01. feb. 2012 - 11:00Róbert Trausti Árnason
Einhversstaðar verður maður að byrja þegar óþægilegar staðreyndir eru skoðaðar. Ekki er sjálfgefið að smáþjóðin Ísland geti öllu lengur staðið á eigin fótum.
Og ljóst er að ekki þarf mikið að breytast í kringum okkur til þess að tilraunin um frjálst og fullvalda Ísland sem hófst 1944 fari út um þúfur.
Gott samband við nágranna er okkur nauðsynlegt til að lifa sem þjóð á sama tíma og við erum varnarlítil gegn erlendum yfirgangi, áhrifum og breytingum.
Smæðina verður að taka alvarleg þegar rætt er um þjóðaröryggi. Smæð okkar er staðreynd. Óþægileg staðreynd satt best að segja því miklar takmarkanir felast í smæðinni.
Umræða um þjóðaröryggi verður að taka mið af þessari óumflýjanlegu staðreynd.
Ísland er og verður veikburða vegna fámennis og takmarkaðra möguleika á sérhæfingu.
Íslendingar verða svo lengi sem þeir vilja vera sjálfstæðir og fullvalda að takast á við þá spurningu hvaða þjónustu ríkið megnar að veita og hvaða þjónustu sækja verður annað.
Ísland getur ekki byggt upp hervarnir svipaðar þeim sem gerast með stærri þjóðum og því ekki haldið uppi sömu varnarstarsfssemi og þær þjóðir.
Augljósasti þátturinn sem við höfum látið öðrum þjóðum eftir til að sinna fyrir okkur er þjóðaröryggið.
Þjóðaröryggi er því málefni sem rétt er að íslensk stjórnvöld hafi sem reglubundið viðfangsefni.
Í heimi hraðfara breytinga, alþjóðavæðingar og hraðstígra tækniframfari í hernaði er slíkt reglubundið
verkefni nauðsynlegt sem hluti af ábyrgð stjórnvalda.
Þó er væntingin um þjóðarsátt um öryggis- og varnarmál tálsýn. Gleymum því ekki.
Nú á þingmannanefnd að móta tillögur um þjóðaröryggsistefnu á grundvelli íslenska her- og vopnleysisins.
Og nefndin á að taka mið af ýmsu sem tilheyrir gærdeginum, ef svo má segja, við að skilgreina meginforsendur þjóðaröryggisstefnunnar í næstu framtíð og greina markmið og leiðir til þess að ná þeim meginforsendum.
Réttast er að byrja á smæðinni. Við getum aldrei hegðað okkur eins og stórþjóðir.
Ég fullyrði á Ísland hefur sjaldan staðið á vandasamari tímamótum.
Þingmannanefndin á því að móta tillögur um þjóðaröryggisstefnu á grundvelli smæðarinnar.
Ekki á grundvelli her- og vopnleysisins.