Danshöfundurinn Hannes

Það fór sem mig grunaði, að grein mín á Pressunni um Icesave kæmi til með að fara illa í Davíð Moggaritstjóra. Ég vissi líka að úr hans ranni  væri ekki að vænta efnislegrar andsvara. Efnislega umræða  er og hefur verið honum ofviða alla hans pólitísku tíð. Þennan vanmátt sinn hefur hann falið með spaugsyrðum í tíma og ótíma; nú hefur hann Staksteina Moggans, sem umfangs sín vegna kalla hvorki á mikið hand- né hugverk. Ég vissi líka að prófessorinn í Háskóla Íslands, Hannes Hólmsteinn Gissurarson, mundi verja fóstra sinn Davíð og Flokkinn, sem fóstrað hefur þá lagsbræður lengi.

Sögur og spaugsyrði Davíðs létta oftast lund. Stundum hefur hann þó farið yfir strikið og í raun verið rætinn, eins og í sögunni af ritstjóranum, sem hann fullyrti að skuldaði 100 milljónir í bönkum hér á landi. Saga þessi fór svo fyrir brjóstið á einum samráðherra Davíðs í fyrstu ríkisstjórn hans, að ráðherrann sá sig tilknúinn til að leiðrétta sögu Davíðs og sagði ritstjórann aðeins skulda 66 milljónir.  Hvað er satt eða logið í þessari frásögn kemur vonandi í ljós bráðum.

Best er hins vegar að leiða skrif prófessors Hannesar hjá sér. Slagur við hann er eins og að slagur við skunk, lyktin fylgir manni.  Um skrif Hannesar má þó segja, að í þeim gætir sjaldnast þeirrar nákvæmni sem vænta má í skrifum prófessora við Háskóla Íslands.  Er Hannes  að því leyti blettur á þeirri ágætu stofnun, eins og dómar á hendur honum sýna. Það er ekki við skólann að sakast heldur menntamálaráðherrann, sem færði stofnunninni frjálshyggjuprófessorinn.

Til upplýsingar fyrir Hannes og til þess að létta honum rannsóknarvinnu um líf mitt og störf,  er rétt að taka fram:

Ég hef aldrei, hvorki fyrr né síðar, veitt Landsbanka Íslands lögfræðiráðgjöf. Hef heldur aldrei verið lögfræðingur eins eða neins útrásarvíkings.  Hef hins vegar glímt við nokkra þeirra fyrir skjólstæðinga mína. Ég kom inn í stjórn Fons að beiðni gamals skjólstæðings míns, Pálma Haraldssonar, eftir bankahrun haustið 2008. Sit nú í stjórn Iceland Express - þér yfirsást það, Hannes!  Hjá fyrirtækjaskrá Ríkisskattstjóra getur þú svo séð í hvaða félögum öðrum ég sit í stjórn eða varastjórn. Fyrirtækjaskrá er til húsa í sama húsi og sérstakur saksóknari. Þú ert sennilega ekki á leið þangað, enda ekkert lagt af mörkum í íslensku atvinnulífi annað en róginn um þá sem Davíð og Flokkurinn hafa haft ímugust á.

Ég er  stoltur af setu minni í stjórn Glitnis banka síðustu mánuði hans. Því stjórn sú, sem Þorsteinn Már stýrði, setti sér skýr aðhaldsmarkmið um rekstur bankans. Bankinn var hins vegar laskaður þegar stjórn Þorsteins tók við.  Þó ekki laskaðri en svo, að Davíð Oddsson vildi festa í honum litla 82 milljarða af ríkisfé án heimildar í lögum (svipað og Icesave). Geir og Árni settu svo skömmu fyrir bankahrunið 11 milljarða í sjóð 9 í eigu Glitnis fyrir Illuga Gunnarsson þingmann Sjálfstæðisflokksins svo opna mætti sjóðinn á þriðja degi þjóðnýtingar. Ekki gott fyrir þingmanninn  og Flokkinn, ef viðskiptavinir sjóðsins hefðu tapað miklu.  Vel farið með almannafé þar í þágu góðs málsstaðar.

Ég  er líka stoltur af því að eiga LL-eignir.  Félag þetta átti m.a. lítinn hlut í óskabarni Davíðs, deCode, sem nú er gjaldþrota og Kári Stefánsson orðinn óreiðumaður.

 Auk þess á ég í Dýrfiski og nokkur önnur félög.  Ekkert þessara félaga hefur dansað gullkálfsdansinn, sem þú ert höfundur að.

Að lokum máttu svo vita, að Dýrfiskur er lítið fiskeldisfélag með starfsemi bæði í Dýrafirði og Tálknafirði. Félagið tók til starfa 6. nóvember 2008 – mánuði eftir bankahrunið; setti þá í sjókvíar á Dýrafirði um 30 þúsund  200 gramma seiði regnbogasilunga. Félagið skapar nú þremur mönnum fulla vinnu og kallar á ýmsa þjónustu bæði nær og fjær. Fyrsta slátrun stendur yfir og stefnir í að seiðin gefi af sér um 50 til 60 tonn af regnbogasilungi; silungi sem kemur til með að skila þjóðarbúinu nokkrum gjaldeyristekjum á þessu ári og vonandi enn meiri tekjum þegar slátrað verður þeim liðlega 300 þúsund seiðum sem nú eru í eldi; tekjum sem munu nýtast til að greiða niður óreiðuskuldir þær, sem Sjálfstæðisflokkurinn og Davíð Oddsson hafa lagt á þjóðina, meðal annars með gjaldþrota Seðlabanka, ónýtum Tryggingarsjóði og Icesave.

Mér er þannig öfugt farið við þig Hannes. Mottó mitt  í lífinu hefur ávallt verið að láta verkin tala og vinna þau á eigin kostnað;  ekki bara tala  á kostnað skattgreiðenda.  Nægar eru byrðar skattgreiðenda af þér og þínum líkum. Fólkinu og Flokknum sem vildi báknið burt en tókst á valdatíma Davíðs og Geirs að margfalda umfang þess svo koma mætti þér og þínum líkum fyrir á ríkisjötunni.

P.S. Sigríður Andersen og aðrir ungir Flokksmenn ættu kannski að safna fyrir legsteini frjálshyggjunnar.