Sandkassi fyrir fullorðna

Frambjóðendurnir halda áfram! Eftir að ég grátbað um að vera látinn í friði á Feisbókinni heldur böggið áfram eins og enginn sé morgundagurinn. Rökhugsunin segir mér að af þessu sé aðeins hægt að draga fjórar ályktanir.

1) Frambjóðendurnir lásu ekki pistilinn minn.

2) Frambjóðendurnir eru treggáfaðir.

3) Frambjóðendunum er illa við mig.

4) Frambjóðendurnir þjást af áfallastreituröskun vegna áfalla í æsku, þegar þeir báðu vini sína ítrekað um að koma að leika og fengu alltaf höfnun.

Tilfinningin segir mér samt að skýringin sé engin af þessum. Maður verður að grípa í sjálfan frelsarann til að skilja þetta og sýna því umburðarlyndi.

,,Fyrirgefið þeim því þeir vita ekki hvað þeir gjöra“

Vélmennahegðun stjórnmálamanna er orðin svo innilega rótgróin að þeir geta ekki lengur að því gert. Frjáls vilji er horfinn. Svo átakanlega mikil er liðshugsunin að harðkjarninn af stuðningsmönnum Newcastle ( þeir dyggustu í enska boltanum) yrði stoltur af heilaþvættinum.

Ég hef þurft að ýta á ignore takkann 7 sinnum á einn og sama frambjóðandann EFTIR að ég bað um að vera látinn í friði og 5 af þessum beiðnum komu frá honum sjálfum. Hvernig vini átti þessi einstaklingur í æsku? Þurfti hann alltaf að biðja tuttugu sinnum áður en vinurinn kom út í sandkassa?