Undarleg orðsending um forsetakjörið

Sæll. Er það rétt sem menn segja að þú berir ábýrgð á lygunum sem birtast undir fuglahvísli á AMX?

Ég svaraði honum að bragði:

Sæll. Ég hef verið erlendis og kom til landsins á laugardagskvöld. Ég hef hvergi látið í ljós neina skoðun á þessu forsetakjöri og því síður skrifað neitt um það á amx.is. Ég kann satt að segja ekki við þann tón, sem er í þessari orðsendingu þinni, þótt send sé klukkan hálfþrjú um nótt.

Eftir að ég hafði skoðað málið lauslega, bætti ég við:

Ég fór, eftir að ég fékk orðsendinguna frá þér, inn á amx.is og skoðaði nýlega pistla þar um framboð minnar ágætu kunningjakonu Þóru Arnórsdóttur, sem er einnig dóttir góðs vinar míns. Smáfuglarnir þar láta vissulega í ljós sterkar skoðanir á kosningabaráttu Þóru, sem þú rekur af miklum krafti, jafnvel langt fram eftir nóttu. En hvar eru lygarnar? Að Þóra hafi verið í Alþýðuflokknum eins og segir á amx.is? Eða kennt í stjórnmálaskóla Samfylkingarinnar eins og þar segir líka? Hið fyrra hefur ekki verið vefengt. Og í auglýsingu í fjölmiðlum um stjórnmálaskóla Samfylkingarinnar 2002 var Þóra sögð kennari þar. Eru það ósannindi? Hver ber þá ábyrgð á þeim? Helgi Hjörvar, skólastjórinn? Munuð þið Þóra fordæma slík vinnubrögð Samfylkingarinnar?

Úr því að Svavar Halldórsson vill ólmur draga mig inn í kosningabaráttuna, hef ég þetta að segja um forsetakjörið: Ég hef enn ekki ákveðið, hvað ég kýs á laugardaginn, þótt sennilega fari ég á kjörstað og nýti með því rétt minn. Hugsanlega skila ég auðu, en ég get líka hugsað mér að kjósa Ólaf Ragnar Grímsson þrátt fyrir fyrri væringar, af því að mér fannst hann standa sig vel í Icesave-málinu. (Minnist ég þá frægra ummæla Indros Montanellis, þegar hann hvatti Ítali eitt sinn til að kjósa Kristilega lýðræðisflokkinn, því að hann væri skársti kosturinn: „Turatevi il naso e votate Democrazia Cristiana.“) Ég get líka hugsað mér að kjósa Þóru Arnórsdóttur, því að ég þekki hana að góðu einu og læt mig þá engu skipta, ef hún á sér fortíð í Alþýðuflokknum eða Samfylkingunni. Hina frambjóðendurna tel ég alla óframbærilega.

Í forsetakjörinu er eitt sjónarmið mikilvægt, þótt margt annað verði einnig að hafa í huga. Framundan eru óvissutímar. Úrskurður ESA-dómstólsins í Icesave-málinu í haust verður líklega voldugri aðilanum í hag, Bretum og Hollendingum, þótt ekki sé það fullvíst, enda eru rök Íslendinga sterkari. Verði sú raunin á, mun Evrópusambandið eflaust reyna einhver bolabrögð. Þá skiptir máli, að trúnaðarmenn þjóðarinnar muni, að við erum fullvalda þjóð, sem látum ekki kúga okkur í lífshagsmunamáli. Þá varðar miklu, að málsvarar Íslandi komi fram erlendis af festu og fimi í senn. Það gera núverandi ráðherrar ekki og geta ekki, eins og dæmin sanna. Þá reynir þess vegna sérstaklega á forseta Íslands.