Hlöðuball Klaufa í miðri borg vakti verðskuldaða heimsathygli

Við Íslendingar erum duglegir við að koma okkur á heimskortið, enda minnsta stórþjóð heims og orðtakið „miðað við höfðatölu“ er okkur tamt að læra líkt og að lesa og skrifa.

Kántrýsveitin Klaufar hélt á dögunum hlöðuball innan um alla trafíkina í Kópavoginum þar sem sveitamenningunni var troðið í stórborgina við gríðarlegan fögnuð viðstaddra.

Kántrítónlistin er okkur Íslendingum ekki í blóð borin og hafa ljósvakarmiðlar verið tregir við að hleypa þessari tegund tónlistar í sitt loft með þeim afleiðingum að miklir fordómar hafa skapast gagnvart kántrítónlist og hefur hún hingað til þótt hallærisleg og að þeir sem hana stundi hljóti að vera illa gefnir. Þetta er vanviska á hæsta plani.

Þeir sem koma með slíkar fullyrðingar átta sig sjálfsagt ekki á því að söngvarar á borð við Björgvin Halldórsson, Geirmund Valtýsson, Helga Björnsson og KK eru allir kántrísöngvarar.

Það sannast með tilkomu kántrýsveitarinnar Klaufa að nú er nýtt tímabil í uppsiglingu, Kántrítímabilið, því þeim hefur tekist að taka áhrifin frá Nashville, mekka kántrísins inn í íslenska tónlistarmenningu og smekklega setja víkingablæ í tónlist sína, þannig að útkoman er séríslensk en um leið alamerísk.

Um 500 manns sóttu hlöðuballið á skemmtistaðnum SPOT og fóru allir brosandi út og höfðu dyraverðir staðarins orð á því að sjaldan hafi ball verið svo vel sótt um leið og engin slagsmál eða stimpingar hafi brotist út allt kvöldið. Kántrítónlistinni fylgir nefnilega gleði, hamingja og vinátta. Má því með sanni segja að áhugi á kántrí sé hollur fyrir líkama og sál.

Klaufarnir Birgir Nielsen, Guðmundur Annas Árnason, Friðrik Sturluson, Kristján Grétarsson og fetilgítarundrið Sigurgeir Sigmundsson gáfu nýverið frá sér nýja smáskífu, Ást og Áfengi og viti menn, það fór rakleiðis á „playlista“ útvarpsstöðvanna.

Það segir okkur aðeins eitt. Klaufar eru að bjarga kántrítónlistinni með því að gera hana nýstárlega og höfða til allra aldurshópa en um leið halda í aldagamla uppskrift gamla kántrísins.

Gárungar í Nashville sýndu hlöðuballinu mikinn áhuga og var þessi viðburður ekki lengi að fréttast vestur um haf en flestir sem sáu atburðinn auglýstan trúðu ekki að þetta væri hægt og ætla þessir vösku drengir, Klaufarnir okkar að halda út í heim á nýju ári með glænýja plötu og vitja örlaga sinna, örlaga íslenska kúrekans.

Nashville söngkonan Kelcy Lee, sem hefur skotist upp á stjörnuhiminn kántrítónlistarinnar á methraða hafði orð á því við umboðsmann kántrýsveitarinnar að Nashville væri svo sannarlega opin fyrir nýjungum og svona band ætti heima á meðal þeirra bestu. Má því með sanni segja að framtíðin sé björt hjá Kántrýsveitinni Klaufum.

Tökum hattinn ofan fyrir Klaufum, bjargvættum íslenska kántrísins.

Hér fyrir neðan má heyra nýja lagið frá Klaufum, Ást og Áfengi og bendi ég kántríaðdáendum á heimasíðu þeirra Klaufa á facebook hér.