Spegill, spegill herm þú mér

Hvað sjá konur þegar þær líta í spegil?

Hvernig lítur sjálfsmyndin út sem svamlar í gráa efninu?

Sérðu hnausþykk læri í gallabuxunum og breiða kálfa í nýjustu stígvélatískunni?

Rassinn alltof suðlægur og mittið eins og símastaur?

Múffutoppur yfir gallabuxnastrengnum?

Verkamannahendur og þvottur ofan á þvottabrettinu?

Aumingja með enga sjálfsstjórn sem datt í súkkulaðirúsínupakkann á þriðjudaginn?

Með samviskubit í ræktinni því það tekur tíma frá fjölskyldunni,
Samviskubit yfir að vinna yfirvinnu og missa af æfingu.
Samviskubit yfir að setja ungann í barnapössunina meðan hamagangur er tekinn eftir vinnu.


Við konur erum áskrifendur að samviskubiti, með FIMM háskólagráður í sjálfsniðurrifi og fremjum slík hryðjuverk á sjálfsmyndinni að Hamas liðar myndu ráða okkur á staðnum.

Við sjáum ekki hrausta konu sem rífur í járn til jafns við drengina, pumpar armbeygjur án þess að blikka auga og sprettar úr spori eins og sléttuúlfur.

Við hugsum ekki um okkur sem kjarnakvendi sem spígsporar hnarreist og sprengfull af sjálfstrausti um lyftingasalinn með sigg í lófum og svita í brók eftir erfiðið?

Hraust og sterk valkyrja sem beygir eins og berserkur, deddar af offorsi og slítur upp járnið í bekknum rymjandi eins og rostungur.


Konu sem þrátt fyrir annir í vinnu og heimili hugsar um mataræðið og gúllar hollustu mest allan tímann með nokkur súkkulaðidansspor og flatbökur tilbúnar á hliðarlínunni til að næra púkann og viðurkennir hann sem hluta af sjálfinu.

Að vera heilbrigð og hraust er ekki nógu gott. 

Það þarf að öfundast útí náungann “af því hún getur borðað nammi alla daga og samt verið mjó.”

Hvað er öfundsvert við að gúffa í sig óhollustu sjö daga vikunnar og stuðla að hærri blóðsykri, blóðfitu og kólesteróli?

Hvað er eiginlega öfundsvert við að vera "mjór"?

Grannur að utan er svo langt frá að vera hraustur að innan.

Í mörgum tilfellum eru hinir grönnu í lélegu líkamlegu formi því það vantar holdarfarið sem ytri hvata og drífur marga áfram til að valhoppa í lífsstílnum.

 

Af hverju hanga væntingar og draumar kvenna um sjálfsmyndina eins og gínur á húsþökum hjá félögum Nýdönskum.

Jafn óraunhæfar og fjarlægar og styrking íslenskrar krónu.


Skilaboðin sem dynja á kvinnum samtímans eru að þær eigi að vera innankroppuð hræ sem sötra græna djúsa til að dítoxa öllu sem nokkurn tíma hefur runnið ofan í kokið.

Þú átt að vera komin aftur í brækur númer núll sautján tímum eftir barnsburð.
Þú átt að missa 10 kíló á tveimur vikum, annars ertu ekki verðug í samfélagi mannanna.
Læri mega ekki snertast við göngu, armar líkjast ofelduðu spaghetti og rifbein talin aftan frá.

Þér skuluð algjört fráhald dýrka frá súkkulaði, kökum, snúðum, glúteini, mjólk, kartöflum, rauðu kjöti, brauði, hvítu hveiti, sykri, því slíkt er afkvæmi undirheimaguðsins.
Þú skalt ganga um með innantóm sultaraugu eftir fleiri vikur af prótínkúr, djúsasötri, kolvetnasvelti og duftslafri því matvælin sem eru “leyfileg” má telja á fingrum annarar.

Væskilslegur horaður skrokkur innanétinn af sulti, fóðraður á duftpillum og fljótandi fæði er jafn öflugur í ræktinni og þriggja daga gömul borðtuska.  

KONA! Girtu þig í brók, snýttu samviskubitinu útum nösina, veiddu sjálfsmyndina upp úr tojlettinu og skoðaðu naflann á þér.

Sterkir rassvöðvar hjálpa þér að rífa upp réttstöðuna.
Þeir komast ekki fyrir í örþunnum pönnukökurassi.

Það þarf þykk læri til að beygja eins og skepna. Vannærð fyrirsætulæri skjálfa undir stönginni.


Breiðar hendur slíta upp þyngdirnar í bekknum.

Stórar axlir pressað meira.

Þykkir kálfar spæna upp sprettina.



Þú ert að byggja upp þinn besta líkama, ekki besta líkama jarðkúlunnar.
Þinn besti líkami getur aldrei passað í piparkökuform útlitsbrenglaðra horrenglumiðlanna… né ætti það nokkurn tíma að vera markmiðið.