Milljarðarnir sem mygla

Þriðja ráðleggng til yfirvalda á Íslandi: KOMIÐ PENINGUNUM Í UMFERÐ. TIL ÞESS ERU ÞEIR!

Stjórnmálamenn hafa mikið talað um að á Íslandi séu ekki til neinir peningar núna. Það er ekkert skrýtið, enda er mikill niðurskurður í gangi hjá hinu opinbera. Það er hins vegar rangt að hér séu ekki til neinir peningar. Það er bara ekkert gert til að koma þeim í umferð og láta þá vinna fyrir okkur. Erlendir fjárfestar eiga milljarða ofan á milljarða sem þeir vilja ekki fara með úr landi og skipta í Evrur á genginu 300. Þeir eru að bíða eftir möguleikanum á að gera eitthvað við þessa peninga hér á landi.  MP banki liggur með tugi milljarða inni í Seðlabanka, sem enginn notar. Svona mætti lengi halda áfram. Þessir peningar bíða inni í bönkum og gagnast engum, jafnvel þó að eigendurnir vilji endilega gera eitthvað með þá.

Ofan á þetta má svo ekki gleyma því að í október 2008, þegar allt hrundi var 75% af seðlaforða Íslands kippt út úr bönkunum. Ekki nema hluti þessa hefur skilað sér aftur. Út um allan bæ eru peningar undir koddum og í peningaskápum. Það verður að reyna að endurvekja traust og hvetja fólk til að gera eitthvað við þessa peninga.

Það hljómar ótrúlega en ég hef aftur og aftur hitt tengiliði við erlenda og innlenda fjárfesta sem segja nákvæmlega sömu söguna: ,,Það vantar ekki peninga, heldur verkefni og fyrst og fremst vilja stjórnvalda til að koma hlutunum af stað á ný.“

Það er alvarlegt mál þegar atvinnuleysi er jafn mikið og nú er að stjórnvöld skuli ekki gera allt sem þau geta til að liðka fyrir því að þessum peningum verði komið í umferð. Nú þarf hverja krónu í umferð í hagkerfinu. Þannig kýlum við Ísland aftur í gang árið 2010.