Aumingja Ísland

Félagsmálaráðherra var í Kastljósi ríkisins í gærkveldi. Ráðherrann endurtók þar orð sín úr morgunútvarpi ríkisins fyrr í þessari viku, að ekki kæmi til greina að leiðrétta húsnæðislán allra lántakenda  heldur aðeins þeirra, sem ekkert ættu og ekkert gætu borgað.

Ráðherrann reyndi með óljósu táknmáli og handapati í Kastljósþættinum að sannfæra viðmælanda sinn og áhorfendur væntanlega líka um að þessi aðgerð leiddi ekki til neins tjóns fyrir lánveitendur (sem nú er ríkið)  – féð sem færi forgörðum við þessa aðgerð  væri hvort sem er þegar  glatað.

Félagsmálaráðherra ítrekaði jafnframt í Kastljósi gærkveldsins að ríkisstjórnin ætlaði ekki að fara að færa þeim gjafir, sem enn gætu borgað af lánum sínum. Það vefst nokkuð fyrir mér að skilja þetta sífellda gjafa- og örlætisgerningatal ráðherrans þegar sú staðreynd  blasir við öllum lántakendum húsnæðislána að lán þeirra hækkuðu um tugi prósenta á árinu 2008 vegna óðaverðbólgu og gengishruns.

Hvorutveggja var á ábyrgð stjórnvalda. 

Mér vitanlega óskaði enginn lántakandi eftir þessum  hækkunum skulda sinna; hækkunum sem aðeins hafa skert lífskjör lántakenda og fjölskyldna þeirra.

Ég fæ því ekki séð hvernig það getur verið gjöf til lántakenda þó ríkisvaldið létti þessari óumbeðnu hækkun lánanna að nokkru af  og geri lántakendum með því  kleyft að lifa mannsæmandi lífi á ný. 

Sanngjörn leiðrétting húsnæðislána felur hvorki í sér örlætisgerning né gjöf til lántakenda og verður því trauðla færð undir tekjuhugtak tekjuskattslaga nr. 90/2003.  Teljist leiðréttingin tekjur má auðveldlega  breyta því eins og lög nr. 46/2009 um breytingu á tekjuskattslögunum sanna.

Framangreind afstaða félagsmálaráðherra, sem hlýtur að endurspegla vilja ríkisstjórnarinnar og meirihluta alþingis, felur í sér kaldar kveðjur til þess stóra hóps fólks, sem ávallt hefur staðið við skuldbindingar sínar - fólksins sem hvorki hefur tekið Austurvöll yfir með hrópum, skrílslátum og eyðileggingu  í nafni lýðræðisumbóta, né kýs að fara um í skjóli nætur og skemma eigur samborgara sinna og ríkisins.

Félagsmálaráðherra og ríkisstjórn, sem ekki vill ekki koma til móts við hagsmuni þessa hóps uppsker eins og sáð er. 

Aumingja Ísland.