31. jan. 2012 - 12:00Brynjar Nielsson

Hlutleysi og sanngirni

Í vefútgáfu DV í gær var merkileg frétt þess efnis að heldur betur hafi hlaupið á snærið hjá Baldri Guðlaugssyni í saksókninni gegn honum þar sem Ólafur Börkur Þorvaldsson, einn dómara Hæstaréttar í máli Baldurs, væri náfrændi Davíðs Oddssonar góðvinar Baldurs. Full ástæða væri því fyrir Baldur að fyllast bjartsýni.

Frjálsi og óháði miðillinn, sem leggur mikið upp úr sannleikanum, taldi ekki þörf á því að geta þess í fréttinni að Hæstiréttur hefur tvisvar kveðið upp dóma í kærumálum Baldurs, annars vegar hafnaði dómurinn því að rannsókn á máli hans væri ólögmæt og felld niður og hins vegar staðfesti dómurinn kyrrsetningu ákæruvaldsins í eignum Baldurs og í báðum þessum málum var Ólafur Börkur Þorvaldsson einn af þremur dómurum Hæstaréttar. Vandséð er því af hverju Baldur ætti að vera í bjartsýniskasti yfir setu Ólafs Barkar í dóminum nú. Raunar var Baldur ekki ánægðari en svo að hann krafðist þess Ólafur

Börkur viki sæti þar sem hann væri vanhæfur vegna setu í þessum tveimur málum.

Hver skyldi nú tilgangurinn vera með svona frétt hjá hlutlausum blaðamanni sem vinnur á frjálsum og óháðum miðli? Er verið að ýja að því að Ólafur Börkur sé spilltur dómari sem dæmi eftir annarlegum sjónarmiðum eða pólitískum tengslum skyldmenna sinna við ákærða eða er svona fréttaflutningur dulbúin hótun hvers verður að vænta fyrir dómarana ef ekki verður dæmt „rétt“ í málinu? Eða er þetta kannski bara venjuleg illkvittni og mannvonska?

Einstaka fjölmiðlum og fjölmiðlamönnum er tíðrætt um hvað þeir eru hlutlausir, sanngjarnir og annt um sannleikann. Þar eru DV menn kannski fremstir flokki ásamt fyrrum blaðamanni þar, Jóhanni Haukssyni, sem lýsti því fjálglega í viðtali á RUV fyrir helgi í tilefni að nýju starfi hans sem upplýsingafulltrúi ríkisstjórnarinnar, hvað hann væri þjakaður af heiðarleika og sannleiksást í störfum sínum og það myndi ekkert breytast í hina nýja starfi. Ekki er víst að allir aðrir hafi sömu sýn á ágæti Jóhanns og hann sjálfur. En ástæða er til að óska Jóhanni Haukssyni til hamingju með það að fá loksins greidd laun úr ríkissjóði fyrir starf sem hann er búinn að sinna í bráðum þrjú ár án endurgjalds.

Frétt DV sem hér er til umfjöllunar er hvorki heiðarleg né sanngjörn, ekkert frekar margar greinar verðlaunablaðamannsins um icesave eða ógildingu Hæstaréttar á kosningu til stjórnlagaþings. Fjölmiðill sem leggur ákveðna einstaklinga í einelti misserum saman, á milli þess sem skrifaðar eru langar greinar um alvarlegar afleiðingar eineltis í okkar samfélagi, er auðvitað hvorki heiðarlegur né sanngjarn. Þá verður ekki séð að sannleikurinn sé mikið að þvælast fyrir þótt svo sé látið í veðri vaka.

15.maí 2012 - 13:27 Brynjar Nielsson

Dómur yfir hælisleitendum

Í Héraðsdómi Reykjaness þann 30. apríl s.l. voru tveir ungir menn sakfelldir fyrir skjalafals með því að hafa framvísað fölsuðum skilríkjum við komuna til landsins. Refsing var ákveðin 30 daga fangelsi fyrir brot sem varðar allt að 8 ára fangelsi. Eins og gjarnan vill verða þegar dómsniðurstaða samrýmist ekki pólitískri hugmyndafræði sumra vill umræðan leiðast á villigötur.

03.maí 2012 - 11:45 Brynjar Nielsson

Flokkshollusta, frændsemi og fleðugangur

Ég skrifaði grein í Moggann í síðustu viku þar sem gerði athugasemdir við sífelldar árásir fjölmiðla á Ólaf Börk Þorvaldsson, hæstaréttardómara þar sem látið er að því liggja að hann skorti hæfni til að vera hæstaréttardómari. Ég benti á í greininni að Ólafur Börkur hafi verið metinn hæfur til að gegna starfinu þótt okkur geti greint á hvort að hann hafi verið hæfastur umsækjenda. Hæstiréttur sjálfur gerði engan greinarmun á hæfni umsækjenda

11.apr. 2012 - 15:53 Brynjar Nielsson

Mannréttindanefnd Sameinuðu Þjóðanna og fleira skringilegt í henni veröld

Í pólitískri dægurbaráttu og umræðu vitna sumir til Mannréttindanefndar Sameinuðu Þjóðanna eða nefndarmanna þeirrar stofnunar í því skyni að afla máli sínu stuðnings eða renna stoðum undir réttmæti skoðana sinna. Eru það einna helst þeir sem telja kvótakerfi í íslenskum sjávarútvegi brot á mannréttindum sínum og þeir sem telja það til mannréttindabrota hversu fáir eru sakfelldir fyrir kynferðisbrot og refsingar vægar í þeim brotaflokki.

17.mar. 2012 - 16:00 Brynjar Nielsson

Vansæmd Hæstaréttar

Þessi orð voru í fyrirsögn á pistli Þorvaldar Gylfasonar, prófessors, sem ég las á einhverjum vefmiðli fyrir stuttu. Þorvaldi fannst réttarhaldið í Landsdómi líta út eins og farsi þar sem hæstaréttardómararnir í dóminum leyfðu sér að brosa og jafnvel hlægja. Þar að auki leyfði forseti Hæstaréttar ekki beina útsendingu frá aðalmeðferð málsins. Niðurstaða Þorvaldar er sú að réttarhöld í siðuðum löndum fari ekki svona fram.

01.mar. 2012 - 10:50 Brynjar Nielsson

Að skrækja og skjóta?

William Ralph Inge 1860-1954, enskur rithöfundur og prófastur í Pálskirkju í Lundúnum, sagði eitt sinn: The enemies of Freedom do not argue; they shout and they shoot. (Óvinir frelsisins rökræða ekki, - þeir skrækja og skjóta).

18.jan. 2012 - 14:00 Brynjar Nielsson

Niðurfelling ákæru

Mikið fjaðrafok hefur orðið vegna tillögu nokkurra þingmanna um að afturkalla ákæru á hendur Geir Haarde. Hafa viðbrögð margra verið þau að Alþingi geti ekki afturkallað ákæru sem þingfest hefur verið fyrir Landsdómi og litið á þetta sem óeðlileg afskipti af dómsvaldinu. Sýnist mér það vera þeir sömu og töldu eðlilegt að skipa í stjórnlagaráð sama fólkið og hafði verið kosið í kosningu sem Hæstiréttur ógilti.

12.jan. 2012 - 11:20 Brynjar Nielsson

Blaðafulltrúi, ekki blaðamaður

Ég skrifaði pistil á Pressuna sem bar yfirskriftina „Samhengi hlutanna“ fyrir nokkrum dögum þar sem ég gagnrýndi umfjöllun fjölmiðla, og sérstaklega Sigrúnar Davíðsdóttir pistlahöfundar hjá RÚV um viðskiptalífið og svokallaða útrásarvíkinga fyrir og eftir hrun.

07.jan. 2012 - 12:00 Brynjar Nielsson

Samhengi hlutanna

Að undanförnu hafa hinir ýmsu álitsgjafar lýst yfir áhyggjum sínum af því að dómarar landsins muni ekki skilja hin flóknu efnahagsbrotamál og hafi jafnvel ekki löngun til að dæma þessa vondu bísnessmenn eins og þeir eiga skilið. Einn þessara álitsgjafa, Sigrún Davíðsdóttir, segir í nýlegum pistli að ákæra á hendur Glitnismönnum, muni veita vísbendingu um hvort dómstólar séu komnir jafn langt í skilningi á efnahagsbrotum og sérstakur saksóknari.

01.jan. 2012 - 14:00 Brynjar Nielsson

Lævís leikur

Skömmu eftir hrunið var sett á laggirnar embætti sérstaks saksóknara sem átti að rannsaka möguleg brot í aðdraganda hrunsins. Slíkar pólitískar ákvarðanir hafa önnur ríki ekki tekið. Útlendur ráðgjafi sérstaks saksóknara sagði í viðtali í Silfri Egils í mars 2009 að hiklaust ætti að reka þessi mál jafnt í fjölmiðlum sem fyrir dómstólum. Margt bendir til að farið hafi verið eftir ráðleggingum ráðgjafans og réttindi sakborninga eru þar engin fyrirstaða. Sérstakur saksóknari og rannsakendur leka þannig efni í fjölmiðla sem birta það gagnrýnislaust, helst með áliti manna sem eru reiðubúnir að fella dóma þótt engin sök hafi verið sönnuð. Ég hef ásamt nokkrum kollegum gagnrýnt þetta og bent á að umfjöllunin hefði þann eina tilgang að skapa óeðlilegan þrýsting frá almenningi á dómstóla.