Dorrit í lykilhlutverki

Hér er tilgáta sem hefur verið hvíslað að mér og ég tel líklega. Hún snýr að því hvað forsetanum gengur til með ákvörðun sinni um Icesave-lögin. Ólafur Ragnar Grímsson metur stöðuna þannig að andrúmsloftið í Hollandi og Bretlandi hafi breyst mikið síðustu mánuði. Svo mjög að við getum alveg örugglega náð betri samningi í Icesave málinu. Ólafur er mjög vel tengdur í alþjóðasamfélaginu og ekki síst í Bretlandi í gegnum Dorrit konu sína, sem á vinafólk í innsta valdakjarna bresks samfélags. Við skyldum ekki vanmeta þessi sambönd.

Mikilvægasti hlutinn í Icesave málinu fyrir Ísland eru vaxtakjörin og enis að ná því í gegn að eignir Landsbankans gangi strax upp í skuldina, svo að við göngum á höfuðstólinn undir eins. Eignir Landsbankans munu að öllum líkindum duga fyrir skuldinni á endanum og jafnvel rúmlega það. Margt bendir til að hluti eignanna hafi verið vanmetinn og strax á næstu mánuðum losna meira en eitt hundrað milljarðar af eigum Landsbankans í beinhörðum peningum og svo má lengi halda áfram. Með öðrum orðum. Það er galið sem sumir hafa haldið fram að við munum borga höfuðstólinn að mestu leyti. Það gerist aldrei.

Þá komum við að vöxtunum. Þá losnum við ekki við að borga og þeir eru háir. Forsetinn er sagður vongóður um að við gætum mögulega náð þessu bili verulega niður, jafnvel um 2-3%. Það yrði sparnaður fyrir íslenska skattgreiðendur upp á 15-20 milljarða á hverju einasta ári næstu 7 árin. Ef þetta plan heppnast er ljóst að allur fórnarkostnaður við synjun laganna nú verður vel þess virði og miklu meira en það. Þessi leikflétta yrði stærsti sigur íslands í Icesave málinu og besta mögulega lausn sem þetta ömurlega mál gæti fengið fyrir hönd íslensks almennings. Vonum að það gangi eftir.