Skammastu þín Sigrún!

Þú átt aldrei eftir að finna þér karlmann! Getty Images

Ég hef verið skömmuð svolítið undanfarið.  Einn sendi mér póst og sagði mér að ég hafi verið vond við karlmenn með lélega sjálfsmynd í pistlinum Strákar, engan svona aumingjaskap!  Þar tala ég um höfnun og hegðun sumra karlmanna þegar þeir koma svona fram.  Þetta var kannski full sterkt til orða tekið hjá mér, það var alls ekki ætlunin að gera lítið úr veikleika manna.  En mér finnst samt að menn sem eru komnir yfir þrítugt eigi að vera orðnir nógu þroskaðir til að átta sig á því að léleg sjálfsmynd er sjálfseyðandi og að ef þeir hafa eitthvað vit í kollinum að þá leiti þeir leiða til að lagfæra það.  Sjálfs síns vegna, það er ömurlegt að lifa lífi sínu í fangelsi í sínu eigin sjálfi.  Þeir sem ekki hafa tök á því að takast á við þetta vandamál, sama hver ástæðan er, eru hreinlega ekki þannig staddir andlega að heilbrigðar konur hefðu áhuga á að stofna til náinna kynna við þá.

Átt aldrei eftir að finna þér karlmann

Annar sagði mér að enginn karlmaður myndi vilja deita mig og eiga á hættu að enda sem saga á bloggi daginn eftir.  Að ég myndi aldrei finna mér karlmann.  Hann var reyndar „svolítið“ fullur en fólk segir oft það sem í brjósti þeirra býr þegar það er undir áhrifum áfengis svo ég ætla að ganga út frá því að hann hafi verið að meina það sem hann sagði.  Bar hann mig saman við aðrar konur sem skrifa svipaða pistla á öðrum miðlum og tjá sig mjög frjálslega um karlmenn sem þær hafa kynnst. 

Ég verð samt að standa með sannfæringu minni í þessu máli, ég get ekki skrifað um annað en reynslu mína, bæði persónulega og í gegnum vinkonur mínar og aðrar konur sem ég þekki.  Annars væri ég bara að bulla og þá gæti ég alveg eins sleppt þessu.  Hinsvegar passa ég mig á því að virða einkalíf fólks og þeirra persónu og breyti öllum atriðum sem gætu leitt til þess að viðkomandi þekkist.  Og ég tala ekki niðrandi til fólks, hvorki til einstakra manna né almennt.  Ef einhver telur sig hafa lesið eitthvað slíkt út úr orðum mínum, þá biðst ég afsökunar, það er alls ekki meiningin. 

Brennd af neikvæðri reynslu?

Enn annar skammaði mig svo fyrir að gera lítið úr karlmönnum, sagði það skína í gegnum alla mína pistla að ég væri brennd af neikvæðri reynslu og að ég ætti að opna huga minn fyrir því að það væri til fullt af almennilegum karlmönnum.  Honum finnst ég setja konur á stall og karla í svaðið með skrifum mínum.  Við hann, og ykkur sem eruð á sama máli, verð ég að segja:  Hættið að reyna að lesa á milli línanna og lesið orðin sjálf sem ég skrifa.  Það sem ég segi er nákvæmlega það sem ég meina, þið eruð að sóa orku í að reyna að sálgreina mig með því að reyna að finna duldar merkingar orða minna.  Hinsvegar gagnrýni ég hiklaust neikvæða hegðun sem ég upplifi oft og verður hver að taka það til sín sem á. 

Mér fannst þessi gagnrýni reyndar mest óverðskulduð því ég er ekki einungis minnst fordómafulla manneskja sem þið gætuð kynnst heldur fæ ég oft skammir frá vinkonum mínum fyrir að sýna karlmönnum of mikinn skilning.  Þar að auki kemur hún frá manni sem ég hef kynnst ágætlega og varð fyrir vonbrigðum með að hann skyldi lesa mig svona vitlaust.  Auðvitað hef ég kynnst mínum skerfi af lélegum mönnum sem koma illa fram við konur en ég hef líka kynnst miklu fleiri mönnum sem eru almennilegir og koma vel fram við sína konu.  Menn eru eins misjafnir og þeir eru margir og mér dettur ekki í hug að setja alla undir einn hatt bara vegna þess að einhverjir nokkrir hafa komið illa fram við mig.   

Konur eru ekki betri en karlar

Þó ég sé sjálf kona þá er ég ekki rauðsokka og ég styð ekki konur einungis vegna þess að þær eru konur.  Neikvæð hegðun er neikvæð hegðun, hvort sem það eru konur eða karlar sem í hlut eiga.  Ég hlífi ekki vinkonum mínum þegar ég tel þær koma illa fram við sína menn og ef mér finnst þær vera að fara yfir strikið þá læt ég þær heyra það.  Hinsvegar er öll mín reynsla bundin mínu kyni, ég er ekki að deita konur, ég hef enga reynslu í þeim efnum til að byggja á og skrifa um.  En ég hef skrifað örfáa pistla um neikvæða hegðun kvenna (sá nýjasti; Hvað kosta íslenskar konur?) eða komið eitthvað inná það í öðrum pistlum.  Ég hef líka bent konum á að líta í eigin barm og skoða eigin hegðun þegar þær eru að kvarta yfir öllum þessum „skíthælum“ sem þær segja karlmenn vera.

Það er þó augljóst að þið sem gagnrýnduð mig þekkið ykkur í þessum pistli, ef þið lesið hann, enda er það líka allt í lagi.  Ég er ekki að nafngreina ykkur né að gera lítið úr ykkur eða ykkar skoðunum.  Ég er einungis að bregðast við orðum ykkar og svara gagnrýninni og þið hljótið að geta staðið undir því sem þið sögðuð.  Ef þið meintuð það.