Davíð og pukrið

Leiðarahöfundur Morgunblaðsins er óánægður með pukrið og leyndina sem hvílt hefur yfir og hvílir enn yfir Icesave-samningnum.  Það er gott til þess að vita að Morgunblaðið vilji nú standa vörð um upplýsta umræðu í samfélaginu, það hefur ekki verið aðalsmerki þess hingað til.

Morgunblaðið hefur gegnum tíðina verið málgagn íslenska íhaldsins. Þegar ritstjórn Morgunblaðsins sýndi tilburði til sjálfstæðra skoðana svo sem í sjávarútvegsmálum, sem ekki féllu þáverandi forsætisráðherra í geð, hóf sá síðarnefndi að bera út sögur um skuldir annars  ritstjóra Morgunblaðsins með atbeina hjarðsveinsins Hannesar H. Þar með náði forsætisráðherrann, sem nú er ritstjóri  Morgunblaðsins, tökum á ritstjóranum, sem um leið varð ein af mörgum strengjabrúðum forsætisráðherrans.

Nú hefur forsætisráðherrann  fyrrverandi sest í stól ritstjórans. Mogginn hans er ekki sæll með pukrið og leyndina í stjórnsýslunni. Taka má undir það með ritstjóranum að pukur og leynd á ekki að þekkjast þar. Kannski væri ástandið á Íslandi betra, ef Davíð Oddson og Halldór Ásgrímsson hefðu ekki pukrast með  einkavæðingu ríkisbankanna  í upphafi þessarar aldar.