45 mínútur Davíðs

Síðast þegar Ólafur Ragnar Grímsson synjaði lögum staðfestingar lét hann Davíð Oddsson, þáverandi forsætisráðherra, vita með 45 mínútna fyrirvara. Þeir sem hafa spurt Ólaf út það hvers vegna hann hafi tjáð Davíð þetta fyrirfram segja að hann svari því til að hann hafi viljað sýna ríkisstjórninni og forsætisráðherranum viðeigandi kurteisi.

Þegar hann endurtók leikinn núna og synjaði aftur lögum staðfestingar fékk ríkisstjórnin að vita það 6 mínútum EFTIR að fréttamannafundur hans hófst. Kurteisin í garð gömlu bandamanna forsetans var greinilega minni en í garð sjálfs erkióvinarins Davíðs.

Ég hef fengið það staðfest að á þingflokksfundi Samfylkingarinnar daginn sem Ólafur Ragnar Grímsson synjaði lögunum um Icesave var töluvert rætt um þessi þrjú korter sem Davíð fékk síðast, en ríkisstjórnin fékk ekki nú. Voru margir afskaplega ósáttir og fannst forsetinn endanlega hafa klippt á alla sína pólitísku vini.

Þetta mátti best sjá á viðbrögðum utanríkisráðherrans Össurar þegar hann var spurður um Indlandsför forsetans þennan sama dag. Svör hans sýndu augljóslega hvað honum fannst um forsetann þann daginn. Samband Össurar og Ólafs hefur alltaf verið mjög náið og á milli þeirra hefur verið pólitískt handaband í gegnum allan feril Össurar. Nú er þetta allt breytt.

Það er stundum sagt að vika sé langur tími í pólitík. Þann tíma má stytta niður í þrjú korter!