02. ágú. 2012 - 22:31Björn Jón Bragason

Á að ríkisvæða alla fólksflutninga?

Fyrir nokkru var ákveðið að færa skipulag og stjórnun almenningssamgangna yfir til landshlutasamtaka. Samtök sunnlenskra sveitarfélaga sáu þetta eðlilega sem tækifæri til að efla ferðaþjónustu og búsetuskilyrði í landsfjórðungnum. Einhverra hluta vegna ákváðu þó umrædd samtök að fela illa rekinni opinberri stofnun, Strætó bs., alla yfirumsjón með þessu verkefni.

Nú fyrr í sumar var fyrirtækinu Sterna Travel, sem áður sinnti fólksflutningum á Suðurlandi, hótað lögbanni flytji það farþega inn á Suðurland og vafalaust verður öðrum aðilum hótað sömuleiðis, en öðrum fyrirtækjum en Strætó bs. er einnig bannað að flytja erlenda ferðamenn inn á svæðið í öllu því sem Samtök sunnlenskra sveitarfélaga túlka sem „reglubundinn akstur“. Opinberir aðilar eru því með þessu komnir af fullum krafti í ferðaþjónustuna á Suðurlandi.

Sömu sögu er að segja af Austfjörðum, þar sem samtök sveitarfélaga á svæðinu hafa nú einkaleyfi til áætlunarferða. Í fyrradag, 1. ágúst, stöðvaði lögreglan á Egilsstöðum hópferðabíl frá Sterna Travel sem hugðist aka með hóp erlendra ferðamanna frá Egilsstöðum til Hornafjarðar. Í þann mund sem bílstjórinn var að leggja af stað kom lögreglan og meinaði honum að aka til Hornafjarðar. Bílstjóranum var tjáð að lögreglu hefði verið „skipað að stöðva för hans“. Samtök sveitarfélaga á Austurlandi höfðu þá fengið samþykkt lögbann á akstur Sterna Travel um fjórðunginn.

Samkvæmt skilningi laganna er landshlutasamtökum úthlutað einkaleyfi til að sinna „almenningssamgöngum“. Einkaleyfið nær ekki til ferðamannaaksturs. Í þessu sambandi er vert að benda á að nokkur fyrirtæki sinna reglubundnum ferðamannaakstri og hafa gert um langa hríð. Sterna Travel og fleiri fyrirtæki í hópferðum hafa markaðsett ferðir sínar erlendis og ferðamennirnir sem þeir flytja eru allir erlendir og hafa keypt farmiða erlendis.

Nú hefur hið opinbera kosið að tálma atvinnufrelsi með þeim hætti að enginn megi sinna neins konar „áætlunarflutningum“ nema hafa til þess tilskilið einkaleyfi á ákveðnu svæði. Erfitt er þó að sjá hvernig akstur með ferðamenn sem keypt hafa miða sína erlendis teljist „áætlunarflutningar“. Nefna má að Strætó bs. sinnir ekki ferðamönnum, en vagnarnir aka ekki að fjölsóttustu ferðamannastöðum Suðurlands. Hér er um gríðarlega tálmun á atvinnufrelsi að ræða og rétt að hafa í huga að áratugalöng dómvenja býður að allar tálmanir á mannréttindum líkt og atvinnufrelsi verði að túlka þröngt.

Það er einsdæmi svo vitað sé í íslenskri ferðaþjónustu að samtök sveitarfélaga berjist gegn komu ferðamanna inn á svæði þar sem íbúar byggja afkomu sína að stórum hluta á viðskiptum við ferðamenn. Það er ekki nema von að menn spyrji sig hvort hið opinbera stefni að því að hafa umsjón með öllum fólksflutningum í framtíðinni?




23.apr. 2015 - 20:48 Björn Jón Bragason

SPRON knésettur

Í nýútkominni bók minni Bylting – og hvað svo? fjalla ég meðal annars um fall Sparisjóðs Reykjavíkur og nágrennis (SPRON) vorið 2009. Þar segir meðal annars:
21.apr. 2015 - 19:19 Björn Jón Bragason

„Lánardrottinn greiðir ekki skuldaranum fyrir skuldina!“ – Einkavæðingin 2009

Í nýrri bók minni Bylting – og hvað svo? er meðal annars fjallað um einkavæðingu nýju ríkisbankanna haustið 2009, en þeir voru nánast einkavæddir „í kyrrþey“. Einkavæðingin fór fram án undangenginnar umræðu um eigendastefnu, dreift eignarhald, mögulega kjölfestufjárfesta og ýmis önnur grundvallaratriði bankakerfis. En í flestum nágrannalanda okkar fór fram mikil umræða þessi misserin um nýja umgjörð fjármálastofnana í ljósi bankakreppunnar. Slík umræða fór ekki fram hér á landi.
16.apr. 2015 - 10:38 Björn Jón Bragason

Varnaðarorð Görans Perssons

Í dag kemur út bók mín Bylting – og hvað svo? en hún fjallar um afdrifaríka atburði í íslenskri sögu í eftirleik bankahrunsins 2008. Svo vill til að í dag ávarpar Göran Persson, fyrrverandi forsætisráðherra Svíþjóðar (1996–2006), ársfund Samtaka atvinnulífsins. Persson kom hingað til lands í byrjun desember 2008 og miðlaði af reynslu Svía sem tekist höfðu á við bankakreppu í byrjun tíunda áratugar síðustu aldar. Þá var hægristjórn við völd, en ekki hvarflaði þó að leiðtogum sósíaldemókrata að gera kröfu um kosningar, heldur sögðu þeir einfaldlega: „Við tökum ykkur í næstu kosningum.“ Það varð úr og vinstrimenn höfðu betur í næstu kosningum til sænska Ríkisdagsins. Persson varð þá fjármálaráðherra og síðar forsætisráðherra.
05.mar. 2015 - 17:15 Björn Jón Bragason

Skottulækningar fyrr og nú

Það má heita lofsvert framtak Kastljóss ríkissjónvarpsins að fletta rækilega ofan af skottulæknum í umfjöllun sinni undanfarna daga. En hvað eru skottulækningar? Skottulækningar eða „hjálækningar“ eru aðferðir til lækninga sem ekki samræmast viðurkenndum og þar með þaulrannsökuðum aðferðum akademískrar læknisfræði. Árangur lækningaaðferðanna hefur þá ekki verið sannaður eða þá að rannsóknir hafa sýnt að hann sé ekki til staðar.
27.feb. 2015 - 13:57 Björn Jón Bragason

Áróðursmáladeild Dags B.


26.maí 2014 - 17:29 Björn Jón Bragason

Engar Samfylkingarblokkir í Laugardal!

Í nýju aðalskipulagi Samfylkingarinnarflokkanna í Reykjavík er gert ráð fyrir blokkarbyggð þar sem nú eru trjáreitir norðan Suðurlandsbrautar, en á sama tíma eru uppi ráðagerðir um að Suðurlandsbraut verði þrengd í eina akgrein í hvora átt. Hvað sem líður skoðunum fólks á „þéttingu byggðar“ er afar varhugavert að skerða framtíðar íþrótta- og útivistarsvæði borgarbúa.
10.maí 2014 - 15:50 Björn Jón Bragason

Verkfall er úrelt baráttutæki

Þegar ég var að alast upp voru fréttatímar reglulega uppfullir af verkfallsfréttum og ítrekað horfði maður sem barn á myndir af ofbeldi verkfallsvarða. Á seinni árum hefur friður færst yfir vinnumarkað og verkfallsréttinum er beitt æ sjaldnar. –
28.apr. 2014 - 20:38 Björn Jón Bragason

Um „þéttingu byggðar“

Nú er mikið rætt um „þéttingu byggðar“ rétt eins og það sé glænýtt fyrirbrigði. Í þeirri umræðu er gjarnan nefnt að Reykjavík hafi áður verið þéttbýl, en síðar risið „bílaúthverfi“.
15.nóv. 2013 - 10:35 Björn Jón Bragason

Fallegri og betri úthverfi

Viðhald eigna borgarinnar, svo sem gatnakerfis og skóla, hefur setið algjörlega á hakanum, sér í lagi í efri byggðum borgarinnar. Á sama tíma er milljörðum eytt í uppkaup á ónýtum húskofum og önnur gæluverkefni vestar í borginni.
09.nóv. 2013 - 20:31 Björn Jón Bragason

Framtíðarflugvöllur í Vatnsmýri – glænýtt myndband

Sú mikla óvissa sem ríkt hefur um Reykjavíkuflugvöll hefur hamlað allri uppbyggingu flugs og flugtengdrar starfsemi á vellinum. Gríðarleg tækifæri hafa því farið forgörðum.  Festum flugvöllinn í sessi í Vatnsmýri til hagsbóta fyrir reykvískt atvinnulíf og samgöngur.

Björn Jón Bragason
Björn Jón Bragason er sagnfræðingur að mennt. Hann lauk stúdentsprófi frá Menntaskólanum í Reykjavík árið 2000. Árið 2006 lauk hann meistaraprófi í sagnfræði frá Háskóla Íslands. Björn Jón lauk BA prófi í lögfræði frá Háskólanum í Reykjavík 2012 og leggur nú stund á meistaranám í lögfræði við sama skóla.

Björn Jón hefur verið verslunarmaður frá árinu 2000 og framkvæmdastjóri Samtaka kaupmanna og fasteignaeigenda við Laugaveg frá 2012. Þá hefur hann unnið að margháttuðum sagnfræðirannsóknum frá 2006. Eftir hann liggja fjölmargar fræðigreinar, auk bókarinnar Hafskip í skotlínu sem út kom 2008.

Björn Jón situr í miðstjórn Sjálfstæðisflokksins og í stjórn Sjálfstæðisfélags Langholts.