Siðblinda

Siðblinda er áhugavert fyrirbæri. Þegar maður skoðar skilgreiningar helstu sérfræðinga heims á sviði sálarfræði á þessum kvilla kemur ýmislegt í ljós sem því miður er orðið kunnuglegt úr umræðunni á Íslandi.

Grípum niður í einkennalistann: ,,Ótrúlegar hugmyndir um eigið mikilvægi, stundar sjúklegar lygar, þjáist af algjörum skorti á samviskubiti eða eftirsjá, stjórnsemi, skorti á samhyggð, grunnum tilfinningum, ábyrgðarleysi, hefur stöðuga þörf á örvun, hann hrjáir mikill leiði, hefur litla stjórn á eigin hegðun, hvatvísi, o.s.frv. , o.s.frv.

Því miður höfum við séð þessa eiginleika ítrekað undanfarið í fari ákveðinna manna. Það er ekki síst miður fyrir þá sjálfa, því að lífsgæði þess sem þjáist af siðblindu eru lítil. Gleymum því ekki að þetta er skilgreindur sjúkdómur samkvæmt DSM IV greiningarkerfinu, sem sálfræðingar og geðlæknar um allan heim notast við.

Ég tek undir orð Páls Skúlasonar fyrrverandi rektors Háskólans. Þessir menn þurfa umfram annað hjálp.