22. feb. 2010 - 20:00Ásthildur Sturludóttir

Skandalsúpan

Þessi fína fiskisúpa ætti að metta góðan hóp fólks. Ég sýð soðið sjálf og mér þykir súpan betri þannig. Það er auðvitað ekkert mál að kaupa bara fisksoð og búa til súpuna þannig, en mér þykir skemmtilegra að dedúa við að sjóða soðið sjálf enda gefur það súpunni hið rétta bragð. Það er samt illa hægt að leiðsegja um gerð fiskisúpu, þetta fer allt eftir tilfinningu og skapi hverju sinni. Þið bara prófið ykkur áfram og munið að það er enginn heilagur sannleikur við matargerðina.

Þessi fiskisúpa mín er mikið uppáhald í fjölskyldunni og meðal vina minna. Hún var einu sinni elduð í lítravís á góðum veitingastað út á landi. Svo vinsæl var súpan að einu sinni stoppaði flugvél, full af farþegum, í þessum sama bæ á leið sinni frá Ísafirði til Reykjavíkur. En farþegarnir höfðu heyrt af gæðum súpunnar og vildu sinn skammt. Það stopp varð efni krassandi blaðaskrifa síðar.

Fyrir 6-10

Soð:
Humarskeljar
4 hvítlauksgeirar, marnir
1 laukur, saxaður gróft
½ blaðlaukur, saxaður
3 gulrætur, saxaðar
2 dósir tómatar (stewed tomatoes frá Hunt´s)
1 dós tómatpuré (Hunt´s)
3 msk humarkraftur (Oscar´s er alveg ágætt)
2 teningar fiskikraftur
3-4 l vatn
2 dl hvítvín
1 msk Maldon salt
Nokkrir góðir snúningar af svörtum pipar
½ tsk chilipiparduft
2 lárviðarlauf
Smjörklípa og smá ólívuolía.

Súpa:
Fisksoðið sigtað
400 gr humar í skel, takið humarinn úr skelinni og garndragið vöðvann.
400 gr smálúða
400 gr þorskur eða annar fiskur
2 dósir tómatar (stewed tomatoes frá Hunt´s)
1 lítil dós tómatpuré
Humarkraftur og fiskikraftur eftir smekk
Smá meira hvítvín og góð sletta af koníaki
1-2 msk af Eftirlæti Hafmeyjunnar frá Pottagöldrum
1 búnt af steinselju, saxað (geymið smá til að skreyta).
Pipar og Maldonsalt
5 dl rjómi
3 msk koníak

1. Setjið skeljar í poka og lemjið aðeins með kjöthamri.

2. Bræðið smjör í stórum, víðum potti. Bætið olíunni við.

3. Steikið skeljarnar þar til þær eru létt brúnaðar. Takið þær úr pottinu og setið í skál.

4. Steikið grænmetið í smjörinu uns það verður mjúkt.

5. Bætið þá skeljunum út í og steikið áfram við frekar háan hita. Gætið þess vandlega að þetta brenni ekki.

6. Bætið nú vatni, tómötum og tómatpuré út í og látið suðuna koma upp. Kryddið.

7. Látið krauma við vægan hita í tæpan klukkutíma eða lengur, eftir því hvert tímahrakið er mikið. Það er best að láta soðið sjóða vel, kannski í rúma tvo tíma.

8. Bætið smá vatni út í ef ykkur finnst það vanta á suðutímanum.

9. Sigtið humorsoðið í annan pott.

10. Bætið tómötum og tómatpuré eftir smekk út.

11. Notið nú töfrasprota til að mauka súpuna betur. Súpan á að vera fallega rauðbleik.

12. Kryddið og smakkið til og látið súpuna sjóða í svona rúman hálftíma.

13. Léttþeytið rjómann og bætið koníaki út í og setjið í fallega skál.

14. Setið nú fiskinn út í súpuna og hitið að suðu.

15. Færið súpuna í lekkera tarínu, ef þið eigið. Smellið slettu af koníaksrjóma ofan á og skreytið með steinselju. Berið fram strax.

16. Hver og einn fær sé nú súpu og slettu af rjóma ofan á.

17. Gott brauð og smjör er best með og ég get nú ekki sagt að glas af ísköldu hvítvíni sé neitt vont með þessu en ískalt vatn er ekki lakara.




06.maí 2010 - 18:00 Ásthildur Sturludóttir

Alsírskur tiltektar apríkósukjúklingur og nett geggjað hvítkálssalat

Alsírskur apríkósukjúklingur með krydduðum furuhnetum. Nú er vor í lofti og allar sannar húsmæður (og feður) eru að taka heimilin „í gegn“, þvo veggi, loft, skápa, glugga, henda öllu sýnilegu drasli og viðra fataskápinn. En ekki ég og móðir mín er ekki stolt af mér. Ég fékk nóg hér í gamla daga þegar þær amma fóru hamförum í stórhreingerningum sem tóku nokkra daga.
29.apr. 2010 - 10:10 Ásthildur Sturludóttir

Snæfellshamborgarinn

Í dag keppir liðið mitt, Snæfell, til úrslita við Keflavík í Iceland Expressdeildinni í körfubolta eða eins og var kallað í mínu ungdæmi, Úrvalsdeildinni. Í tilefni af því eldaði ég hamborgara strákunum til heiðurs, svona rétt til að hita upp fyrir átökin á morgun. Þetta eru snillingar og ég vona sannarlega að þeim gangi vel.

22.apr. 2010 - 11:05 Ásthildur Sturludóttir

Vorboðinn ljúfi....

Möndluterta með jarðaberjum. Nú andar suðrið sæla vindum þýðum.
Á sjónum allar bárur smáar rísa 
og flykkjast heim að fögru landi Ísa, 
að fósturjarðar minnar strönd og hlíðum.
10.apr. 2010 - 11:30 Ásthildur Sturludóttir

Hornstranda spaghetti bolognese

Hrært í bolognese-sósunni í Hrafnfirði,  sumarið 2008 Mér hefur alla tíð þótt spaghettí bolognese vera eitt það besta sem ég veit um enda einstaklega saðsamt, hæfilega subbulegt og hentar vel hráslagalegri íslenskri veðráttu. Mamma býr til óskaplega gott spaghettí bolognese og er örugglega vikulega með það.
09.apr. 2010 - 15:43 Ásthildur Sturludóttir

Hornstranda spaghetti bolognese

Mér hefur alla tíð þótt spaghettí bolognese vera eitt það besta sem ég veit um enda einstaklega saðsamt, hæfilega subbulegt og hentar vel hráslagalegri íslenskri veðráttu. Mamma býr til óskaplega gott spaghettí bolognese og er örugglega vikulega með það.
29.mar. 2010 - 20:00 Ásthildur Sturludóttir

Saffran Bláskel úr Stykkishólmi með frönskum og alioli

Gamla nágranna mínum úr Ásklifinu í Stykkishólmi, Símoni Má Sturlusyni (ekki bróður mínum) er nú ekki fisjað saman. Hann er alltaf með einhver ný verkefni í gangi til eflingar atvinnulífs í bænum. Síðastliðin ár hefur hann ræktað bláskel (krækling) á böndum út á sundunum við Stykkishólm. Ræktunin hefur gengið ljómandi vel og glæsileg afurð er nú komin á markað sem fæst m.a. í Fylgifiskum í Reykjavík.
19.mar. 2010 - 09:00 Ásthildur Sturludóttir

Humarpasta

Ég eldaði á dögunum þetta spaghettí fyrir konur sem höfðu fengið pastað síðast í vor hjá mér, þá örþreyttar eftir gengdarlausa vinnu í langan tíma. Ég fékk þau skilaboð síðan frá annarri að hana langaði í humarpastað því það hefði kætt sig svo mikið á þessum tímapunkti örþreytunnar, staðan væri eins núna og nú þyrfti hún eitthvað gott og auðvitað varð ég við þeirri ósk.
05.mar. 2010 - 11:00 Ásthildur Sturludóttir

Fermingarpottrétturinn

Ég og Inga vinkona mín vorum að ræða um mat í vikunni eins og svo oft áður. Ræddum um gúllas og hvað  pottréttir væru góðir, sérstaklega þegar margir eru í mat og kalt er úti eins og núna er. Þá rifjaði ég upp fermingarpottréttinn minn, altsvo þann sem eldaður var í fermingarveislunni minni fyrir 150 árum síðan.
25.feb. 2010 - 21:00 Ásthildur Sturludóttir

Mother of all pizzas....

Föstudagar eru pizzudagar hjá mér. Alveg sama hvort ég er ein eða með fleiri þá baka ég pizzu. Ég er nefnilega vanaföst í meira lagi! Þessi pizzubotnsuppskrift hefur verið í  fórum mínum lengi. Hún kemur frá bróður mínum sem er mikill kokkur. Pizzur hafa alla tíð verið vinsælar hjá okkur fjölskyldunni.
11.feb. 2010 - 11:00 Ásthildur Sturludóttir

Valentínusarhryggur

Girnilegur og ljúffengur

Valentínusardagurinn var ekki til í íslenskum kúltúr fyrr en í lok síðustu aldar. Við efahyggjufólkið fljótum bara með og höldum upp á daginn líka, þannig lagað. Er nokkuð slæmt að gleðjast yfir ástinni og allri þeirri hamingju sem henni getur fylgt? Varla.

05.feb. 2010 - 18:00 Ásthildur Sturludóttir

Unaðslegt appelsínusalat

Segja má að þettta appelsínusalat sé ferðalag um afródískar matarlendur. Bragðið er unaðslegt og frískandi. Mjúkt avokado, sætar appelsínur á móti örlítið beisku bragðinu af rucolanu. Þetta getur bara varla verið betra.

30.jan. 2010 - 18:00 Ásthildur Sturludóttir

Rækjukokteill sem rífur í

Rækjur og annað sjávarfang er ofarlega á mínum vinsældarlista. Ég er líka haldin ákveðinni nostalgíu yfir gamaldags mat sem mér þykir þó gaman að breyta með nettu nútímalegu tvisti. Þessi réttur er einmitt þannig og varð til um daginn þegar ég fékk gott fólk í heimsókn sem kann góðan mat að meta.

22.jan. 2010 - 21:00 Ásthildur Sturludóttir

Leyniuppskriftin góða

Mig langar til að deila með ykkur uppskrift af bananatertu sem hefur verið fjölskyldueftirréttur okkar í áratugi. Leyniuppskrift sem hefur ekki verið deilt með nokkrum manni utan fjölskyldunnar áður. Móðursystir mín, Sigríður Gunnarsdóttir, færði mömmu minni tertuna einu sinni og hefur hún verið fastur liður á borðum síðan. Tertan á að minna okkur á hversu gott líf við eigum því hún kemur nefnilega frá Haítí.

14.jan. 2010 - 17:00 Ásthildur Sturludóttir

Rucola- og granateplasalat

Á þessum tíma árs er ekki mikið úrval af grænmeti, allavegana ekki svona brakandi fersku eins og fæst yfir blásumarið. En það má lengi konuna reyna og notast við það sem fæst hverju sinni. Þessu salati fleygði ég saman um daginn þegar ég fékk vini mína alveg óvænt í mat og hafði rétt tíma til að fara á handahlaupum út í búð. Einfalt er það og ótrúlega fallegt en ekki síður gott. Ég splæsti meira að segja furuhnetum á salatið enda „smyglaði“ ég 2 kg af þeim frá Ameríku nú í haust eftir að ég fékk nóg af verðlaginu á þeim hér á landi. Granateplin fást oft og víða, meira að segja stundum í búðinni í Stykkishólmi. Þau eru einstaklega góð, súrsæt og fersk. Svo eru þau svo fögur á að líta. Mér finnst stundum skemmtilegt að hafa eitthvað þema við salatgerðina, t.d. litaþema og það var tekið alla leið í þessum skurði.

07.jan. 2010 - 22:00 Ásthildur Sturludóttir

Nískupasta

Nú er veisluhöldum lokið í bili. Þá er ágætt að slaka aðeins á og draga saman í útgjöldunum og magamáli.

Flestir þurfa þess hreinlega eftir óhóf síðasta mánaðar. Ekki er verra ef hægt er að borða það sem til er í skápunum. Stundum þarf að taka til í þeim líka og ekki alslæmt ef útkoman er bara nokkuð góð. Ég elda þessa sósu mjög oft og vinir mínir hafa aldrei fúlsað við því að vera boðnir í nískupasta. Krökkum þykir það líka gott, þá ef sósan er ekki of krydduð af chili. Er það ekki ágætis mælikvarði? Því bragð er að þá barnið finnur!

30.des. 2009 - 21:30 Ásthildur Sturludóttir

Áramótakalkúnn með landsbyggðartvisti

Um áramótin er alltaf eldaður kalkúnn á mínu heimili, enda hentar þessi máltíð stórum hópi fólks eins og oftast er hjá  okkur um áramótin. Þarna er öllu tjaldað til og eldamennskan tekur allan daginn-þannig lagað.

23.des. 2009 - 10:30 Ásthildur Sturludóttir

Fylltar fíkjur og klassískt hreindýr

Á aðfangadagskvöld eru flestir með löngu fyrirfram ákveðinn matseðil.  Á mörgum heimilum hafa sömu réttirnir verið eldaðir í nokkrar kynslóðir og ekki dettur nokkrum manni í hug að breyta neinu, því án gömlu og góðu siðanna myndu jólin varla koma.

Á mínu heimili voru alltaf rjúpur þar til Siv Friðleifsdóttir, þáverandi umhverfisráðherra, bannaði veiðar á þeim tímabundið. Þá voru góð ráð dýr. Fjölskyldan hélt krísufund þar sem mikil áhætta var tekin með ákvörðun fundarins sem var að svissa yfir í hreindýr. Það höfum við síðan snætt síðustu ár með bestu lyst.

Enginn nefnir rjúpu lengur sem mögulegan jólamat!

17.des. 2009 - 18:00 Ásthildur Sturludóttir

Söru Bernharðs galdurinn

Mér hefur löngum þótt mikil dulúð sveipuð Söru Bernharðskökubakstri. Konur virðast hittast í hópum til að baka þessa dýrð. Og stundum er eins og það sé eitthvert leynifélag að hittast. Mamma og eldri systir mín létu lengi í veðri vaka að þessi bakstur væri aðeins fyrir lengra komna og alls ekki á færi einnar manneskju, hvað þá þeirrar sem lítið kunni fyrir sér í bakstursdeildinni, þá mín altsvo. 

10.des. 2009 - 12:30 Ásthildur Sturludóttir

Ljúffengir lambaskankar í rauðvínssósu og frönsk eplakaka

Á aðventunni er góður tíma til að bjóða í vinum í mat ef einhver hefur tíma. Ég deili hér með ykkur uppskrift sem er mjög vinsæl á mínu heimili. Þetta er klassískur ítalskur réttur, lambaskankar í rauðvíni og grænmeti, eldaðir í gömlum svörtum, emeleruðum potti frá henni ömmu Elínborgu. Mig grunar að svoleiðis pottar leynist í geymslum á fjölmörgum heimilum. 


Ásthildur Sturludóttir

Ásthildur Sturludóttir. BA í stjórnmálafræði frá Háskóla Íslands og MPA próf í stjórnsýslufræðum frá PACE University í New York. Starfar við Háskóla Íslands. Er áhugamanneskja um mat og allt það skemmtilega í lífinu.

Að bjóða í mat er ekki mikið mál og yfirleitt alltaf gaman. Maturinn þarf ekki að vera flókinn og alls ekki dýr. Ef þið hafið eftirfarandi í huga við undirbúninginn, þá ætti fátt að klikka.

1. Bjóðið aldrei leiðinlegum gestum nema brýna nauðsyn beri til.
2. Hafið matseðilinn einfaldan en umfram allt ljúffengan. Lesið uppskriftirnar vandlega.
3. Prófið aldrei að gera eitthvað sem þið hafið ekki gert áður en vandið ykkur hins vegar alltaf.
4. Áætlið innkaup með tveggja daga fyrirvara. Kannið birgðastöðu heimilisins og farið síðan í lágvöruverslanir og verslið skynsamlega. Farið í  sérvöruverslanir ef þörf krefur.
5. Verið skipulögð og reynið að undirbúa sem mest fyrirfram, þá verður allt auðveldara.
6. Leggið fallega á borð, jafnvel kvöldið áður. Maturinn getur verið hversdagslegur en þegar fallega er lagt á borð er alltaf veisla. Dragið fram sparistellið og dúkana (og ekki gleyma að strauja dúkinn!). Kerti og blóm á borðið gera gæfumuninn, tala nú ekki um huggulegar servíettur!
7. Ef þið eigið ekki tilgreind áhöld má alveg nota eitthvað annað í eldhúsinu. Hugsið aðeins út fyrir rammann, nú eða bankið upp á hjá nágrönnum og fáið lánað.
8. Gangið jafnharðan frá svo ekki sé mikið drasl í eldhúsinu. Það er svo leiðinlegt að vaska upp eftir gott partý...
9. Verið að sjálfsögðu í spariskapinu og munið að þetta er gaman.
10. Skálið ef til vill í freyðandi drykk fyrir matinn, nú eða bjóðið upp á kalt sjerrý. Það kætir alla viðstadda.
11. Takið af ykkur svuntuna áður en sest er.
12. Slakið á, þetta reddast allt!

Ragnar H. Hall
Ragnar H. Hall - 15.9.2014
Jón Steinar og Kjarninn
Jón Steinar Gunnlaugsson
Jón Steinar Gunnlaugsson - 16.9.2014
Óheppinn hæstaréttarlögmaður
Ragnar H. Hall
Ragnar H. Hall - 17.9.2014
Aðstoð við Jón fræðimann
Sigurður G. Guðjónsson
Sigurður G. Guðjónsson - 22.9.2014
Lygamörður á ferð
Aðsend grein
Aðsend grein - 18.9.2014
Landsbyggðarvæl?
Jón Steinar Gunnlaugsson
Jón Steinar Gunnlaugsson - 18.9.2014
Eins manns kenning
Hannes Hólmsteinn Gissurarson
Hannes Hólmsteinn Gissurarson - 16.9.2014
Afstaða mín til innflytjenda
Hannes Hólmsteinn Gissurarson
Hannes Hólmsteinn Gissurarson - 23.9.2014
Saga sem Saga vill ekki segja
María Rún Vilhelmsdóttir
María Rún Vilhelmsdóttir - 23.9.2014
Hver ert þú?
Jón Steinar Gunnlaugsson
Jón Steinar Gunnlaugsson - 27.9.2014
Verðandi hæstaréttardómarar?
Fleiri pressupennar