Hvers konar skepna er ríkið?

Sá valdsmaður á Íslandi sem vill blekkja kjósendur finnur alltaf skara af mannskap sem vill láta blekkjast.  Því er aldrei skortur á auðtrúa kjósendum sem gína við agni.  Blekkingar valdsmannsins bera alltaf tilætlaðan árangur því hann gjörþekkir þessa hlið mannlífsins.  Ég veit að þeim mönnum farnast jafnan best í skammann tíma í íslenskri pólitík sem fara að dæmi bæði refsins og ljónsins og kunna að breiða yfir flærð sína með leikni í lymskulegri hræsni og djörfu falsi.  

Ég sé að forsætisráðherrann hefur tileinkað sér hegðun annars dýrsins.  Forsætisráðherrann  hefur ekkert lært af refnum en allt lært af ljóninu.  Forsætisráðherrann hefur ljónið eitt að fyrirmynd og hann skortir því hyggindi.  Af þessu leiðir að forsætisráðherrann má ekki og mun ekki halda orð sín af því það er honum í óhag og hann gefur sér auðvitað við sérhvert tækifæri einhverja afsökun til að hann þurfi ekki að standa  við orð sín eins og þá afsökun að brott séu fallnar allar ástæður þess að hann gaf heit sín.  Ég get nefnt ótal dæmi sem sýna að margir samningar og mörg heit hafa verið þverbrotin af hálfu forsætisráðherrans.  

Ég er sammála þeim sem segja að það sé lofsvert ef forsætisráðherrann heldur vel heit sín og er hreinskiptinn en ekki undirförull.  Samt er það svo að reynslan sýnir okkur að  sá forsætisráðherra sem kemur engu til leiðar er einmitt sá hinn sami og metur einskis gefin loforð, kann að vefja öðrum um fingur sér og er ofjarl allra þeirra sem virða lögin og leikreglurnar.  Forsætisráðherrann lætur svo ráðgjafa og smjaðrara finna lögmætar aðferðir til að fegra bresti sín.  

Það er mér því augljóst að í huga forsætisráðherrans er aðeins um tvennt að ræða í stjórnmálabaráttu líðandi stundar á Íslandi.  Annað hvort að láta lögin ráða eða nakið valdið ráða!  Hefur ekki forsætisráðherrann valið síðari kostinn?