Athyglissýki

Ég skrifaði hér á síðuna fyrir skömmu um sögu ungrar konu sem reyndi að fyrirfara sér, en var síðan send heim nokkrum klukkutímum eftir að hún kom á geðdeild. Hún hafði tekið svo mikið af lyfjum að margir hefðu ekki þolað það.

Lesandi síðunnar sendi mér merkilega ábendingu eftir þessa færslu. Árið 2000 spurði Ásta Ragnheiður Jóhannesdóttir þingmaður um sjálfsvíg á Alþingi og fékk þessi svör úr gögnum um heilbrigðismál:

“Á þessum árum voru 269 tilfelli sjálfsvígstilrauna skráð vegna lyfjaeitrunar eða að meðaltali um 90 á ári. Þegar lyfjaeitrun er skráð getur ástæða hennar verið mismunandi, svo sem sjálfsvígstilraun, ofnotkun lyfja eða áfengismisnotkun, ofskömmtun lyfja, „vekja athygli“, slys o.fl.”

Ég feitletraði orðin ,,vekja athygli,“ þar sem mér finnst þessi skýring með ólíkindum ósmekkleg. Takið líka eftir gæsalöppunum. Hvaða tilgangi þjóna þær þarna?

Þó að vissulega látist fólk ekki alltaf þegar það reynir sjálfsvíg er ekki þar með sagt að það sé að reyna að vekja á sér athygli. Þeim sem tekur lyf í þessu magni í algerri örvæntingu líður þannig að það verður að taka alvarlega. ALLTAF!

Það er löstur á velferðarríki að taka með þessum hætti á vandamálum ungs fólks sem líður svo illa að því langar ekki að lifa lengur. Það má ekki undir nokkrum kringumstæðum gerast að fólk sem reynir sjálfsvíg sé sent á götuna þegar búið er að koma því inn á spítala. Svoleiðis gerist ekki í mannúðlegu og almennilegu samfélagi.