Hreiðar viðurkennir að hafa sjálfur borið ábyrgðina

Spurning mín var eftirfarandi: Hver ákvað að millifæra sparifé fólksins á Mön til Íslands og hvers vegna?

Svar Hreiðars Más:

,,Ég sem forstjóri Kaupþings bar ábyrgð á þeirri ákvörðun að færa innstæður á Mön undir móðurfélagið á Íslandi. Alsiða er að bankar með starfsemi á Mön noti innstæður þar til að fjármagna móðurfélögin. Það var hins vegar að kröfu fjármálaeftirlitsins á Mön að innstæðurnar voru aftur færðar til Kaupthing Singer & Friedlander (KSF) í Lundúnum. Hefðu innstæðurnar verið áfram hjá móðurfélaginu á Íslandi væri fyrir löngu búið að gera að fullu upp við alla innstæðueignedur á Mön, líkt og gert var við alla innstæðueigendur Kaupþings banka hf. í Noregi, Finnlandi, Þýskalandi, Svíþjóð og víðar.

Eins og staðan er núna hefur öllum innstæðueigendum á Mön verið greiddar innstæðutryggingarupphæðin sem er 50 þúsund pund sem er að jafnvirði rúmlega 10 milljónum króna. Þeir sem áttu hærri innstæður hafa að auki þegar fengið greidd 40% innstæðna sinna. Áætlanir gera ráð fyrir að samtals munu innstæðueigendur fá á bilinu 90%-95% af innstæðum sínum til baka. Þetta er tafsamt ferli og má ætla að því ljúki árið 2012. Ég harma það að fjölmargir einstaklingar sem höfðu innstæður hjá KSF á Mön hafi lent í vandræðum og sumir munu jafnvel tapa 5-10% af innstæðum sínum. En held mig við þá skoðun mína að þetta er ekki svartasti bletturinn á íslenska bankahruninu eins og þú hélst fram."