Kolsvört rannsóknarskýrsla

Rannsóknarskýrsla Alþingis verður mikill áfellisdómur yfir stjórnmálamönnum OG bankamönnum. Þetta hef ég eftir afar traustum heimildum.

Skýrslan er komin í umbrot og verður tilbúin fyrir 1. febrúar og þannig væri í raun hægt að birta hana einhvern tíma seinni hlutann í janúar. Hins vegar er líklegt að Alþingi muni draga eitthvað að birta hana, þó væntanlega ekki nema einhverjar vikur í mesta lagi. 

Allt síðasta haust ræddi ég við háttsett fólk í stjórnmálunum og fyrrverandi lykilmenn innan gömlu bankanna. Bankamennirnir sögðust margir vera tilbúnir í viðtal þegar skýrsla rannsóknarnefndarinnar kæmi út.

Þegar ég spurði: ,,hvers vegna ekki fyrr?,“ var svarið alltaf efnislega á sömu leið. ,,Þá verður viðsnúningur í umræðunni og spjótin munu fyrst og fremst beinast að stjórnmálamönnum og embættismannakerfinu.“

Einhverra hluta vegna virtust þeir allir sannfærðir um þetta. Að sama skapi virtust stjórnmálamennirnir sannfærðir um að skýrslan yrði fyrst og fremst áfellisdómur yfir stjórnendum og eigendum bankanna og í henni yrði ábyrgð þeirra loksins dregin að fullu fram.

Nú er ég búinn að reyna að komast til botns í þessu um skeið og samkvæmt öruggum heimildum sem ég hef aflað mér verður þetta ekkert annað hvort eða. Skýrslan verður svört og verður bæði þungur áfellisdómur yfir vinnubrögðum stjórnmálamanna og bankamanna.

Orð Páls Hreinssonar frá því í sumar um að engin nefnd hafi þurft að færa þjóð sinni jafn slæmar fréttir og rannsóknarnefndin eru engin tilviljun.

Ég vil hins vegar færa rök fyrir því að þetta séu ekki alls kostar slæmar fréttir fyrir þjóðina, eins og Páll segir, því að í þessu tilviki eru slæmar fréttir í raun góðar fréttir. Hvítþvottur og klapp á bakið væri verra en biksvört skýrsla.

Það sést kannski best á því að þjóðinni þykja það slæmar fréttir að ákveðnir menn hafi ekki verið kallaðir fyrir rannsóknarnefndina, sem flestum finnst að þar hefðu átt að vera. Það mun þó ekki þýða að skýrslan verði bara almennt orðað spjall.

Gleymum því ekki að rannsóknarnefndin samkeyrði meðal annars skuldastöðu stjornmála- embættis- og fjölmiðlamanna í öllu bankakerfinu. Þaðan og af fleiri stöðum er hægt að fá upplýsingar án yfirheyrslu.