Þriðja stærsta gjaldþrotið?

Þetta fær ekki staðist. Sex stærstu gjaldþrot Bandaríkjanna eru talin þessi: 1) Lehman Brothers (efnahagsreikningur 691 milljarður dala). 2) Washington Mutual (328 milljarðar). 3) World.com (104 milljarðar). 4) General Motors (91 milljarður). 5) CIT (71 milljarður). 6) Enron (66 milljarðar).

Stefán og Gauti komast að niðurstöðu sinni með því að leggja saman efnahagsreikninga allra þriggja bankanna, sem námu samtals 155 milljörðum dala eða 115 milljörðum evra. En það er augljóslega villandi. Þetta voru þrjú ólík fyrirtæki, ekki eitt. Þetta voru þrjú gjaldþrot á Íslandi, ekki eitt.

Í öðru lagi námu samþykktar kröfur í bú bankanna þriggja samtals 65 milljörðum evra eða 87 milljörðum dala. Aðalástæðan var sú, að búin voru á Íslandi. Dótturfélög í ýmsum löndum voru þá ekki talin með (þótt þau væru talin með í efnahagsreikningunum). Þau voru gerð upp sérstaklega í hverju landi um sig. Þetta voru þess vegna mörg uppgjör í mörgum löndum, ekki neitt eitt gjaldþrot. Þar sem uppgjörin fóru eðlilega fram, til dæmis í Bretlandi, reyndust dótturfélögin (Heritable og KSF) ekki hafa verið gjaldþrota. Endurheimtur voru 98% og 87%! Annars staðar, til dæmis í Noregi, Finnlandi og Danmörku, voru dótturfélögin hirt á smánarverði með aðstoð þarlendra stjórnvalda.

Hvað gengur fólki til að dreifa ýkjusögum um land sitt og þjóð?

(Fróðleiksmoli í Morgunblaðinu 14. október 2017.)