22. sep. 2009 - 12:48Ólafur Arnarson
Hvar er rannsóknin? Einhver?
Lítið hefur farið fyrir embætti sérstaks saksóknara í málum bankahrunsins að undanförnu. Fyrr í sumar og í vor fór hann mikinn og réðst m.a. í húsrannsóknir hjá ýmsum forsvarsmönnum Kaupþings, Glitnis og tengdra félaga. Aðspurður sagði Ólafur Þór Hauksson, sérstakur saksóknari þá að vel gæti farið svo að rannsakað yrði á fleiri stöðum. Hafi verið leitað víðar hefur það farið hljótt í fjölmiðlum.
Nokkrir hafa stöðu grunaðs manns í rannsókn á bankahruninu en svo mun ekki vera með helstu eigendur og stjórnendur Landsbankans, sem ber ábyrgð á Icesave hneykslinu, eða stjórnendur Seðlabankans, sem varð tæknilega gjaldþrota einn seðlabanka í heiminum á síðasta ári.
Raunar mun það vera svo, að Rannsóknarnefnd Alþingis, sem á að skila skýrslu sinni um aðdraganda hrunsins eftir rúman mánuð, hefur ekki séð ástæðu til að kalla stjórnendur og eigendur Landsbankans á sinn fund eftir því sem best er vitað. Skyldi nefndinni ekki þykja forvitnilegt að fá alla vega sjónarmið þeirra, sem stóðu fyrir Icesave?
Sérstakur saksóknari hefur ekki séð ástæðu til að yfirheyra eigendur og stjórnendur Landsbankans fram til þessa. Á sama tíma og margir kollegar þeirra hafa stöðu grunaðs manns þykir greinilega ekki ástæða til að rannsaka neitt mál bankans, sem skildi íslensku þjóðina eftir á bólakafi í fjóshaugnum með Icesave skuldirnar í fanginu.
Jú, Björgólfur Guðmundsson var víst kallaður til yfirheyrslu fyrir skemmstu, sem vitni í hliðarmáli bankarhunsins - ekki sem grunaður maður í útlána- og innlánaskandal Landsbankans.
Jón Ásgeir Jóhannesson segir að enginn rannsóknaraðili á Íslandi hafi sýnt áhuga á að tala við sig.
Nú er það að sjálfsögðu svo, að til skammst tíma hefur embætti sérstaks saksóknara ekki haft mikla burði til að rannsaka alla þætti bankahrunsins. Hann hefur þurft að forgangsraða.
Forgangsröðun Ólafs Þórs Haukssonar er hins vegar ekki hafin yfir gagnrýni. Hvers vegna í ósköpunum setur maðurinn ekki krafta embættis síns í að rannsaka stærstu málin? Icesave og þrot Seðlabankans eru langstærstu skellirnir, sem íslenska þjóðin - við sem borgum skatta á Íslandi - situr uppi með eftir bankahrunið.
Samt hefur rannsóknaraðilinn ekki séð ástæðu til að skoða þessi mál neitt sérstaklega. Handarbaksvinnubrögðin eru því miður með ólíkindum. Fyrir helgi bárust fréttir af því að Björgólfur Thor Björgólfsson, einn aðaleigandi bæði Landsbankans og Straums, væri að rýma íbúðarhúsnæði, sem hann hefur haft til umráða hér á landi.
Björgólfur er einn örfárra útrásarvíkinga, sem sannanlega er með fullar hendur fjár í útlöndum þrátt fyrir að hér á landi liggi eftir hann sviðin jörð. Var ekki ástæða til að rannsaka hann og kannski leita í húsinu hans áður en hann flutti af landi brott? Alla vega tala við hann?
Það er mjög mikilvægt að öll mál, sem tengjast bankahruninu, verði rannsökuð til hlítar og reynt eftir fremsta megni að koma lögum yfir þá, sem þau hafa brotið. Þar á eitt yfir alla að ganga og enginn af vera undanþeginn.
Því miður bendir hins vegar allt til þess að forgangsröðun sérstaks saksóknara sé í besta falli tilviljanakennd. Hann leggur alla áherslu á mál, sem raunar er sjálfsagt að rannsaka þegar búið er að rannsaka stóru málin, sem skilja íslensku þjóðina eftir með hundruð milljarða slóða eftir sóða.
En byrjum á stóru málunum.
Fram til þessa eru vinnubrögð sérstaks saksóknara ekkert til að státa sig af. Því miður.
22.maí 2012 - 15:01
Ólafur Arnarson
Það er að sjálfsögðu ekki hægt að treysta markaðinum til að miðla upplýsingum um bæði framboð og eftirspurn. Nei, það sér hver maður að miklu skilvirkara er að útgerðin hafi þetta allt á sinni hendi. Tuttugasta öldin sýndi líka og sannaði yfirburði miðstýringar og áætlunarbúskapar framyfir markaðshagkerfið. Öll þekkjum við söguna um Bandaríkin og Vestur-Evrópu sem markaðshagkerfið hneppti í ánauð fátæktar og vöruskorts á meðan frjáls lýðurinn í Sovétríkjunum og Austur-Evrópu naut ávaxta miðstýrðs áætlunarbúskapar að hætti þeirra félaga Marx og Leníns – hinna miklu hugsuða, sem höfðu svo mikla innsýn í þarfir neytenda að þeir hefðu líkast til plumað sig vel sem útgerðarmenn á Íslandi. Í öllu falli skildu þeir mikilvægi þess að halda virðiskeðjunni óslitinni á einni hendi.
15.maí 2012 - 16:15
Ólafur Arnarson
Það er í sjálfu sér ekkert athugavert við það að menn verji hagsmuni sína. Þessar auglýsingar, sem tala máli LÍÚ, minna mig hins vegar óþægilega mikið á gíslamyndböndin, sem voru algeng hér á árum áður þegar hryðjuverkasamtök í mið-austurlöndum tóku gísla og létu þá lofsyngja málstað samtakanna framan í myndavél og grátbiðja stjórnvöld um að verða við kröfum þeirra. Engum kemur til hugar að þar hafi gíslarnir talað frá hjartanu nema þá kannski þeir sem þjáðir voru orðnir af hinu alræmda Stokkhólmsheilkenni. En ég er vitanlega ekki að líkja LÍÚ við mið-austurlensk hryðjuverkasamtök.
10.maí 2012 - 16:20
Ólafur Arnarson
Þetta er undir okkur sjálfum komið. Ef við sitjum bara heima og bölvum í hljóði gerist ekki neitt. Þá komast bankarnir upp með hvað sem er. Þá borgum við stökkbreyttu lánin og kaupaukana hjá rukkurunum.
09.maí 2012 - 18:01
Ólafur Arnarson
Forysta Sjálfstæðisflokksins hefur ekki mikinn tíma til að snúa við blaðinu og sýna í verki að henni sé alvara með að fylgja stefnu flokksins en ekki vernda sérhagsmuni skuggastjórnendanna. Sé þá einhver alvara í málinu. Það dugar ekki að koma með friðþægingu rétt fyrir kosningar. Það hvílir mikil ábyrgð á þeim sem veljast til forystu í Sjálfstæðisflokknum. Kjósendur gera meiri kröfur til hans en annarra flokka. Betur má ef duga skal.
08.maí 2012 - 15:30
Ólafur Arnarson
Væri hér á Íslandi efnahagsbrotalögregla og fjármálaeftirlit, sem ekki væru með störu á baksýnisspegilinn, myndu þessir aðilar ráðast inn í bankana og fjármálafyrirtækin og stöðva þá löglausu starfsemi, sem þar fer fram. Fólkið í Armani fötunum og Dior drögtunum væri leitt út í járnum og látið svara fyrir gjörðir sínar og aðgerðaleysi.
02.maí 2012 - 19:01
Ólafur Arnarson
Annað hvort átta félagarnir úr viðskiptadeild Háskóla Íslands sig ekki á þessu eða þeim stendur á sama. Verðmat þeirra á Aurum Holding byggir á eftiráspekinni, sem er svo vinsæl hér á landi nú um stundir. Í ljósi þess fjandskapar sem Gylfi Magnússon hefur opinskátt sýnt gagnvart stjórnendum föllnu bankanna er full ástæða til að taka verðmati hans af fullri tortryggni. Þá er ástæða til að leita staðfestingar á fullyrðingum mannsins, sem sagði Alþingi ósatt um gengislánin og þurfti að gjalda fyrir með embættismissi.
01.maí 2012 - 20:49
Ólafur Arnarson
Frá því að landsfundur sjálfstæðisflokksins samþykkti að afnema skyldi verðtryggingu af neytendalánum hafa verðtryggð lán heimilanna hækkað um meira en 40 milljarða – bara svona rétt á meðan þingflokkurinn er að skoða málin og berjast fyrir hagsmunum LÍÚ. Frá hruni eru þetta næstum 300 milljarðar.
27.apr. 2012 - 17:03
Ólafur Arnarson
Gylfi lét af ráðherraembætti 2. september 2010, eftir að hafa orðið uppvís að því að segja þinginu ósatt um gengislánin, en honum hafði verið ljóst allt frá vori 2009 að
verulegur vafi hið minnsta léki á lögmæti þeirra þótt hann segði Alþingi annað. Í stuttu máli má segja að hann hafi verið látinn hætta sem ráðherra í byrjun september vegna þess að fyrirsjáanlegt var að ella myndi Alþingi á hann vantraust vegna ósannsöglinnar um leið og þing kæmi saman nokkrum dögum síðar.
26.apr. 2012 - 15:01
Ólafur Arnarson
Í þessu litla dæmi sjáum við að afkoma útgerðarinnar, sem selur sinn fisk á markaði, er meira en tvöfalt betri en afkoma þeirrar sem veitir aflanum áfram til eigin vinnslu á skiptaverði Verðlagsstofu. Það er ekki nóg með að framlegð og afkoma útgerðarinnar brenglist mjög þegar skiptaverðið er notað heldur sjáum við glögglega að þessi tvöfalda verðlagning hefur gríðarleg áhrif á aflahlut sjómanna og hafnargjöld, sem renna til sveitarfélaga. Hér er ekki horft á óbeina þætti s.s. tekjuskatt og útsvar sjómanna og skattgreiðslur útgerða.
25.apr. 2012 - 13:01
Ólafur Arnarson
Geir hefur sjálfur viðurkennt að hafa gert mistök og sjálfsagt er vandfundinn sá stjórnandi sem ekki gerði mistök í aðdraganda bankahruns. Það er mannlegt að gera mistök. Stærstu mistök Geirs felast sjálfsagt í því að halda hlífiskildi yfir seðlabankastjóranum, sem Geir sjálfur vissi að ekki var mark á takandi. Manninum, sem svo kom fyrir Landsdóm og varð stjörnuvitni saksóknara gegn Geir. Illa launaði Davíð Oddsson velgjörð Geirs, sem fórnaði ríkisstjórn sinni til að Davíð þyrfti ekki að axla ábyrgð sína sem versti seðlabankastjóri nýrrar aldar. Í þeirra boði sitjum við nú uppi með ríkisstjórn Jóhönnu Sigurðardóttur. Það er þungur kross að bera en fyrir það var ekki ákært í Landsdómsmálinu.
17.apr. 2012 - 16:01
Ólafur Arnarson
Þegar Jóhannesi var bolað út úr Högum eignaðist hann hlut í færeyskri matvörukeðju, sem hann hefur nú selt. Einhverjar vangaveltur hafa verið um að hann hyggist nota afraksturinn af þeirri sölu til að hasla sér nýjan völl á íslenskum smásölumarkaði. Endurkoma Jóhannesar í Bónus væri happafengur fyrir íslenska neytendur. Jóhannes er kaupmaður af lífi og sál. Það þekkja þakklátir íslenskir neytendur. Ekki veitir af lágvöruverðsverslun, sem sannur kaupmaður stýrir en ekki atvinnufjárfestar.
13.apr. 2012 - 15:31
Ólafur Arnarson
Það verður væntanlega bið á því að SFO rjúki í viðamiklar húsleitir og handtökur á grunni upplýsinga frá sérstökum saksóknara á Íslandi. Brennt barn forðast eldinn. Hvenær ætli íslenskir dómstólar taki þá bresku sér til fyrirmyndar og hætti að vera gúmmístimpill fyrir sérstakan saksóknara?
12.apr. 2012 - 14:50
Ólafur Arnarson
Ein og sér er þessi ákvörðun framkvæmdastjórnar ESB gild ástæða til að snúast gegn aðild Íslands að ESB. Ekki vegna þess að hún sé Íslandi fjandsamleg, sem hún vissulega er, heldur vegna þess að hún bendir til þess að framkvæmdastjórnin sé ófær um að taka skynsamlegar ákvarðanir með hagsmuni ESB að leiðarljósi.
08.apr. 2012 - 14:36
Ólafur Arnarson
Við getum ekki flutt meðgöngu og barnsburð af konum yfir á karla en við getum látið karla taka að sér ýmsar skyldur og fjarvistir frá vinnu, sem til skamms tíma hafa verið hlutskipti kvenna. Við getum tryggt að þegar barn fæðist sé það ekki einungis móðirin, sem þarf að hverfa af vinnumarkaði um stund, heldur líka faðirinn. Virkt fæðingarorlof karla mun einnig stuðla að virkari þátttöku feðra í ummönnun barna eftir að fæðingarorlofi lýkur. Faðir, sem annast hefur barn sitt í fæðingarorlofi, er líklegri til að vera heima yfir því veiku heldur en sá, sem aldrei hefur þurft að sinna barni sínu einn.
04.apr. 2012 - 17:01
Ólafur Arnarson
Gylfi Arnbjörnsson á að vita betur en svo að láta draga sig á asnaeyrum í máli sem snýst meira um samkeppni á flugmarkaði en kjarasamninga. Vissulega eru íslenskar flugfreyjur að sönnu yndislegar og nánast eins og gyðjur og ávallt er eins og maður sé kominn alla leið heim þegar þær bjóða mann velkominn um borð í íslenska flugvél eftir langferðir erlendis, en er mögulegt að þær hafi ginnt Gylfa líkt og ásynjurnar ginntu nafna hans svo sem Snorri segir frá í Gylfaginningu? Er kannski rétt að tala nú um Gylfaginningu, hina seinni?
03.apr. 2012 - 15:01
Ólafur Arnarson
Einnig gæti efnahags- og viðskiptaráðherra krafið sjávarútvegs- og landbúnaðarráðherra um skýringar á því hver stjórnskipuleg staða Sjávarútvegsráðuneytisins er. Er það sjálfstætt ráðuneyti eða er búið að koma því fyrir í skipuriti LÍÚ? Kröfugerðin til SKE bendir til þess ráðuneyti sjávarútvegs heyri undir boðvald LÍÚ en ekki öfugt.
30.mar. 2012 - 15:30
Ólafur Arnarson
Ekki fáum við að vita hvaða efni Kjartan hefði valið mér vegna þess að á lokadegi keppninnar barst áheit upp á 70 þúsund krónur frá Auðuni Má Guðmundssyni. Auðun á því hæsta áheitið og fær að velja mér umfjöllunarefni í einum pistli, sem væntanlega verður skrifaður á næstunni. Ég hef ekki enn fengið fyrirmæli frá Auðuni. Þegar sá pistill birtist verður þess að sjálfsögðu getið að hann sé skrifaður gegn stuðningsframlagi til Krabbameinsfélagsins.
29.mar. 2012 - 16:19
Ólafur Arnarson
Þetta breytir samt ekki því að það eru auðvitað viss vonbrigði að það skuli virkilega ekki vera einhver stórbokki þarna úti sem er til í að borga a.m.k. 100 þúsund kall fyrir pistil að eigin vali. En, svona er mikið að marka sorpmiðlana í þessu landi.
26.mar. 2012 - 13:30
Ólafur Arnarson
En hugmyndin er góð. Ef það er svona mikill áhugi á að leigja pennann minn býð ég hann hér með til leigu til styrktar góðu málefni. Takist liðinu,
The Sellecks, að safna 50 þúsund krónum alls fyrir Krabbameinsfélagið með áheitum áður en söfnuninni lýkur um næstu helgi mun ég skrifa einn pistil fyrir þann sem mestu hefur heitið á liðið, hvort sem áheitin hafa verið á
mig,
Örn son minn eða
liðið sjálft. Öll áheit á okkur feðga teljast til áheita á liðið. Leigjandinn fær að velja efni pistilsins (innan eðlilegra velsæmismarka að sjálfsögðu).
20.mar. 2012 - 17:01
Ólafur Arnarson
Í kvótakerfinu felst ríkisstuðningur við þau fyrirtæki, sem fá úthlutað aflaheimildum. Engin rök standa til þess að leyfa þessum fyrirtækjum að njóta sérkjara á framleiðslumarkaði þar sem þau keppa við sjálfstæða framleiðendur. Þegar við blasir að þetta fyrirkomulag er beinlínis skaðlegt fyrir þjóðarbúið í heild hljóta ráðamenn að leggjast á eitt til að lagfæra kerfið.
18.mar. 2012 - 18:35
Ólafur Arnarson
Gissur Páll er að stíga sín fyrstu skref í burðahlutverki og það var sérstök upplifun að fá að hlusta á hann í þessu glæsilega tónlistarhúsi. Rödd hans er einhver sú tærasta og tónfegursta tenórrödd sem ég hef nokkru sinni heyrt. Hann hefur þetta „klang“ sem ekki er öllum gefið. Það er ekki hægt að lýsa því – maður bara þekkir það þegar maður heyrir það. Pavarotti hafði þetta sama „klang“. Gissur er vitanlega ekki jafn kraftmikill söngvari og Pavarotti enda stærðarmunurinn mikill. Líklega hægt að nota yfirhafnir Pavarottis sem neyðartjöld í fjölmennum flóttamannabúðum. Það kemur hins vegar engan veginn að sök og maður fær gæsahúð þegar hann syngur aríuna frægu í 1. þætti,
Che gelida manina. Ég fullyrði að Gissur Páll er ný stórstjarna!
16.mar. 2012 - 09:01
Ólafur Arnarson
Saksóknari nefndi margoft í ræðu sinni í gær að Geir hefði átt að gera hitt og þetta en ekki gert. Ekki væri ljóst hverju hinar og þessar aðgerðir hefðu breytt eða jafnvel hvaða afleiðingar þær hefðu en hann hefði átt að gera bara eitthvað til að gera eitthvað. Í einu orðinu gagnrýndi saksóknari Geir fyrir fyrir að hafa ekki verið tilbúinn til að fórna einum banka til að bjarga kerfinu en í því næsta gagnrýndi hún hann fyrir að hafa látið undir höfuð leggjast að bjarga einum banka þegar allir vissu að félli einn banki myndi kerfið allt falla. Á köflum varð málflutningurinn ein hringaveitleysa. Ekki fór hjá því að málflutningur saksóknara í gær litaðist af því að hann teldi Geir H. Haarde hafa tekið rangar pólitískar ákvarðanir.
07.mar. 2012 - 12:15
Ólafur Arnarson
Nokkuð ljóst er af framburði Davíðs, ef frá er skilin eftiráspeki hans, að hann varaði Geir H. Haarde alls ekki við yfirvofandi bankahruni vegna þess að hann gerði sér enga grein fyrir því sjálfur að það væri framundan. Sama gildir um vitnisburð Arnórs Sighvatssonar, aðstoðarseðlabankastjóra. Hann sagði frammi fyrir Landsdómi í gær að allt frá 2005 hafi verið of seint að bjarga íslenska bankakerfinu. Ekkert bendir til þess að Arnór hafi öðlast þessa speki fyrr en eftir hrun.
06.mar. 2012 - 12:31
Ólafur Arnarson
Markvissasta leiðin til að koma á eðlilegu samkeppnisumhverfi í fiskvinnslu á Íslandi er að setja allan fisk á markað og tryggja að allir aðilar eigi viðskipti á markaðsverði en ekki að sumum standi til boða að nota tilbúið verð, sem er lægra en það verð sem markaðurinn framkallar. Þetta er hagsmunamál þjóðarinnar. Þetta er líka réttlætismál fyrir fiskvinnsluna í landinu. Síðast en ekki síst er þetta réttlætismál fyrir íslenska sjómenn.
01.mar. 2012 - 17:15
Ólafur Arnarson
Það óheiðarlegasta sem fyrir finnst er óheiðarleg lögga. Þegar sá, sem á að gæta þess að farið sé að lögum, brýtur þau sjálfur er fokið í flest skjól. Þá er grafið undan réttarríkinu. Mikilvægt er að rannsókn slíkra mála sé tekin föstum tökum. Nú hefur stjórn FME kært fyrrverandi forstjóra til lögreglu fyrir að afla sér upplýsinga innan úr bankakerfinu með ólögmætum hætti til einkanota. Lögregla hlýtur að taka kæruna frá stjórn FME mjög alvarlega og bregðast strax við.
26.feb. 2012 - 18:01
Ólafur Arnarson
Samkvæmt íslenskum lögum er bannað að selja venjulegu fólki flókna fjármálagjörninga á borð við afleiður. Þetta er samkvæmt MiFID neytendaverndarreglum ESB, sem voru lögfestar hér á landi með lögum um verðbréfaviðskipti nr. 108/2007 sem tóku gildi 1. nóvember 2007. Frá þeim tíma hafa verðtryggð íbúðalán verið ólögleg nema e.t.v. í undantekningatilfellum, þegar lántakar hafa verið viðurkenndir sérfræðingar á sviði afleiðuviðskipta. Öll verðtryggð neytendalán hafa í raun verið ólögleg frá því að Alþingi lögfesti MiFID reglurnar.
23.feb. 2012 - 17:31
Ólafur Arnarson
Maður hlýtur að spyrja sig að því hvaða vitleysa er í gangi þegar lekameistarinn heldur óhindruðum aðgangi að öllum gögnum sem FME hefur undir höndum.? Eru upplýsingar FME um fjármálahagsmálefni fyrirtækja og einstaklinga óhultar fyrir forstjóranum fráfarandi? Skyldi eitthvað fleira leka á næstu dögum? Gunnar hefur í seinni tíð þvertekið fyrir að eiga hlut í máli þegar upplýsingar leka t.d. út úr FME, en hann virðist einatt vera nálægur. Vitanlega á að reka manninn strax og fylgja honum út úr húsakynnum FME.
22.feb. 2012 - 14:05
Ólafur Arnarson
Við verðum að snúa af þessari braut. Ofbeldi er aldrei réttlætanlegt og við eigum ekki að láta hnefana tala. En við verðum líka að geta treyst því að réttir aðilar taki á þeim jakkafataklæddu ribböldum sem vaða um samfélagið og hirða eignir af fólki og fyrirtækjum á grundvelli hæpinna samninga – svo hæpinna að æðsti dómstóll landsins hefur ítrekað dæmt þá ólöglega og nú úrskurðað aðgerðir stjórnvalda í þágu kröfuhafa og fjármálastofnana andstæðar stjórnarskrá. Þegar fólk missir íbúðirnar sínar og er jafnvel gert gjaldþrota þrátt fyrir að réttaróvissa ríki um lögmæti skuldanna sem verið er að innheimta er stutt í að eitthvað bresti. Það er komið að mörkum þanþolsins.
21.feb. 2012 - 16:30
Ólafur Arnarson
Í slitastjórn Dróma sitja: Hlynur Jónsson, hdl, Jóhann Pétursson, hdl., og Hildur Sólveig Pétursdóttir, hrl. Þetta er sama fólkið og sat í bráðabirgðastjórn SPRON. Bráðabirgðastjórnin gerði tillögu til Héraðsdóms Reykjavíkur um að hún sjálf yrði skipuð slitastjórn og héraðsdómur varð við því 23. júní 2009. Sagan síðan er óslitin sorgarsaga þeirra sem þurft hafa að eiga viðskipti við Dróma. Það var lýsandi fyrir það sem koma skyldi þegar slitastjórnin neitaði að greiða laun starfsmanna SPRON og Frjálsa fjárfestingarbankans sumarið 2009 en gerði samt kröfu um vinnuskyldu af þeirra hálfu.
20.feb. 2012 - 11:01
Ólafur Arnarson
Með hliðsjón af þessu er deginum ljósara að sú ákvörðun Landsbankans að leyna FME upplýsingum um tilvist þessara aflandsfélaga var ekki saklaus yfirsjón, sem engu máli skipti. Þarna var bankinn að fela slóð lögbrota, sem grófu undan íslensku fjármálakerfi og hlutabréfamarkaði.
18.feb. 2012 - 16:01
Ólafur Arnarson
Það er vonum seinna að stjórn FME víkur Gunnari Andersen úr starfi forstjóra FME. Vonandi markar þetta upphaf að siðbót í íslensku stjórn- og stofnanakerfi. Það verður fróðlegt að sjá hvort stjórn FME víkur sér undan því að kæra Gunnar Andersen til sérstaks saksóknara fyrir markaðsmisnotkun, fölsun ársreikninga Landsbankans og fyrir að hafa leynt FME upplýsingum sem honum bar að veita.
16.feb. 2012 - 15:40
Ólafur Arnarson
Þessir aðilar verða að sækja rétt sinn fyrir dómstólum. Einsýnt er að ekki verður aðeins bönkum og fjármálafyrirtækjum stefnt til greiðslu bóta heldur einnig íslenska ríkinu vegna þess að ránið var framið í skjóli laga nr. 151/2010. Það er eðlilegt að ráðherrum og þingmönnum, sem samþykktu lögin, sé líka stefnt. Þá hljóta þeir, sem orðið hafa fyrir tjóni, að stefna Seðlabankastjóra og forstjóra FME til greiðslu bóta vegna „tilmæla“ þeirra til fjármálafyrirtækja um að stjórnarskrárvarinn eignarréttur viðskiptavina skuli brotinn.
14.feb. 2012 - 11:01
Ólafur Arnarson
Já, Sighvatur minn, það er ekki von að þú skiljir hvað er að gerast, sem þekkir ekki verðtrygginguna nema af afspurn og sem þiggjandi þó að þú hafir tekið þátt í að koma henni á. Þú nefndir Vilmund Gylfason sem aðalforsprakka verðtryggingar í Silfrinu – vegna þess að honum fannst ósanngjarnt að láta gamla Volkswagen bjöllu fyrir ráðherra Dodge. Það er alþekkt ráð hjá rökþrota mönnum að eigna sér stuðning löngu látinna alþýðuhetja með því að gera þeim upp skoðanir í samtímanum. Heldur þú e.t.v. að Vimmi væri varðhundur verðtryggingar í dag?
13.feb. 2012 - 13:40
Ólafur Arnarson
Kæri Sighvatur. Ég get bara ekki á mér heilum tekið vegna þeirrar hryggilegu stöðu sem þú virðist vera í. Það er napurlegt að sitja uppi með strípaðan blaðamannalífeyri á meðan samráðherrarnir baða sig í allsnægtum eftirlaunalaganna - jafnvel fólk sem sat mun skemur á þingi en þú. En, er ekki einhver sem stendur þér nær en ég sem þú getur leitað til áður en þú kemur og slærð mig um pening? Hvað með Jóhönnu og Steingrím? Geta þau ekkert hjálpað?
12.feb. 2012 - 17:45
Ólafur Arnarson
Ef fyrirtækin eru ekki til í að lánin hækki í takt við heimsmarkaðsverð á hveiti vill örugglega enginn lána þeim peninga. Þetta skilur hagfræðideild HÍ þó að enginn hagfræðingur utan landsteinanna skilji það. Sænska akademían er bara ekki búin að uppgötva hversu klárir íslensku hagfræðingarnir eru. Íslenski skólinn verður án efa áhrifameiri en austurríski skólinn þegar menn bara átta sig á því hvað Þórólfur Matthíasson, Guðmundur Ólafsson, Gylfi Magnússon og allir hinir væntanlegu nóbelsverðlaunhafarnir í HÍ eru ofboðslega klárir. Eða þannig.
10.feb. 2012 - 18:31
Ólafur Arnarson
Í öllum hamingjunnar bænum ekki taka orð bankans trúanleg um að ábyrgðir og lánsveð séu gild! Látið bankann leggja fram sönnun þess og krefjist þess að ábyrgðin sé felld úr gildi ef bankinn getur ekki lagt fram skrifleg sönnunargögn.
09.feb. 2012 - 16:01
Ólafur Arnarson
Þetta sýnir glögglega að um langt árabil hefur allur samanburður á sköttum hér á landi og í nágrannalöndum okkar ekki aðeins verið villandi heldur beinlínis rangur. Í nágrannalöndum okkar eru iðgjöld í lífeyrissjóð talin til skattgreiðslna en hér á landi hefur það ekki verið gert. Réttlætingin hefur verið sú að íslenska lífeyrissjóðakerfið sé í grundvallaratriðum frábrugðið lífeyrissjóðakerfum nágrannalandanna, sem eru flest með hreint gegnumstreymiskerfi á meðan við erum með söfnunarsjóði. Nú hefur komið á daginn að lífeyrisréttindi á Íslandi eru einskis virði vegna þess að tekjutengingin í almannatryggingakerfinu núllar þau út.
30.jan. 2012 - 18:31
Ólafur Arnarson
Eftir hrunið hefur verðtryggingin fengið að herja á þjóðina. Verðbólga frá ársbyrjun 2008 er nálega 40 prósent og lánþegar þessa lands hafa mátt horfa á lánin sín hækka um þá upphæð plús himinháa vexti. Þessir fjármunir hafa farið í vasa fjármálastofnana og fjárfesta. Þetta er stórfelldur flutningur á eignum frá einum þjóðfélagshópi til annars og nú er svo komið að 40 þúsund manns eru á vanskilaskrá og mörgum hefur einungis tekist að halda sér af þeim svarta lista með því að taka út séreignarsparnaðinn eða frysta lánin sín. Hrunið sjálft er orðið hjóm eitt samanborið við eftirköst þess. Allt í boði ríkisstjórnarinnar og stjórnmálastéttarinnar.
25.jan. 2012 - 15:31
Ólafur Arnarson
Höfundum greinargerðarinnar er tíðrætt um „svigrúm“ bankanna til skuldaleiðréttingar. Þeir segja það uppurið og gott betur. Þetta fær ekki staðist. Eiginfjárhlutfall bankanna er nú farið að nálgast 30 prósent á sama tíma og vanskil á útlánum þeirra er 20-30 prósent. Eiginfjárhlutfallið hefur verið skrúfað upp með því að endurmeta til hækkunar lánasöfnin, sem eru í þessum miklu vanskilum. Þarna er ekki aðeins svigrúm til lækkunar á höfuðstól heldur ber bönkunum skylda til að leiðrétta ofmetin lánasöfn sín til lækkunar til að koma vanskilum í það horf, sem tíðkast í heilbrigðum bönkum, eða niður á bilið 1-2 prósent. Allt tal um að svigrúmið sé fullnýtt er því rakalaust bull.
24.jan. 2012 - 18:01
Ólafur Arnarson
Stjórnmálamenn eiga hins vegar ekki að bíða eftir Samkeppniseftirlitinu í þessum efnum. Hér er kjörið tækifæri fyrir stjórnmálastéttina til að sameinast um réttlætismál fyrir þjóðina. Þingmenn hljóta að geta sameinast um lagasetningu, sem skilur algerlega milli veiða og vinnslu og tryggir að allur afli af Íslandsmiðum fari á markað til að tryggja hámarksafrakstur af þjóðarauðlindinni okkar.