heimisson

Kristin talnaspeki: Tölurnar 6 og 666

Jæja, eftir að hafa eytt allri vikunni í undirbúning að mótmælum gegn nýnasistum þar sem ég bý hér í Svíþjóð, er best að halda àfram með talnaspekina. Nú er komið að tölunni 6 , sem à reyndar vel við hægri öfgamennina sem ég hef glímt við undanfarið.
21.ágú. 2014 - 22:41 Þórhallur Heimisson

Kristin talnaspeki: Talan fjórir

Til forna töldu menn að frumefnin væru fjögur, loft, jörð, vatn og eldur. Þannig fólu þessi frumefni í sér allt eðli heimsins og á tölunni fjórum grundvölluðust öll náttúrulögmálin sögðu fræðimenn fyrri tíma. Jörðin var sögð hafa fjögur horn enda ekki talin kringlótt eins og síðar varð heldur ferhyrnd og þess vegna eru tilgreindar fjórar höfuðáttir á áttavitanum. Og af því að hún var ferhyrnd gátu menn átt á hættu að sigla fram af kantinum og detta niður.
20.ágú. 2014 - 15:25 Þórhallur Heimisson

Kristin talnaspeki: Talan þrír

Allir vita að það er eitthvað sérstakt við töluna „Þrír“.
14.ágú. 2014 - 11:19 Þórhallur Heimisson

Kristin talnaspeki: Talan tveir

Strax í elsta hluta Nýja testamentisins er talað um að Jesús sé ekki aðeins maður sem hlotið hefur titilinn Kristur eða Messías, heldur sé hann einnig Drottinn.
11.ágú. 2014 - 11:52 Þórhallur Heimisson

Kristin talnaspeki: Talan einn

Orðið Guð er í kristinni merkingu nafnorð þegar það er notað um hinn eina Guð og þar með skrifað með stórum staf. Hið sama gildir hjá gyðingum og múslímum. Það verður “Guð” hjá kristnum, “YHWH” hjá gyðingum og “Allah” hjá múslímum.
07.ágú. 2014 - 18:02 Þórhallur Heimisson

„Kristin talnaspeki: Inngangur, talan núll“

Nú reka margir lesendur án efa upp stór augu þegar þeir lesa þessa fyrirsögn. Talnaspeki, sem er þýðing á enska hugtakinu numerology, er yfirleitt talin tengjast dulspeki, galdri og öðrum fyrirbærum sem varla geta talist kristin.
30.júl. 2014 - 11:23 Þórhallur Heimisson

Hjónaband og hamingjan

Allir vilja verða hamingjusamir. Hamingjan er reyndar fyrirbæri sem erfitt er að skilgreina, því hver og einn hefur sína skoðun á því hvað hamingja sé. Þó er hægt að vera nokkuð viss um það, að allir sem ganga í hjónaband gera það í þeirri trú og von að hamingjan sé þeirra. Hver og einn bindur miklar vonir við hjónabandið. Og þegar allt gengur upp þá rætast margir af draumunum sem tengdust ástinni er leiddi makana í hjónaband. Því auðvitað er það ástin sem ræður ferðinni þegar par ákveður að gifta sig.
21.júl. 2014 - 10:32 Þórhallur Heimisson

Stund úlfsins

Það er einhvernvegin ekki sérstaklega bjargarlegt í henni veröld í dag. Fréttirnar af glæpsamlegri eldflaugaárás rússneskra hermanna á farþegaflugvél í millilandaflugi og fjöldamorð þeirra á saklausum  farþegum toppar vissulega fréttir sumarsins. En vart má á milli sjá hvor glæpaklíkan er verri, morðingjarnir í Rússlandi og austur- Úkraínu, eða morðingjarnir í Ísrael.
17.jún. 2014 - 11:50 Þórhallur Heimisson

17. Júní - íslenski fáninn

Við Norðurlandaþjóðirnar eigum margt sameiginlegt, saga landanna er á margan hátt tengd og menning sömuleiðis. Enda er það oft þannig að þeir sem eru frá landsvæðum utan Norðurlandanna líta á Norðurlöndin sem eina heild. Eitt af því sem einkennir Norðurlöndin og undirstrikar sameiginlega menningu eru fánarnir okkar. Yfir öllum Norðurlöndum nema Grænlandi blakir krossfáninn. En krossfáninn okkar, íslenski fáninn, á afmæli í þann 19. júní.

Þórhallur Heimisson
Þórhallur Heimisson er fæddur 30.07.61. Hann starfar sem kirkjuhirðir hjà sænsku kirkjunni í Falun. Hann var um àrabil prestur og sóknarprestur í Hafnarfjarðarkirkju en hefur auk þess annast hjónaráðgjöf, gefið út bækur um trúmál, hjónaband og sambúð og sagnfræði, ritað pistla, gert útvarpsþætti, kennt í KHÍ og HÍ og verið leiðsögumaður í Rómarferðum.
Vilhjálmur Birgisson
Vilhjálmur Birgisson - 10.11.2014
Betra en maður þorði að vona
Þórhallur Heimisson
Þórhallur Heimisson - 06.11.2014
Kynlíf: Níu leiðir til aukinnar vellíðunar
Einar Kárason
Einar Kárason - 11.11.2014
Stóra hyskismálið
Einar Kárason
Einar Kárason - 09.11.2014
Hugsað til Garðars skipstjóra
Hannes Hólmsteinn Gissurarson
Hannes Hólmsteinn Gissurarson - 10.11.2014
Sýnishorn af skrifum Þjóðviljans um Berlínarmúrinn
Sigurður G. Guðjónsson
Sigurður G. Guðjónsson - 14.11.2014
Las sjálfsævisögu Reynis Traustasonar
Vilhjálmur Birgisson
Vilhjálmur Birgisson - 19.11.2014
Lítilmannlegt
Brynjar Nielsson
Brynjar Nielsson - 13.11.2014
Skoðun mín hefur ekki breyst
Hermann Jónsson
Hermann Jónsson - 18.11.2014
Er einelti foreldravandamál?
Þórhallur Heimisson
Þórhallur Heimisson - 15.11.2014
Börn og skilnaður
Kolbrún Baldursdóttir
Kolbrún Baldursdóttir - 07.11.2014
Hvar stöndum við í eineltismálunum?
Hildur Eir Bolladóttir
Hildur Eir Bolladóttir - 18.11.2014
Að vera tapari á Íslandi
Hannes Hólmsteinn Gissurarson
Hannes Hólmsteinn Gissurarson - 09.11.2014
Aldarfjórðungur frá falli kommúnismans
Fleiri pressupennar