03. feb. 2010 - 13:30Ólafur Arnarson
Bomba hjá Jónasi Fr. - Hollendingar bera ábyrgð!
Jónas Fr. Jónsson, fyrrverandi forstjóri Fjármálaeftirlitsins, sendi frá sér
yfirlýsingu í gær vegna ummæla, sem fyrrverandi starfsmaður hollenska fjármálaeftirlitsins viðhafði frammi fyrir hollenskri þingnefnd. Hollendingurinn sagði að kollegar hans á Íslandi hafðu logið til um stöðu Landsbankans og fegrað hana.
Jónas tekur til varna fyrir fyrrum undirmenn sína og bendir á, að FME sendi þær upplýsingar um fjárhag Landsbankans, sem taldar voru réttar á hverjum tíma. Þær upplýsingar voru byggðar á gögnum frá bankanum sjálfum og hálfsársuppgjöri, sem undirritað var af endurskoðendum bankans.
Jónas bendir á að Hollendingar lentu í þeirri aðstöðu í hremmingunum, sem gengu yfir alþjóðlegan fjármálamarkað, að þurfa að þjóðnýta Fortis bankann og leggja fram mikla fjármuni til að bjarga ING bankanum og smærri fjármálafyrirtækjum frá falli. DSB bankinn féll í fyrrahaust. Jónas telur að embættismenn í Hollandi vilji beina athyglinni frá þessum heimavanda með yfirlýsingum og hörku gagnvart Íslendingum.
Í yfirlýsingu Jónasar leynist meiriháttar bomba inn í Icesave málið.
„Í viðræðum við Hollendinga í ágúst og september 2008 var rætt um að Landsbankinn setti upp varasjóð í Hollandi. Tillagan var ekki afgreidd af hálfu Hollendinga. Hefði það verið gert hefði sjóðurinn getað numið hátt í 600 milljónum Evra þegar bankinn féll. Hefði þar munað um minna.“
Það var á valdi hollenska fjármálaeftirlitsins að skylda Landsbankann til að setja upp slíkan varsjóð. Til þess hafði íslenska fjármálaeftirlitið ekki vald.
Hvers vegna?
Eftirlit með lausafjárstýringu útibús Landsbankans í Hollandi var á höndum hollenska fjármálaeftirlitsins en ekki hins íslenska. Sama gildir um neytendavernd. Varasjóður af þessu tagi snýr eingöngu að lausafjárstýringu útibúsins og neytendavernd. Þarna brást hollenska fjármálaeftirlitið, sem situr inni í hollenska seðlabankanum, algerlega.
Ef Landsbankanum hefði verið gert að setja upp slíkan varasjóð er ljóst að tjónið vegna Icesave í Hollandi hefði orðið miklum mun minna en raun varð á. Það var aðgerðaleysi hollenskra eftirlitsaðila, sem olli stórum hluta þess tjóns, sem hlaust af Icesave í Hollandi!
Ef Landsbankinn hefði ekki verið í aðstöðu til að koma upp þessum varasjóði hefði hollenska seðlabankanum verið í lófa lagið að stöðva starfsemi útibúsins og forða þannig tjóni. Þetta var ekki gert.
Það eru greinilega ekki öll kurl komin til grafar í Icesave málinu. Hingað til hefur verið litið svo á, að Hollendingar hafi verið sem saklaus börn í þessu máli – fórnarlömb Landsbankans og íslenskra eftirlitsaðila. Svo er greinilega ekki.
Icesave myndin er ekki eins skýr og svarthvít og sumir halda fram. Málstaður Íslands er miklu sterkari en en Steingrímur J. Sigfússon og aðrir úrtölumenn og formælendur uppgjafar Íslands halda fram.
Það er engin furða að Bretar og Hollendingar vilji ekki láta reyna á Icesave frammi fyrir óvilhöllum dómstól.
Það er hins vegar furðulegt að íslensk stjórnvöld skuli fram til þessa hafa kosið að leggjast eins og hundar fyrir fótum gömlu nýlenduveldanna, sem bera svo sannarlega sína ábyrgð á því tjóni, sem Ísland varð fyrir í bankahruninu.
16.mar. 2010 - 17:00
Ólafur Arnarson
Ef allt þetta fólk verður neytt í gjaldþrot hriktir í samfélagsgerð okkar. Eitthvað mun undan láta. Það er kominn tími til að grípa til raunverulegra aðgerða til að skera heimili og fyrirtæki niður úr þeirri snöru, sem gjaldmiðils- og bankahrunið setti um háls þeirra.
15.mar. 2010 - 20:00
Ólafur Arnarson
Það er hörmulegt að einu og hálfu ári eftir hrunið skuli íslensk stjórnvöld og Seðlabanki Íslands enn vera stærsta raunverulega efnahagsvandamál Íslands. Stefna stjórnvalda og Seðlabankans stendur í vegi fyrir endurreisn íslensks atvinnulífs og án endurreisnar atvinnulífsins munu tekjur ríkisins halda áfram að skreppa saman.
13.mar. 2010 - 14:40
Ólafur Arnarson
Gylfi, lán eignarhaldsfélaganna sitja inni í gömlu bönkunum. Þetta virðast allir vita nema þú og aðstoðarmaður forsætisráðherra. Viltu gera aðra tilraun til að skýra út hvers vegna nýju bankarnir draga lappirnar við að leysa vanda heimila og atvinnulífs?
12.mar. 2010 - 15:00
Ólafur Arnarson
Landsbankinn fór með þessum hætti kerfisbundið framhjá reglum FME til að hygla félögum í eigu aðaleigenda Landsbankans og tengdra aðila. Það kveikir spurningar um það hvers vegna sérstakur saksóknari bankahrunsins hefur ekki séð ástæðu til að rannsaka þessi mál. Nógu duglegur hefur hann verið við að rannsaka mál, sem tengjast Kaupþingi og félögum tengdum þeim banka. Ekki er vitað til þess að ein einasta húsrannsókn eða yfirheyrsla hafi farið fram vegna kerfisbundinna brota í Landsbankanum. Að ekki sé minnst á Icesave.
12.mar. 2010 - 13:00
Ólafur Arnarson
Þetta er gott og blessað hjá Lilju, og ánægjulegt að hún skuli ekki taka þátt í þeirri herferð gegn Jóhannesi Jónssyni, sem Morgunblaðið hefur lagt upp í, en það stenst engan veginn að útiloka grunaða menn frá því að eignast fyrirtæki. Í 2. mgr. 70. gr. stjórnarskrár lýðveldisins Íslands segir:
„Hver sá sem er borinn sökum um refsiverða háttsemi skal talinn saklaus þar til sekt hans hefur verið sönnuð.“ Af þessu leiðir, að ekki er hægt að mismuna mönnum á grundvelli þess, að þeir hafa stöðu grunaðs manns. slíkt er brot á stjórnarskránni.
12.mar. 2010 - 10:00
Ólafur Arnarson
Um hverja einustu helgi kemur fullorðið fólk saman í miðborg Reykjavíkur og skemmtir sér. Ekki man ég eftir því að hafa nokkurn tíma heyrt í fréttum á mánudegi, að skemmtanahald í borginni hafi farið svo vel fram um helgina, að lögregla hafi ekki þurft að hafa afskipti af nokkrum manni.
11.mar. 2010 - 20:00
Ólafur Arnarson
Steingrímur J. Sigfússon þarf að skýra út hvers vegna hann veitti VBS ríkisstyrk en neitaði SPRON um hann. Þá þarf FME að skýra út hvers vegna eftirlitið aðhafðist ekkert í heilt ár þrátt fyrir efasemdir um að uppgjörsaðferðir VBS og Saga Capital stæðust lög. Steingrímur og Gunnar Andersen, forstjóri FME, verða að axla ábyrgð sína í þessu máli.
10.mar. 2010 - 15:55
Ólafur Arnarson
Aðeins einn af þessum átján fjárfestum fær að kaupa Securitas. Hinir sautján þurfa að leita sér að öðrum fjárfestingartækifærum. Í íslensku bönkunum liggja nú næstum tvöþúsund milljarðar. Þetta eru gríðarlegir fjármunir, sem hægt er að nýta til uppbyggingar íslensks atvinnulífs. En þeir nýtast ekki til þess fyrr en bankarnir hætta að soga til sín hvert fyrirtækið á fætur öðru í stað þess að selja þau og koma í hendurnar á einkaaðilum, sem vilja fjárfesta í þeim.
09.mar. 2010 - 16:10
Ólafur Arnarson
Steingrímur J. Sigfússon og Davíð Oddsson, og hirð hans, virðast vera á einu máli um að leiðin út úr vanda þjóðarinnar sé sú, að nota sömu aðferðir og komu okkur í þennan vanda. Munurinn á þessum tveimur mönnum er sá, að fáir sem engir hlusta á Davíð núorðið, en Steingrímur er fjármálaráðherra þjóðarinnar.
08.mar. 2010 - 16:05
Ólafur Arnarson
Erfitt er að sjá ríkisstjórnina lifa af næstu vikur án þess að eitthvað breytist verulega. Uppstokkun er brýn og líklegt að Ögmundur Jónasson þurfi að koma aftur inn í stjórnina til að hún eigi einhverja von um lengra líf en nokkrar vikur. Ögmundur er maður, sem líklegt er að bæði stjórn og stjórnarandstaða treysti til að hafa forræði á Icesave samningunum. Kannski felst lausnin í því að hann komi inn í ríkisstjórnina sem sérstakur Icesave ráðherra.
07.mar. 2010 - 10:38
Ólafur Arnarson
Vandamálið fram til þessa hefur verið, að ríkisstjórn Jóhönnu Sigurðardóttur hefur ekki gert trúverðuga tilraun til að semja á grundvelli íslenskra hagsmuna við Breta og Hollendinga. Ráðherrar ríkisstjórnarinnar hafa ekki talað máli Íslands, hvorki hér heima né erlendis. Orsök þessa undirlægjuháttar er þjóðinni hulin ráðgáta. En í gær sagði góður meirihluti þjóðarinnar álit sitt á málflutningi forsætisráðherra og ríkisstjórnarinnar.
06.mar. 2010 - 23:13
Ólafur Arnarson
Nú er trúnaðarrofið algert milli þjóðarinnar og Jóhönnu og Steingríms! Helgasti réttur hvers manns er atkvæðisrétturinn. Forfeður okkar börðust lengi fyrir honum en Steingrímur og Jóhanna virðast ekki skilja hvaða fórnirvoru færðar til að við fengjum að ráða málum okkar sjálf. Forfeður okkar börðust fyrir þessum rétti, sem Steingrímur og Jóhanna telja einskis verðan.
06.mar. 2010 - 09:00
Ólafur Arnarson
Þetta er grátbroslegt hjá ritstjóra Morgunblaðsins, sem í gegnum tíðina hefur staðið fyrir mestu skoðanakúgun, sem þekkst hefur hér á landi. Undir forystu Davíðs Oddssonar breyttist Sjálfstæðisflokkurinn úr frjálslyndum flokki, sem rúmaði fólk með mismunandi áherslur og skoðanir á málefnum líðandi stundar, í þrælakistu, sem leyfði aðeins eina skoðun – skoðun foringjans. Það er alls ekki víst að flokkurinn nái sér út úr þeim skoðanakúgunarógöngum, sem foringinn leiddi hann í. Fyrir vikið vaða hér uppi gagnslausar gungur eins og Jóhanna Sigurðardóttir og Steingrímur Sigfússon og rústa Íslandi.
05.mar. 2010 - 13:34
Ólafur Arnarson
Í 1100 ára sögu Íslands hefur atkvæðisréttur ekki verið almennur nema í rúma eina öld. Lýðveldið er ekki orðið sjötugt. Forfeður okkar börðust hetjulega fyrir þessum réttindum okkar, sem forsætisráðherra telur nú engu skipta. Við megum ekki gleyma því að lýðræði er ekki stöðugt samfélagsform. Það lifir ekki af sjálfu sér. Það þarf að sýna lýðræðinu virðingu til að það dafni og þróist til gæfu fyrir þjóðina.
04.mar. 2010 - 15:20
Ólafur Arnarson
Íslenskir neytendur hafa um marga kosti að velja þegar kemur að matvöruverslunum. Það er engin tilviljun að Bónusverslanirnar eru fullar af fólki en Jón Gerald húkir einmana í sinni búð við þröngan kost. Bónus og Hagkaup hafa í gegnum tíðina fært íslenskum almenningi meiri kjarabætur en nokkur ríkisstjórn eða stjórnmálamaður. Þetta er í fullu gildi enn þann dag í dag.
03.mar. 2010 - 17:30
Ólafur Arnarson
En auðvitað væri spennandi að fá niðurstöðu í það hvort skattayfirvöldum er stætt á því að líta á niðurfellingu skulda, sem skattskyld hlunnindi hjá þeim sem njóta en ekki gagnvart þeim, sem veita. Það er vonandi að einhver láti reyna á slíkt fyrir dómi. Það er nefnilega þannig, að jafnvel ríkisskattstjóri verður að fara að lögum. Álit hans er ekki lagaígildi - það verður að eiga sér stoð í lögum.
02.mar. 2010 - 18:31
Ólafur Arnarson
Við eigum ekkert að gefa eftir í Icesave á lokametrunum fyrir þjóðaratkvæðagreiðslu. Nú höldum við á öllum trompum og einu veikleikar okkar eru Steingrímur og Jóhanna. Við megum ekki láta lélegar taugar þeirra skaða hagsmuni Íslands meira en orðið er. Steingrímur og Jóhanna verða að taka sig saman í andlitinu eða finna sér nýja þjóð til að stjórna.
01.mar. 2010 - 14:01
Ólafur Arnarson
Hvað ef kjósendur í Bretlandi, Hollandi og víðar berja í borðið að hætti Íslendinga og neita að skattpeningar þeirra séu notaðir í að bjarga fjármálafyrirtækjum, sem fóru sér of geyst og keyrðu sig í þrot? Hætt er við að flestar ríkisstjórnir í Vestur-Evrópu væru þá í mikilli hættu og alþjóðlegt fjármálakerfi gæti riðað til falls.
28.feb. 2010 - 18:26
Ólafur Arnarson
Í viðtalinu í Frjálsri verslun gerir Ásmundur málefni Húsasmiðjunnar að umtalsefni. Segir hann bankann hafa forðað Húsasmiðjunni frá gjaldþroti og þar með atvinnu 600 manna og milljarða kröfum birgja. Annars staðar í viðtalinu segir Ásmundur að bankinn selji þau fyrirtæki, sem kaupendur finnist að. Ásmundur nefnir ekki, að það voru áhugasamir kaupendur að Húsasmiðjunni, sem Landsbankinn og Steinþór Baldursson vildu ekkert við tala. Þetta voru aðilar, sem ætluðu að leggja fram umtalsvert fé og taka yfir miklar skuldir.
27.feb. 2010 - 13:38
Ólafur Arnarson
Grundvallarreglur réttarríkisins eru hins vegar ekki upp á punt og einungis til að nota á sumrin þegar úrkoma er undir meðallagi og hiti yfir. Þær eru aldrei mikilvægari en einmitt þegar kreppir að – þegar uppi eru sérstakar aðstæður og dómstóll götunnar kallar á blóð. Þá reynir á sjálft réttarríkið. Mikilvægt er að halda í heiðri 69. gr. stjórnarskrár Íslands, sem hljóðar svo:
„Engum verður gert að sæta refsingu nema hann hafi gerst sekur um háttsemi sem var refsiverð samkvæmt lögum á þeim tíma þegar hún átti sér stað eða má fullkomlega jafna til slíkrar háttsemi. Viðurlög mega ekki verða þyngri en heimiluð voru í lögum þá er háttsemin átti sér stað.“
26.feb. 2010 - 12:12
Ólafur Arnarson
Það er ekki Icesave, sem stendur í veginum. Það er einnig rangt, að aðildarviðræður við ESB gangi gegn því að unnið verði að lausn bráðavandans hér á landi. Aðild að ESB er mjög mikilvæg fyrir framtíðarhagsmuni Íslands og við megum alls ekki láta vandamál dagsins í dag setja ESB aðild okkar til hliðar. Það eru ekki rök í málinu að langt sé þangað til ESB aðild eða aðild að myntbandalagi verður að veruleika. Með sömu rökum ætti enginn að hefja læknanám vegna þess að það munu líða fjöldamörg ár áður en viðkomandi getur farið að starfa sem læknir.
24.feb. 2010 - 20:55
Ólafur Arnarson
Stóra fréttin fyrir okkur Íslendinga er hins vegar sú, að framkvæmdastjórnin sér fyrir sér verulega aðkomu Íslands að stefnumörkun ESB í sjávarútvegsmálum. Þetta er sérstaklega tekið fram í skýrslunni. Tekið er fram að fyrirhugaðar eru breytingar á sjávarútvegsstefnu ESB með íslenska kerfið sem fyrirmynd. Þá væntir framkvæmdastjórnin þess að Ísland muni leiða stefnumörkun sambandsins varðandi sjávarútveg á heimsskautasvæðum. Þetta eru stórkostlegar fréttir fyrir okkur Íslendinga.
23.feb. 2010 - 19:00
Ólafur Arnarson
Erum við kannski búin að skipta þjóðinni niður í tvo eða fleiri flokka? Viljum við að hópur manna njóti ekki sömu mannréttinda og við gerum sjálf kröfu um? Útrásarvíkingar og „kúlulánakóngar“ eiga líka fjölskyldur. Þeir eiga líka börn. Það fólk á sama rétt og við hin á að búa við öryggi á sínu heimili og halda þakinu yfir höfuðið.
22.feb. 2010 - 17:30
Ólafur Arnarson
Tölurnar verða þó fyrst sláandi þegar þær eru flokkaðar eftir aldri lesenda. Lesendur Morgunblaðsins finnast helst í hópi eldri borgara. Einungis um fimmtungur fólks á aldrinum 20-40 ára les Morgunblaðið. Þrír af hverjum fimm lesa Fréttablaðið þannig að lestur þess er um þrefaldur á við Moggann. Þetta er sá aldurshópur, sem auglýsingar beinast mest að.
21.feb. 2010 - 18:39
Ólafur Arnarson
Samningsstaða okkar er sterk og það er óþolandi að leiðtogar ríkisstjórnarinnar láti frá sér yfirlýsingar, sem grafa undan okkar sterku stöðu. Nú ríður á að standa í fæturna og gera skyldu sína fyrir land og þjóð. Ekkert minna dugar. Jóhanna og Steingrímur verða að sýna og sanna að þau vinni af heilindum með stjórnarandstöðunni og íslensku samninganefndinni að því að landa góðri lausn fyrir þjóðina í þessu skelfilega máli. Í því felst m.a. að gæta orða sinna og láta verkin tala.
20.feb. 2010 - 17:51
Ólafur Arnarson
Slíkt verður ekki liðið! Steingrímur verður að múlbinda aðstoðarmanninn orðglaða og bæði Steingrímur og Jóhanna Sigurðardóttir verða að gæta þess að eyðileggja ekki samningsstöðu Íslands með ótímabæru gaspri hvort heldur er í fjölmiðlum eða í samtölum við erlenda ráðamenn. Ef þetta fólk getur ekki staðið tryggan vörð um hagsmuni þjóðarinnar hefur það ekkert að gera í sínum háu embættum og ætti að segja af sér án tafar.
16.feb. 2010 - 22:18
Ólafur Arnarson
Ekki það, að ekki sé nóg um andstæðinga Íslands hér innanlands. Þar má nefna Indriða Þorláksson, aðstoðarmann fjármálaráðherra, fjármálaráðherrann sjálfan, og að sjálfsögðu forseta hagfræðideildar Háskóla Íslands, Þórólf Matthíasson, sem barist hefur fyrir málstað Breta og Hollendinga allt frá því tilkynnt var í júní að gengið hefði verið fra samningi, þó að enginn fengi að sjá þann samning fyrr en eftir að góðir aðilar innan og utan þings kröfðust þess.
15.feb. 2010 - 15:40
Ólafur Arnarson
Þetta er arfleifð Davíðs Oddssonar. Hann hefði getað beitt hæfileikum sínum betur en hann gerði, landi og lýð til heilla. Hann kaus hins vegar sína braut og það er undirrót gagnrýni minnar á Davíð Oddsson og hans störf. Þeir kostir, sem hann valdi á sinni löngu vegferð á toppi íslenskra stjórnmála og stjórnsýslu, höfðu meiri áhrif en flest annað í að leiða okkur á þann stað, sem við erum á í dag. Ábyrgð annarra er mikil. Hvers vegna risu ekki þingmenn Sjálfstæðisflokksins upp gegn því er Davíð sveigði flokkinn út af braut sjálfstæðisstefnunnar? Þeir verða að svara því fyrir sig og standa skil á því.
12.feb. 2010 - 17:40
Ólafur Arnarson
Væri ekki nær fyrir Jóhönnu Sigurðardóttur að axla sína eigin ábyrgð? Fáir núlifandi Íslendingar hafa setið lengur á ráðherrastóli en hún. Jóhanna gæti gert orð Michaels Jackson í laginu „Man In The Mirror“ að sínum og byrjað siðbótina á sjálfri sér. Hún gæti séð sóma sinn í að víkja til hliðar. Svo getur hún gert kröfu um að aðrir geri slíkt hið sama.
12.feb. 2010 - 15:00
Ólafur Arnarson
Davíð var að sjálfsögðu ekki eini maðurinn, sem fór út um lönd og lofsöng íslensku bankana og styrk þeirra. Það gerðu líka Geir H. Haarde og Ingibjörg Sólrún Gísladóttir. Sá munur er hins vegar á þeim og Davíð, að þau halda því ekki fram að þau hafi vitað allt árið 2008, og lengur, að íslensku bankarnir stefndu í þrot og yrði ekki bjargað. Davíð segist hafa varað við þessu allt árið en þess sér ekki stað að hann hafi gert nokkurð til þess að reyna að afstýra falli bankanna.