,,Ekkert sem ekki þolir dagsljósið"

Ég sagði frá því hér á síðunni fyrir skömmu að nokkrir af tólfmenningunum sem fengu tækifæri á að andmæla rannsóknarskýrslunni hafi nánast orðið hissa á því hve lítið nýtt væri um þá í skýrslunni.

,,Ekkert sem ekki þolir dagsljósið“

Eru orð sem einn þeirra notaði um innihaldið.

Sigurður G. Guðjónsson lögmaður greindi frá því í viðtali hjá mér á miðvikudaginn að hann hefði séð hluta af skýrslunni.

,,Alveg nógu margar blaðsíður“

eins og hann orðaði það. Í þeim sagði hann að væri ekkert til þess að tárast yfir.

Eftir að hafa grennslast betur fyrir um þessi mál get ég upplýst að um einn tólfmenninganna verða tólf síður í rannsóknarskýrslunni. Í þeim er ekkert nýtt. Mestmegnis umræður um það hvað hefði verið hægt að gera öðruvísi.

Um annann lykilmann sem var kallaður fyrir nefndina og fékk tækifæri til að andmæla verða tíu blaðsíður. Í þeim er heldur ekkert nýtt. Einu ásakanirnar sem þar koma fram eru hvers vegna ákveðnir hlutir voru ekki gerðir.

Ég hef líka fengið það staðfest með öruggum leiðum að um að minnsta kosti þrjá af ráðherrunum fjórum sem voru kallaðir fyrir nefndina og fengu tækifæri til andmæla mun ekkert alvarlegt standa í skýrslunni. Ég hef ekki náð upplýsingum um þann fjórða og síðasta.

Eigi skýrslan að standa undir þeim gífurlegu væntingum sem búið er að byggja upp er eiginlega eini möguleikinn að eitthvað mjög misjafnt komi fram um bankamenn, þar sem þeir hafa jú engan rétt til andmæla eins og opinberir starfsmenn. Ekki er öll nótt úti enn. Vonum að þetta verði ekki eins og leikþátturinn sem við Þorleifur Arnarsson settum upp í síðasta þætti um þetta mál og sjá má hér að neðan. Það yrði ekki í fyrsta skipti sem grín okkar yrði miklu nær raunveruleikanum en okkur hefði grunað.