28. ágú. 2017 - 09:05Kristinn Rúnar Kristinsson

Lífið á geðdeild á Íslandi árið 2017

Sumarið hefur verið viðburðarríkt hjá mér; ég tek við mér á sumrin. Veðurfars- og birtuskilyrðin á Íslandi henta mér skelfilega verandi með geðhvörf. Þunglyndur á veturna og manískur á sumrin. Ég þyngist andlega þegar það dimmir og frystir í nóvember og desember og tek svo við mér þegar vorar og flýg með reglulegu millibili hátt upp milli júní-ágúst. Ég þarf að búa erlendis í hita og birtu á meðan vetrardekkin eru á bílunum hérna heima, frá október-apríl og venjast veðurfarinu. Mér á að geta liðið eðlilega og vel allan ársins hring í bland við rétt lyf.

Ég greindist með geðhvörf árið 2009, tvítugur að aldri. Í sumar upplifði ég mína fjórðu maníu og af virðingu og væntumþykju við fjölskyldu mína lagðist ég tvisvar sinnum inn á bráðageðdeild 32 C við Hringbraut. Ég er nýútskrifaður af opinni deild 33 C og líður vel. Fjölskyldan mín var að fara á límíngunum - eins og Gaupi myndi orða það, yfir mínum plönum og hröðu hugsunum. Ég er búinn að segja þeim að þau verði að bíta á jaxlinn og slaka á þegar ég fer upp en það er því miður hægara sagt en gert.

Eins og ég hef skrifað um áður er geðheilbrigðiskerfið okkar meingallað en samt sem áður eru flestir að reyna sitt besta. Ég myndi segja að 70% starfsmanna geðdeildanna séu góðir starfsmenn, aðrir þurfa að hugsa sinn gang og sér til hreyfings. Sumir læknar eru eingöngu bókaklárt fólk sem kunna ekki mannleg samskipti og dæla bara sterkum geðlyfjum í fólkið. Margir starfsmenn hafa unnið þarna inni í mörg ár, undir miklu álagi á undirmönnuðum deildunum. Þau vinna margar yfirvinnuvaktir, því fólki ber að hrósa; þau vilja raunverulega hjálpa fólki. Hins vegar er svo mikil peningavöntun inn í kerfið að ég get ekki gert fólki grein fyrir því í rituðu máli, það þarf að upplifa það til þess að raunverulega trúa því.

Eins og staðan er núna á bráðageðdeildinni, 32 C, þá er fólk sem með m.a. með geðhvörf og geðklofa að fljúga hátt upp í maníu og á meðan eru bullandi framkvæmdir beint fyrir utan gluggana hjá einstaklingum sem eru á deildinni, líka um helgar! Starfsfólkið undir miklu álagi, garðurinn úti fullur af verkfærum og vinnumönnum og þar að leiðandi ekki hægt að fara út í ferskt loft - eina fríska loftið sem er í boði fyrir fólkið, þetta er langt frá því að standast nokkrar kröfur. Það er verið að físa af steypuna fyrir utan því húsið er ónýtt og öll háværustu tækin í notkun. Af hverju í ósköpunum er þetta gert þegar álagið er sem mest á deildinni?

Af hverju er þetta t.d. ekki gert í apríl?

Það er ekki spáð neitt í hlutina þarna. Af hverju er ekki gert plan b á undan plan a með að fólkið fái að fara í frískt loft? Af hverju er ekki hringstigi á svölunum svo fólk geti farið niður í garðinn en ekki alltaf í fylgd með tveimur starfsmönnum eins og þau séu morðingjar?

Það þarf svo ótrúlega margt að gerast í þessu meingallaða geðheilbrigðiskerfi okkar. Maturinn er síðan vægast sagt vondur, önnur hver máltíð eru soðnar dúnmjúkar fiskibollur eða 1/4 fiskiflak.

Ég er búinn að senda tölvupóst á Óttarr Proppé heilbrigðisráðherra og gera honum grein fyrir alvarleika málsins; ef hann er ekki nú þegar búinn að átta sig á því. Ég hef alltaf fílað Óttarr en hann þarf að fara að stíga upp núna og sýna úr hverju hann er gerður. Það hafa tveir einstaklingar á síðustu tveimur vikum fyrirfarið sér inn á geðdeildunum á Hringbrautinni. Hvað þarf í alvörunni að gerast meira svo menn í ríkissjórninni fari að hysja upp um sig buxurnar og setja pening í geðheilbrigðiskerfið okkar?

Bjarni, Benedikt, Óttarr - farið að setja penning í þetta batterí, þið getið ekki beðið lengur með þetta. Þið bara getið það ekki.

Eitt enn - á geðdeildunum eru stanslausir hurðaskellir og starfsmenn að opna hurðar með lyklum hátt í 50 sinnum á vakt, ég myndi vilja sjá alla starfsmenn með kortaskynjara og síðan vera með dempara á hurðunum þannig að þær lokist rólega eins og þekkist í löndum sem eru mörgum skrefum á undan okkur í þessum málum, t.d. Danmörk. Fólk á deildunum er stanslaust að bregða vegna hurðaskella þegar þau eiga að vera að ná ró og varnarteymið svokallaða sífellt að koma hlaupandi inn því fólk er að ærast yfir súrefnisleysi og innilokunarkennd. Nauðungarvistun er ólögleg en samt er henni beitt nokkrum sinnum í viku á einstaklinga - ótrúlegt.

Ég ætla að halda áfram að vera bjartsýnn á betri tíma, vonin deyr aldrei en stjórnvöld eru virkilega að gera okkur öllum erfitt fyrir með seinagangnum í þessum efnum. Koma svo!

www.kristinnrunar.is




10.ágú. 2017 - 09:15 Kristinn Rúnar Kristinsson

Spá mín um lífið á Íslandi næstu mánuðina, enska boltann og Euro jackpot á föstudaginn

Ég ætla að taka mér það bessaleyfi að henda í spá hvernig ég sé lífið á Íslandi næstu mánuðina og einnig enska boltann þvi hann er að byrja um helgina. Að lokum nefni ég aðeins Euro jackpot. Veðurfræðingar hafa vægast sagt verið í sultunni undanfarið að reyna að spá fyrir um og oft á tíðum haft kolrangt fyrir sér, málurum og múrururum aðallega til mikillar gremju.
24.maí 2017 - 12:00 Kristinn Rúnar Kristinsson

Mjög takmörkuð öryggisgæsla á Rammstein tónleikunum

Mér, rétt eins og öllum Íslendingum brá mikið við að heyra af hryðjuverkaárásunum í Manchester á mánudagskvöld. Þetta er svo nálægt okkur og fjölmargir heimsótt borgina, þ.m.t. ég sjálfur nokkrum sinnum. Virkilega óhugnaleg árás sem sýnir illsku í heiminum blákalt. Það sem ég hugsaði strax voru Rammstein tónleikarnir sem ég sótti á laugardaginn, ekki nema u.þ.b. 1600 km frá Manchester-borg.
15.maí 2017 - 08:41 Kristinn Rúnar Kristinsson

Eru geðsjúkdómar galli í genum fólks eða frávik frá norminu?

Ég hef mikið velt því fyrir mér í gegnum tíðina af hverju fólk er með geðsjúkdóma. Hvað það er sem valdi þeim og einnig hvort það sé rétt að flokka suma þeirra sem sjúkdóma. Er þetta galli í genum fólks eða einfaldlega frávik frá norminu, það er eitthvað sem hefur aldrei fengist afgerandi svör við. Hversu mikið eru erfðir, hversu mikið spila umhverfisþættir inn í og af hverju þetta stafar.
02.maí 2017 - 09:06 Kristinn Rúnar Kristinsson

Málþing Geðhjálpar 4.maí í HR - Mannamunur í mannréttindum

Ég mun stíga á svið kl. 17:15 og vera með 15 mínútna erindi um upplifun mína á því að hafa verið nauðungarvistaður á geðdeild þrisvar sinnum og hvernig meðferðin inni á spítalanum er. Markmiðið er að fá Sigríði Á. Andersen, dómsmálaráðherra, til þess að endurskoða lögin um nauðungarvistun og breyta þeim. Nauðungarvistun er alltof oft beitt á fólk með geðsjúkdóma án þess að tilefni sé til þess.
07.mar. 2017 - 20:00 Kristinn Rúnar Kristinsson

Fólk þarf iðulega að hafa reynt sjálfsvíg eða vera með sýnilegan sjálfsskaða til að fá innlögn á geðdeild

Ég fagna því gríðarlega að síðustu daga hefur fólk stigið fram og deilt upplifun sinni af geðdeildum landsins. Umræða sem er svo nauðsynleg, sérstaklega núna þegar kerfið okkar er eins gallað og það er og geðheilbrigðismál svelt.

09.des. 2016 - 12:00 Kristinn Rúnar Kristinsson

Hemmi Gunn hefði orðið sjötugur í dag- Best of syrpa til minningar um snilling

Hermann Gunnarsson hefði orðið sjötugur í dag, 9. desember. Ég ætla ekki að skrifa minningarpistil um hann því það er óþarfi á þessum tímapunkti að mínu mati, flestir vita að mörgu leyti hvernig ferill og líf hans var.

30.nóv. 2016 - 11:55 Kristinn Rúnar Kristinsson

Raflostmeðferð er mjög vanmetin

Ég hef farið tvisvar sinnum í raflostmeðferð, 2011 og 2015. Þessi meðferð á rætur sínar að rekja til 4. áratugs 20. aldar og var mikið notuð á fólk með geðklofa og aðra geðsjúkdóma. Eftir að geðlyf hösluðu sér völl á 6. áratugnum minnkaði þörfin á raflækningum og er í dag notað í alvarlegum þunglyndistilvikum og þegar lyf eru ekki að svara nægilega vel.

07.nóv. 2016 - 10:30 Kristinn Rúnar Kristinsson

95% nemenda í tíunda bekk vita ekki hvað geðhvörf eru

Frá því að ég hóf verkefnið mitt, „Vitundarvakning um geðsjúkdóma“ þann 15. febrúar sl. hef ég haldið 18 fyrirlestra fyrir nemendur í tíunda bekk og einnig nokkra fyrir fyrirtæki. Þegar ég hélt minn fyrsta fyrirlestur í gamla grunnskólanum mínum, Kópavogsskóla, vissi ég ekki hver þekking nemenda á geðsjúkdómum væri. Hafði orðið einhver breyting síðan ég útskrifaðist úr grunnskóla árið 2005?

24.okt. 2016 - 20:00 Kristinn Rúnar Kristinsson

Þegar ég var sprautaður niður með valdi á bráðageðdeild Landspítalans

Ég skrifaði pistil um geðdeildirnar og starfsfólkið þar í mars sl. á minni persónulegu fésbókarsíðu sem var síðan líka birt á DV. Það var heldur of mikil reiði í mér þá en samt sem áður gott að koma því frá sér. Mér fannst hallað á mig og fleira fólk sem hefur verið inni á deildunum en það er aldrei gott að skrifa þegar maður er reiður. Ég skynjaði samt sem áður almenna ánægju meðal manna að ég væri að hrista aðeins upp í kerfinu og nokkrir sendu mér persónuleg skilaboð og deildu með mér reynslu sinni.

18.okt. 2016 - 09:18 Kristinn Rúnar Kristinsson

Tilviljanir, örlög og bróðurmissir

Mig langar að skrifa um tilviljanir, örlög og bróður minn heitinn. Það veldur mér alltaf vonbrigðum þegar fólk talar um tilviljanir, en áttar sig ekki á því að um örlög er að ræða. Hér er eitt dæmi sem maður hefur heyrt í gegnum tíðina.

12.okt. 2016 - 10:59 Kristinn Rúnar Kristinsson

Hress í augum Íslendinga - Alvarlegur í augum Mexíkóa

Ég ætla að rifja upp Mexíkódvöl mína, af því ég hef aldrei tekið þá ferð saman og líka til að gefa fólki betri innsýn hvernig það er að vera öðruvísi einstaklingur í framandi landi að gera eitthvað nýtt og spennandi.

25.júl. 2016 - 19:00 Kristinn Rúnar Kristinsson

Geðhvörfin bundu enda á drauma mína um atvinnumennsku

Ég hef ákveðið að skrifa um minn íþróttaferil því ég finn að það er að verða vitundarvakning um andleg veikindi í landinu og fleiri eru að stíga fram sem mér finnst algjörlega frábært. Ég vona að enn fleiri stígi fram í kjölfarið. Margir hafa eflaust spurt sig af hverju hinir og þessir náðu ekki lengra í íþróttinni sinni. Ég er nokkuð viss um andleg veikindi spili þar oft á tíðum stóra rullu. Það var allavega þannig hjá mér. Það er hægt að gera svo miklu miklu betur innan íþróttahreyfingarinnar að vinna með fólki sem finnur til andlegra veikinda sem byrjar oft þegar það er á unglingsaldri. Það er viðkvæmur aldur og ég upplifði ekki nægilega þekkingu í þessum efnum frá mínum liðum þegar ég var að byrja að veikjast og missa mína getu bæði í fótbolta og körfubolta.


Kristinn Rúnar Kristinsson
Kristinn Rúnar Kristinsson fæddist í Kópavogi árið 1989, hann lauk stúdentsprófi frá Menntaskólanum í Kópavogi 2013. Á síðustu þremur árum hefur hann verið ötull baráttumaður um vitundarvakningu í landinu um geðsjúkdóma eða síðan hann opnaði sig um veikindi sín árið 2014, en hann greindist með geðhvörf tvítugur að aldri.

Kristinn hóf verkefnið sitt, Vitundarvakning um geðsjúkdóma, hinn 15. febrúar 2016 og er m.a. að fara í 10. bekki grunnskóla á höfuðborgarsvæðinu að fræða nemendur um geðhvörf með fyrirlestrum.

Netfang: bipolarisland@gmail.com.

Heimasíða: www.kristinnrunar.is

Híbýli fasteignasala KOSTANDI
Pressupennar
5 nýjustu