Ég skal lána ríkinu spariféð mitt á þessum kjörum

Vaxtakjörin sem Íslendingar höfðu samið um við Breta og Hollendinga voru á alla mælikvarða mjög há. Allir sem starfað hafa í fjármálaumhverfi gætu vottað fyrir það. Ég hef gengið á milli fjölda manna sem hafa unnið í banka- og fjármálaumhverfi í fleiri ár. Þeim ber öllum saman um að þetta séu mjög háir vextir. Veðin sem liggja að baki eru launaseðlar allra Íslendinga á næstu árum. Þetta eru tryggustu veð sem hægt er að fá. Samt eru vexirnir hærri en á lánum til venjulegs einstaklings á Evrusvæðinu.

Ég væri til í að lána spariféð mitt á þessum kjörum með svona veðum.

Það er óskiljanlegt hvernig nokkur getur leyft sér að halda því fram að þetta hafi verið góð kjör. Meira að segja borgarar með íslenskt ríkisfang fá betri kjör en þetta í breskum bönkum. Ég þekki Íslending sem fékk húsnæðislán upp á 4,25% í Bretlandi.

Bretar borguðu innistæðurnar á Icesave og lánuðu okkur fyrir því. Kjörin sem þeir fjármögnuðu greiðslur innistæðnanna á eru 1,75%. Á milli þeirra kjara og vaxtanna sem við áttum að greiða eru 3,75%. Þetta gat skiptir ekki öllu máli ef þú ert að borga af einu sjónvarpi eða þvottavél. En þegar þú ert að borga vexti af 700 MILLJÖRÐUM í sjö ár, skiptir þetta ÖLLU máli. Í raun er mjög líklegt að þetta sé mikilvægasti hluti Icesave samningsins.

Það hvort við borgum 5,5% vexti eða 3,5% svo dæmi sé tekið er munur upp á um það bil 15 milljarða á ári. Ef við höldum aðeins lengra þá geta 15 milljarðar á ári verið munurinn á góðu og lélegu heilbrigðiskerfi. Þessi upphæð breytir hins vegar engu á mælikvarða Breta. Hún er ekki einn tuttugu þúsundasti af þjóðarframleiðslu þeirra.

Það er því mjög erfitt að skilja hina ótrúlegu óbilgirni þeirra í samningunum. Það hlýtur að vera hægt að ná vöxtunum niður. Það er næsta skref í mesta klúðurmáli Íslandssögunnar.