Verstu bréf ársins

Ég upplýsti hér á síðunni fyrir stuttu að fjórir lykilráðherrar hefðu enn ekki fengið bréf frá rannsóknarnefnd Alþingis til þess að andmæla því sem þar kemur fram.

Þetta var í raun staðfesting á að skýrslan gæti ekki komið út 1. febrúar, eins og stefnt var að. Einhvern tíma verður fólk jú að fá til að svara fyrir sig, eins og Siguður G. Guðjónsson hefur meðal annars bent á í góðum pistli hér á pressunni.

Fimmta lykilmanneskjan úr ráðherrahópnum, Þorgerður Katrín Gunnarsdóttir, var ekki kölluð fyrir nefndina, sem er í sjálfu sér stórfurðulegt, þar sem hún var varaformaður sjálfstæðisflokksins, ráðherra og starfandi forsætisráðherra bæði fyrir og eftir hrun.

Þau Geir, Björgvin, Árni og Ingibjörg munu samkvæmt heimildum mínum öll fá bréf til að andmæla frá rannsóknarnefndinni vegna þeirrar gagnrýni sem þar kemur fram á þau og hún verður mikil. Þar er ekki síst um að ræða það sem ekki var gert, eða eins og Tryggvi Gunnarsson nefndarmaður sagði um brotin: ,,sérstaklega hvar hlutir voru ekki gerðir, þá verður maður auðvitað sár og svekktur"

Það er ljóst að þessi bréf verða opnuð með aðeins súrari svip en jólakortin.

En ég hef jafnframt öruggar heimildir fyrir því að um áramótin ætlaði nefndin að skila skýrslunni á tilsettum tíma. Í byrjun janúar var hún á leiðinni í umbrot og allt var klárt. Þetta hef ég fengið staðfest með óyggjandi hætti.

Þetta er því allt hið undarlegasta mál. Óðagotið í kringum blaðamannafund nefndarinnar var ekki beint traustvekjandi.

Hvað gerðist eiginlega á síðustu stundu? Gleymdist andmælarétturinn? Komu fram lykilupplýsingar á síðustu stundu? Var settur pólitískur þrýstingur á nefndina? Þessu verður að svara til að skýrslan öðlist þann trúverðugleika sem nauðsynlegur er.