18. nóv. 2017 - 12:00Kristinn H. Gunnarsson

Uppreist æra í stað siðbótar

Ákvörðun Vinstri hreyfingarinnar, græns framboðs um stjórnarsamstarf með Sjálfstæðisflokki reisir æru  formanns Sjálfstæðisflokksins upp frá dauðum og frestar um sinn óhjákvæmilegri siðbót í íslenskum stjórnmálum.

Það er stöðugt vaxandi krafa almennings að þeir stjórnmálamenn eigi að víkja af vettvangi stjórnmálanna sem blanda saman eigin hagsmunum og almannahag. Eftir bankahrunið er lítil þolinmæði fyrir sérhagsmunagæslu í fremstu víglínu stjórnmálanna. Hanna Birna Kristjánsdóttir, varaformaður Sjálfstæðisflokksins hrökklaðist úr ráðherraembætti fyrir réttum þremur árum og skömmu síðar úr varaformannsstól flokksins vegna spillingar. Þegar öll sund voru lokuð gafst hún upp og sagði af sér. Þá kvöddu hana tveir menn með tárin í augunum og hældu henni á hvert reipi. Annar þeirra var forsætisráðherrann, Sigmundur Davíð Gunnlaugsson og hinn var fjármálaráðherrann, Bjarni Benediktsson.

Wintris og Vafningur

Mat þessar tveggja manna á því hvernig nota eigi valdastólana er gerólíkt mati almennings. Þeir æra almenning reglulega með breytni sinni og valdhroka. Blekkingarleikurinn með Wintris varð til þess að Sigmundur Davíð Gunnlaugsson varð að segja af sér embætti forsætisráðherra og varð heldur ekki vært í ríkisstjórn.  Þrátt fyrir að fá ágætt fylgi í alþingiskosningunum er hann enn utangarðsmaður í stjórnmálunum og fær engan flokk til þess að starfa með sér nema þá helst Sjálfstæðisflokkinn.  Yfirgnæfandi meirihluti kjósenda er algerlega andvígur því að leiða formann Miðflokksins til valda og það verður ekki gert.

Á sama hátt er mikil andstaða við formann Sjálfstæðisflokksins. Fylgi flokksins undir hans forystu hefur aldrei verið minna í gervallri sögu Sjálfstæðisflokksins. Fylgið fer líka minnkandi. Ástæðan er óbeit kjósenda á hagsmunaskörun milli stjórnmála og viðskipta.

Lögbann á fjölmiðlafrelsið

Menn skulu ekki gleyma því að í gildi er lögbann við umfjöllun fjölmiðla á efni sem tengist formanni Sjálfstæðisflokksins. Stundin og Guardian voru búin að birta nokkuð efni úr skjölum og sýna fram á ósannsögli forsætisráðherrans fráfarandi þegar þrotabú Glitnis greip inn í atburðarásina með dyggri aðstoð sýslumanns sem þegið  hefur ítrekað embætti sitt úr hendi flokksins og stöðvaði frekara upplýsingastreymi skömmu fyrir alþingiskosningarnar. Bannið  stendur enn og mun vara a.m.k. fram á næsta ár.

Eru hinn nýhreinsaði Framsóknarflokkur og Vinstri grænir búnir að gleyma því að formaður Sjálfstæðisflokksins leyndi tveimur skýrslum í aðdraganda alþingiskosninganna á síðasta ári?  Önnur skýrslan fjallaði um eignir Íslendinga á aflandseyjum og hin skýrslan dró fram að lækkun höfuðstóls íbúðalánsskulda um 72 milljarða var alveg sérstök gjöf til auðugra.

Það má líka minna á að Stundin hefur áður dregið fram að formaður Sjálfstæðisflokksins forðaði áhættufé sínu í sjóði 9 tímanlega yfir í ríkistryggð bréf fyrir hrunið 2008 þar sem hann bjó yfir upplýsingum sem almenningur hafði ekki.  Í Vafningsmálinu er nú upplýst að Bjarni Benediktsson hafði aðra og meiri aðkomu en hann hafði áður sagt en lögbannið stöðvaði frekari umfjöllun um málið.

Eftir Bjarna kemur Borgun

Það er líka upplýst að árið 2009 hafi Bjarni Benediktsson hringt í eiganda DV til þess aðstöðva fréttaflutnings blaðsins af Vafningsmálinu. Eftirfarandi er birt í Stundinni 18. okt. 2017:

 „Hann var ekkert að skafa af því, hann ætlaðist til þess að ég stöðvaði þennan fréttaflutning,“ sagði Hreinn Loftsson, aðaleigandi DV, þegar hann lýsti símtali Bjarna árið 2009. 

Það hefur líka verið rakið að 120 milljarðar króna afskriftir eftir hrun  tengjast Bjarna Benediktssyni og föður hans.

Að lokum má rifja upp þa ótrúlegu „handvömm“ Landsbankans undir stjórn fjármálaráðherrans Bjarna Benediktssonar að selja hlut sinn í Borgun langt undir raunverði til aðila innan armslengdar frá ráðherranum.

Apavatnsför Katrínar

Það er spillingin í stjórnmálunum sem er helsti vandinn. Það er krafan um siðbót í stjórnmálunum sem forystumenn sumra flokka þverskallast við sem veldur óstöðugleikanum. Það er ekki væntanleg ríkisstjórn Sjálfstæðisflokks og Vinstri grænna sem veldur áhyggjum. Það er sakaruppgjöf Vinstri grænna til handa formanni Sjálfstæðisflokksins sem veldur því að þessi leiðangur formanns Vinstri grænna verður jafn ógæfusamur fyrir hana og Apavatnsför Sturlu Sighvatssonar vorið 1238 var fyrir hann. Óstöðugleikinn og ókyrrðin munu halda áfram vegna hinnar uppreistu æru og breytir engu hver situr í forsætisráðherrastólnum.





04.nóv. 2017 - 09:14 Kristinn H. Gunnarsson

Sundrung á hægri væng stjórnmálanna

Úrslit alþingiskosninganna um síðustu helgi eru um margt athyglisvert. Ekkert lát er á upplausninni á stjórnmálasviðinu sem fylgdi hruninu 2008. Augljóst er að verulega djúp gjá er milli kjósenda og stjórnmálaflokkanna. 
21.okt. 2017 - 07:00 Kristinn H. Gunnarsson

Aðskilnaður stjórnmála og viðskipta

Það sem helst má draga fram sem ástæðu stjórnarslitanna og snemmbúinna Alþingiskosninga er gífurlega uppsöfnuð gremja almennings út í klíkuskap og sérmeðferð útvalinna í þjóðfélaginu. Skemmst er að minnast þingkosninganna í fyrra sem urðu af sömu ástæðu. 
07.okt. 2017 - 08:56

Stundarbilun

Stundin er fréttamiðill sem einbeitir sér að rannsóknarblaðamennsku. Metnaður eigenda og starfsmanna er að kafa ofan í álitamál samtímans og færa lesendum bestu fáanlegu upplýsingar. Til þess þurfa blaðamenn Stundarinnar að vera ódeigir og þora að fletta ofan af upplýsingum og staðreyndum sem verið er að leyna til þess að afvegaleiða almenning.
26.jún. 2017 - 20:30 Eyjan/Kristinn H. Gunnarsson

Kvótakerfið veldur hörðum stéttaátökum

Sjómannadagurinn var haldinn hátíðlegur nýverið. Vel viðraði og tókust hefðbundin hátíðahöld með ágætum. Blaðið Vestfirðir sendir sjómönnum og fjölskyldum þeirra góðar kveðjur og þakkir fyrir framlag þeirra til góðra lífskjara landsmanna. Kvótakerfið er eldurinn sem logar undir sjávarútveginum og  hefur valdið hörðum deilum og átökum í þjóðfélaginu síðustu 30 ár. Forystumenn útgerðarinnar gera sér grein fyrir stöðunni og keppast við að bera lofi á kerfið og vara við öllum hugmyndum um breytingar. 
26.jún. 2017 - 14:55 Kristinn H. Gunnarsson

Gengishækkun krónunnar er kjarabót fyrir almenning

Undanfarnar vikur hafa hellst yfir landsmenn grátstafir forsvarsmanna í sjávarútvegi og ferðaþjónustu. Það er engu líkara en að hækkandi gengi íslensku krónunnar sé stórfellt efnahagslegt vandamál sem sé við það gera út af við afkomu fyrirtækjanna. Þannig hefur til dæmis framkvæmdastjóri LÍÚ sagt berum orðum að til greina komi að flytja fiskvinnslu til útlanda og forystumenn ferðaþjónustunna bera sig enn verr   yfir því óréttlæti stjórnvalda að ætla þeim að greiða sama virðisaukaskatt og almennt gildir í landinu.
15.maí 2017 - 07:00 Kristinn H. Gunnarsson

Stofnanaofbeldi

Enn er fyrirhuguð vegarlagning í Gufudalssveit komin í uppnám. Enn er það Skipulagsstofnun sem gerir allt sem í valdi stofnunarinnar er til þess að koma í veg fyrir framkvæmdina. Þetta er orðinn langur tími. Allt frá 2004 hefur verið ljóst að Skipulagsstofnun ætlaði sér að ráða því hvaða leið yrði farin þegar kæmi að því að færa vegakerfið í Austur Barðastrandarsýslu til nútímahorfs.
28.apr. 2017 - 07:00 Kristinn H. Gunnarsson

Áfram vestur

Fyrir réttri viku var undiritaður formlegur verksamningur um Dýrafjarðargöng. Þar með er í höfn áratugalangt baráttumál Vestfirðinga fyrir greiðum heilsárssamgöngum milli norður og suðursvæðis Vestfjarða. Jarðgöngin verða að öllu forfallalausu tekin í notkun eftir rúm þrjú ár, líklega síðla árs 2020. Vissulega geta enn brugðist góð áform og fögur fyrirheit og jarðgöngunum gæti verið seinkað, en það verður að teljast mjög ólíklegt og ekki eru fordæmi fyrir því að brugðið hafi verið af ásettu ráði frá tímasettri verkáætlun eftir að samningar hafa verið undirritaðir. Því er hér því slegið föstu að Dýrafjarðargöngin séu í höfn.
13.mar. 2017 - 07:00 Kristinn H. Gunnarsson

Kjósendur blekktir

Nýjustu axarsköft ríkisstjórnarinnar eru þau að kasta samgönguáætluninni út um gluggann.  Áætlunin var samþykkt fáum vikum fyrir Alþingiskosningarnar á síðasta ári og nú að þeim afloknum  er látið eins og yfirlýsing þingisins til kjósenda hafi verið siðlaus skrípaleikur að því er fjármálaráðherrann lét sig hafa að segja í útvarpsþætti í vikunni.
10.feb. 2017 - 17:00 Kristinn H. Gunnarsson

Lög á útgerðarmenn

Árum saman hefur ekki tekist að ná kjarasamningum milli sjómanna og útvegsmanna. Síðasti samningur var gerður í janúar 2009 og rann út tveimur árum síðar. Síðan hefur ekki verið  gerður kjarasamningur. Þetta ástand er einsdæmi og þekkist ekki í neinni annarri atvinnugrein. Það sem næst þessu kemst er kjaradeilda útvegsmanna við smábátasjómenn. Þar voru ekki kjarasamningar í gildi í 3 - 4 ár. Samningar náðust um síðir á forsendum útgerðarinnar.  Sjómenn hafa mátt þola verulegar kjararskerðingar þrátt fyrir hlutaskiptakerfið sem á að tryggja að aflahlutir fylgi afurðaverði.
28.jan. 2017 - 07:00 Kristinn H. Gunnarsson

Ójöfnuður vex með hnattvæðingunni en sár fátækt minnkar

Hnattvæðingin er umdeild. Alþjóðavæðing kapítalismans hefur á sér ýmsar myndir, sumar hverjar óásættanlegar. Taumlaus græðgi,  vaxandi ójöfnuður í dreifingu eigna og tekna, á köflum yfirgengileg ósvífni og alger firring á samfélagslegri ábyrgð og skyldum hafa valdið óróa og vaxandi vantrú á kapitalismanum sem efnahagskerfi.
19.des. 2016 - 07:00 Kristinn H. Gunnarsson

Það þarf enga ríkisstjórn

Það er komin upp pattstaða varðandi ríkisstjórnarmyndun.  Þrír flokkar hafa fengið umboð til stjórnarmyndunar og öllum hefur mistekist. Það er ekki í augsýn nein ríkisstjórn sem hefur meirihluta þingmanna á bak við sig.  Þessi staða er afleiðing af úrslitum kosninganna. Línur voru nokkuð skýrar hvað varðar megindrætti. Annars vegar voru flokkar sem bentu á landlæga spillingu og hins vegar flokkar sem vildu litlu breyta. Fyrrnefndi hópurinn vísaði í kerfislægan vanda þar sem hagsmunaaðilar fá að ráða miklu um sína hagsmuni.

02.des. 2016 - 07:00 Vestfirðir

Landsbyggðarskattur útgerðarmannanna

Í aðdraganda Alþingiskosninganna mátti enn einu sinni sjá og heyra hræðsluáróður útgerðarauðvaldsins í þeim búningi að veiðigjöldin, sem ríkið innheimtir fyrir veittan einkarétt til veiða á Íslandsmiðum, væru landsbyggðaskattur. Áróðurinn gengur út á að deila álögðum veiðigjöldum niður á kjördæmi landsins og halda því fram að íbúar landsbyggðarinnar séu að greiða þessar fárhæðir suður og sér ekki til gagns.
19.nóv. 2016 - 07:00 Kristinn H. Gunnarsson

Alþingiskosningarnar: Krafa um breytingar en hikandi þó

Úrslit Alþingiskosninganna í síðasta mánuði eru skýr krafa um breytingar á ýmsum sviðum þjóðlífsins. En kjósendur voru samt hikandi þegar kom að því að velja þá sem hrinda ættu breytingunum í framkvæmd. Fyrir vikið er framhaldið óljóst. Næsta ríkisstjórn getur verið borin uppi af fráfarandi ríkisstjórnarflokki og hún getur líka verið  byggð á stjórnarandstöðunni.
28.okt. 2016 - 07:00 Kristinn H. Gunnarsson

Kosið um spillinguna á Íslandi

Í komandi Alþingiskosningum um næstu helgi verður fyrst og fremst gert upp við landlæga spillingu í íslensku þjóðfélagi. Hrun viðskiptabankana haustið 2008 opnaði augu almennings fyrir því að ekki væri allt með felldu. Fram að því voru landsmenn þeirrar skoðunar að bæði stjórnsýsla og stjórnmálin væru nánast óspillt og bæru af flestum öðrum þjóðum.
16.okt. 2016 - 18:00 Kristinn H. Gunnarsson

Stóra byggðastefnan

Í íslensku hagkerfi verða til mikil verðmæti á hverju ári. Hversu mikil hverju sinni má ráða af því hver hagvöxturinn er.  Almennt má segja að með vaxandi kaupmætti almennings hækka ýmis eftirsótt gæði í verði.  Verð á fiskikvóta á Íslandsmiðum fylgir bættum efnahag í viðskiptalöndum íslensks sjávarútvegs.
04.okt. 2016 - 07:00 Kristinn H. Gunnarsson

Píratar ræna lýðræðinu

Hinir hefðbundnu stjórnmálaflokkar hafa komið sér í þá stöðu að stuðningur við þá er í algeru lágmarki og hefur aldrei verið rýrar að vöxtum síðustu 100 árin. Í síðustu könnunum eru flokkarnir fjórir, Sjálfstæðisflokkur, Framsóknarflokkur, Samfylking og Vinstri græn með samtals innan við 60% af fylginu.  Í síðustu könnun Gallup eru Framsóknarflokkur og Sjálfstæðisflokkur samtals með aðeins 35% fylgi og hinir tveir Samfylking og Vinstri græn enn minna eða aðeins 24%. Í könnun MMR er mælingin svipuð. Sjálfstæðisflokkur og Framsóknarflokkur mælast samanlagt með 32% fylgi og Samfylkingin og Vinstri græn eru með 21% fylgi. Í annarri könnunnini eru flokkarnir fjórir samanlagt eða 53% fylgisins og í hinni eilítið meira eða 59%.  Til samanburðar má nefna að Sjálfstæðisflokkurinn og Framsóknarflokkurinn höfðu allt fram til kosninganna 2009 aðeins einu sinni mistekist að fá hreinan meirihluta á Alþingi.

15.sep. 2016 - 13:53 Kristinn H. Gunnarsson

Röng fjölmiðlaumfjöllum bjargar Sjálfstæðisflokknum


04.sep. 2016 - 15:00 Kristinn H. Gunnarsson

Flokkarnir hafna almenningi

Endurbætur á lýðræðinu hefur borið hæst í stjórnmálunum frá bruni viðskiptabankanna. Einkum á þann hátt að auka áhrif almennings á endanlegar ákvarðanir í mikilvægum og umdeildum málum. Hefur verið horft til ákvæðis stjórnarskrárinnar sem heimildar forseta Íslands að neita að skrifa undir lög sem Alþingi hefur samþykkt og kalla þannig fram almenna atkvæðagreiðslu um viðkomandi mál.

25.ágú. 2016 - 15:00 Kristinn H. Gunnarsson

Uppboðsleiðin er framfaraskref

Enn á ný blossar upp umræða um stjórn fiskveiða í aðdraganda alþingiskosninga. Þetta mál hefur allt frá kosningunum 1991 verið eldfimt þjóðfélagsmál. Óréttlætið og ósanngirnin vegna ótímabundinnar úthlutun réttinda til þess nytja fiskistofna við landið til fyrirframvalinna útgerðarfyrirtækja birtist hverjum sem hefur opin augun eftir að framsalið var leyft. Í réttindunum eru mikil verðmæti, raunar miklu meiri en nokkur útgerðarmaður hefur unnið til.