Viltu taka þátt í endurreisn atvinnulífsins?

Undir þessari fyrirsögn auglýsir samkeppniseftirlitið eftir lögfræðingi, viðskiptafræðingi eða hagfræðingi í Morgunblaðinu 24. október.  Samkvæmt auglýsingunni á sá sem verður ráðinn að bera ábyrgð á úrlausnum samkeppnismála á fjölbreyttum sviðum atvinnulífsins, greina og fylgjast með samkeppnisstöðu fyrirtækja á tilteknum mörkuðum.

Í störfum mínum sem lögfræðingur hef ég ekki orðið vitni að því að samkeppnisyfirvöld hafi stuðlað að uppbyggingu atvinnulífs. Þvert á móti hefur aðgerðarleysi samkeppnisyfirvalda frekar verið fallið til þess að drepa eða kæfa í fæðingu fyrirtæki, sem ætlað var að bjóða hinum stóru á markaðnum birginn.

Samkeppniseftirlitið afgreiðir engin mál skilvirkt og skjótt eins og því ber.  Má í þessu minna á kvörtun Iceland Express á hendur Flugleiðum vegna verðlagningar á ferðum til London og Kaupmannahafnar  í árdaga Iceland Express.  Annað og nýlegt dæmi  um  óhóflegan drátt samkeppniseftirlitsins á afgreiðslu einfaldrar kvörtunar, er mál lyfsalans á Akranesi , sem nýlega  átti tveggja ára afmæli í meðförum samkeppniseftirlitsins.  Vonandi tekst honum að þrauka í samkeppni við lyfsölurisana tvo, sem hafa skipt lyfjamarkaðnum hér á landi milli sín, þó samkeppniseftirlitið sjái það ekki.

Saga samkeppniseftirlitsins er  því marki brennd, að engar líkur eru á því að tilvist hennar skipti nokkru við endurreisn atvinnulífsins.

Hver hefur t.d. orðið varir við aðgerðir stofnunarinnar til að hemja ríkisflugfélagið  Icelandair, ríkisbílaumboðinu Heklu, ríkisbókaversluninni Eymundsson  í samkeppni ríkisfyrirtækja þessara  við fyrirtæki í einkaeigu?

Betra hefði verið fyrir samkeppniseftirlitið að auglýsa eftir fólki, sem taka vill þátt í að drepa samkeppni í íslensku atvinnulífi.