Baldur og Konni á öndverðum meiði!

Í Staksteinum  ritstjórnar Morgunblaðsins þann 9. desember var mér og forsetanum líkt við Baldur og Konna. Ástæða þess var sú að ég hafði nokkru áður  látið þá skoðun mína í ljós opinberlega að forsetinn ætti að staðfesta svokölluð Icesavelög samþykkti Alþingi frumvarp fjármálráðherra þar um. Moggaritstjórnin tók þessi orð mín sem vísbendingu um afstöðu forsetans, sem talaði í gegnum mig til þjóðarinnar, eins og Baldur í gegnum brúðuna Konna forðum. 

Nú blasir það hins vegar við ritstjórn Moggans að Baldur og Konni eru á öndverðum meiði, þó samherjar séu.  Það er hins vegar spurning hvort afstaða ritstjórnar Morgunblaðsins til Ólafs Ragnars Grímssonar forseta Íslands og valdmarka forsetaembættis gagnvart Alþingi og ákvörðun þess hafa eitthvað breyst í kjölfar atburða gærdagsins. En í niðurlagi Staksteina þann 9. desember sagði.

Er búið að segja síðasta orðið ? Er þetta hið endanlega svar sem um fjörutíuþúsund Íslendingar munu fá við bænagjörð sinni til forsetans ?

Sé svo hafa ekki endilega mikil tíðindi orðið. Ólafur Ragnar getur áfram setið í sínu embætti að miðju ári 2012. Hann mun áfram vera forseti . En ekki þjóðarinnar. Þeir Ólafur og Sigurður verða áfram óaðskiljanlegir  eins og reyndar Baldur og Konni voru til síðustu stundar. En þjóðin, hvað mun hún gera ef þetta verður niðurstaðan. Hún mun taka þessu eins og öðru og hún mun telja dagana til miðs árs 2012.

Nú þegar forsetinn hefur öðru sinni synjað lögum staðfestingar og beint þeim til þjóðarinnar burt séð frá því hvaða flokkar eru við völd og burt séð frá því hvert málefnið er, hlýtur forsetinn, Ólafur Ragnar, að vera forseti þjóðarinnar, að mati Morgunblaðsins og ritstjórnar þess.

Stuðningur minn við forsetann hefur ekkert breyst þó okkur hafi greint á í þessu máli, eins og svo mörgum öðrum á lífsleiðinni.

Nú er það þjóðarinnar að sýna ábyrgð og samþykkja Icesavelögin. Enginn ágreiningur er um greiðsluskylduna samkvæmt yfirlýsingum talsmanna, InDefensehópsins, Framsóknar- og Sjálfstæðisflokks.