Raunasaga ofnæmissjúklings

En nóttin er komin og nú eru 19 mínútur í að apótek Lyfju við Lágmúla lokar. Ég næ því örugglega ekki. Það er síðasta apótek landsins sem opið er í dag.

Ef bara það væri einhver sem sæi hag sinn í því að reka næturapótek, eins og var nú gert hér á árum áður. Þá gat maður gengið að því vísu að til væri apótek, sem opið væri að nóttu til.

Lyfjarisarnir voru samt sniðugir! Þeir bremsuðu þessa vitlausu næturopnun af. Til hvers? Kúnnarnir koma bara þegar þeim er sagt að koma. Ekki eins og þeir hafi eitthvert annað að fara.

Það eru nefnilega bara 59 apótek á Íslandi. Á öllu Íslandi! Af þeim eru 23 í Reykjavík. Ekkert þeirra er nærri öðru, enda er passað upp á slíkt af opinberri stofnun sem heitir Lyfjastofnun. Hún gefur líka apótekurunum leyfi til þess að reka apótek. Til þess þarf að uppfylla fjölda skilyrða. Skilyrða sem kostar peninga að uppfylla. Ég skil vel að hver sem er fái ekki að selja Contalgin eða morfín eða eitthvert annað eitrið sem nauðsynlegt er fyrir fáa, en misnotað er af alltof mörgum. Ég get vel skilið það.

En ég ætlaði ekkert að kaupa Contalgin eða morfín. Ég er með vott af frjókornaofnæmi og ætlaði að fá mér nefúða, þennan með menthol lyktinni, og kannski eitthverjar ofnæmistöflur – mér nægir ein væg tafla fyrir mitt litla ofnæmi. Ég fer nú varla að misnota það. Mönnum hefur nú varla dottið það í hug – að fara að sprauta sig með nefúða, það er að segja sprauta efninu annað en á tilsettan stað. Hvern er eiginlega verið að vernda með þessu leyfisstandi? Afhverju þarf að hindra aðgengi manna, að nefúðamarkaðnum? Ekki virðast þeir vera að vernda minn hag, og ef þeir eru ekki að vernda minn hag, hag hverra bera þeir þá fyrir brjósti?

Þessi 59 apótek sem voru svo heppinn að fá rekstrarleyfi, eru rekin af miklu færri aðilum. Flest apótek eru hlutar af stórum keðjum apóteka, t.d. Lyfja, Lyfjaval og Lyf & Heilsa.

Íslendingar nota árlega lyf fyrir um 24 milljarða, á smásöluverðlagi samkvæmt gögnum Lyfjastofnunar. 23.805.548.251 krónur, nákvæmlega. Það er ansi stór markaður, til þess að skipta niður á þetta fáa aðila. Reyndar eiga spítalarnir og heilsugæslurnar eflaust eitthvað í þessari dreifingu, en fákeppnin er augljóslega gríðarleg. Að minnsta kosti það mikil að ekkert apótek er til staðar fyrir höfuðborgarbúa á nóttunni, og Lyfjastofnun passar gaumgæfilega upp á það að samkeppnin fari alls ekki af stað. Lyfjastofnun og ráðherra ákveða saman hvar og hvenær lyfjaverslanir mega starfa og vakta það að lyfjabúðir séu dreifðar um landið, svo ég fari nú örugglega ekki að opna ódýrari og betri lyfjabúð við hliðina á Lyfju í Lágmúlanum! Kannski að ég hefði mína opna allan sólarhringinn! Þá hugsun gætu eigendur keðjanna og skriffinnar Lyfjastofnunar vafalaust ekki hugsað til enda! Þannig er þetta í borginni, og ég get rétt ímyndað mér hvernig þetta er utan hennar!

En nú er klukkan orðin 01:13, og apótekið lokað og ég án nefúðans. Ég vona að ég veki ekki hundinn með hrotunum!

Ég kemst samt ekki hjá því að íhuga, hvern ég hefði skaðað, hefði ég keypt nefúðann í verslunum Hagkaupa, sem alltaf eru opnar.