Orkuveitan sjálf ábyrg

www.bethedreamyouseek.blogspot.com

Rænir fólk frá þér orkunni? Er auðvelt að koma þér úr jafnvægi? Reiðist þú, verður sár eða pirruð/aður í samskiptum við annað fólk? Kannski við einhverja ákveðna einstaklinga?

Við höfum öll einhvern tímann upplifað ofangreint. Þessir þættir eru misjafnlega ríkjandi í okkur og getur ótal margt spilað þar inn í, t.d. daglegt form, ónægur svefn, veikindi, álag, óuppgerð mál, krísur, áföll, sjálfsmat og óöryggiskennd.

Í íslenska heilbrigðis- og velferðarkerfinu starfar fólk á ýmsum sviðum sem getur  veitt góð ráð. Það er okkar að viðurkenna þegar einhverjir þættir eins og í fyrstu efnisgrein eru farnir að draga úr lífsgæðum okkar eða verða okkur hindrun í að njóta samskipta eða ná árangri. Aðstoðin er aldrei langt undan, við getum í versta falli látið á reyna og farið þá í gamla farið aftur ef það gengur ekki upp.

Meðal ástæðna fyrir því sem upp hefur verið talið hér er mistúlkunin á orðinu ábyrgð. Þegar ég las eitt sinn eftirfarandi ráð á blaði frá ráðgjafa á heilbrigðisstofnun opnaðist fyrir mér nýr, létti blandinn veruleiki. Ég sá spottana sem mér ég veit að mér er óhætt að sleppa, jafnvel fyrir fullt og allt. Og það sem kannski skiptir einnig miklu máli: Að sjá hvaða aðferðir ég hafði tileinkað mér hingað til sem mælt er með.
Stóri munurinn er nefnilega þessi:

Þegar við tökum ábyrgð á öðrum...

...erum við að redda, bjarga og stjórna.
...yfirtökum við tilfinningar.
...erum við ekki að hlusta.
...erum við þreytt, kvíðin og auðsærð.
...erum við upptekin af lausnum, svörum og aðstæðum.
...erum við upptekin af því að hafa á réttu að standa.
...erum við upptekin af smáatriðum og hvernig hlutirnir líta út.
...viljum við hafa áhrif á flest allt.
...gerum við kröfur.
...ætlumst við til þess að aðrir uppfylli væntingar okkar.

Þegar við erum ábyrg...

...sýnum við velvild, hvatningu og samkennd.
...speglum við.
...leitum við að jafnvægi.
...erum við að hlusta.
...erum við afslöppuð, frjáls og sjálfsörugg.
...leiðum við fólk saman til þess að deila reynslu.
...gefum við hlutdeild í sjálfum okkur og gerum okkar besta til að aðrir spjari sig.
...ætlumst við til að aðrir taki ábyrgð á sjálfum sér og gerðum sínum.
...getum við leiðbeint.
...getum við treyst, slepp takinu og gefið öðrum frelsi.

Þessi ráð eru ekki endilega gulltrygging fyrir farsælli framtíð. Kannski munum við eiga til að gleyma því að fara eftir þeim eða áttum okkur á því að við höfum hingað til verið að nota mörg þeirra. Þau eru fyrst og fremst góð verkfæri sem hægt er að þekkja og grípa til – ef ekki nema til þess eins að gera daginn betri.

Við erum okkar besta orkuveita.