Brilljant frammistaða

Frammistaða Ólafs Ragnars Grímssonar á BBC var frábær. Spyrillinn, Jeremy Paxman er margverðlaunaður og þekktur fyrir að jarða viðmælendur. Frægastur er hann fyrir að hafa spurt Michael Howard, fyrrverandi innanríkisráðherra Breta, sömu spurningarinnar 14 sinnum í röð þegar hann reyndi að drepa málinu á dreif. Paxman byrjaði viðtalið við Ólaf með látum og ætlaði greinilega að hakka hann í sig. Það sem á eftir fór var á alla mælikvarða brilljant frammistaða viðmælandans. Hún var svo góð að spyrillinn neyddist til að gefa hressilega eftir. Ólafi tókst það sem engum öðrum íslenskum ráðamanni hefur tekist undanfarna 15 mánuði. Að koma fram á áberandi vettvangi í útlöndum og brillera fyrir hönd þjóðarinnar.

Svo held ég að spyrillinn hafi hjálpað málstað Ólafs með einstaklega einstrengingslegum inngangi sem stenst ekki skoðun. Setning hans í byrjun umfjöllunarinnar ,,the fate of part of the gaping hole in our public financis now rests on the decision of a country with the population the size of Wigan," er í einu orði sagt ömurleg. Icesave upphæðin er klink á mælikvarða Breta og óbilgirni þeirra í málinu er á engan hátt réttlætanleg.

Ég hef tekið ítarleg viðtöl við alla helstu ráðamenn Íslands eftir hrunið og Ólafur er erfiðastur viðureignar. Ólíkur Davíð Oddssyni og Ingibjörgu Sólrunu, sem bæði eru líka klók í viðtölum á sinn hátt. Þegar ég hafði lokið við að taka viðtal við Ólaf fyrr í haust var ég pínulítið óhress. Ég undirbjó mig gífurlega vel, en að viðtalinu loknu fannst mér að Ólafur hefði náð að taka stjórnina á lúmskan hátt. Hann beitir jafnan þeirri taktík að tala spyrla í kaf og hleypa þeim ekki að ef því er að skipta. Ég var ofurmeðvitaður um þetta og fór í viðtalið undir þeim formerkjum. Þrátt fyrir að þó nokkrir hafi haft samband við mig og verið sáttir við viðtalið var ég með einhver ónot í maganum.

Ég er ekki jafnósáttur eftir að hafa séð einn besta sjónvapsspyril Breta falla í nákvæmlega sömu gryfju. 

Ég ítreka það í tilefni af ömurlegum skotgrafarhernaðinum sem ríkir á Íslandi núna að þetta hefur ekkert með skoðanir mínar á ákvörðun hans að gera.