16. apr. 2017 - 18:02Jón Sigurðsson

Evrópusambandið ekki á dagskrá

Aðild Íslands að Evrópusambandinu er ekki á dagskrá og verður ekki um fyrirsjáanlega framtíð. Enginn getur fullyrt slíkt, en menn hugsa trúlega til a.m.k. 5-8 ára. En Evrópumál, samskipti Íslendinga við aðrar Evrópuþjóðir, eru auðvitað og verða áfram eitt helsta svið þjóðmála.

            Forysta Evrópusambandsins hefur lýst yfir því að ekki sé stefnt að inngöngu fleiri ríkja á næstu árum. Undirbúningur að ferli inngöngusamninga getur þá ekki hafist fyrr en eftir a.m.k. 4-5 ár, jafnvel þótt ríki æski inngöngu fyrr. Gera verður ráð fyrir að inngöngusamningar, þjóðaratkvæðagreiðslur, undirbúningur og ákvarðanir taki varla styttra en 5 ár. Þá er hér fullur áratugur í augsýn, fyrir þá sem leiða huga að þessu.  

            Líklega telja flestir íslenskir Evrópusinnar skynsamlegt eða nauðsynlegt að bíða niðurstöðu um úrsögn Stóra-Bretlands, áður en aftur verði aðhafst af hálfu Íslendinga. Svo mikilvæg er staða Breta talin fyrir okkur. Málefnalega ætti þetta aðeins að verða bið um 3-5 ár eða svo. Bretar geta vel bjargað sér sjálfir, og Evrópusambandið líka. En sundurlyndi Breta, streitur og undirbúningsleysi virðast munu lengja þennan tíma verulega, jafnvel tvöfalda hann.   

Muna eftir að nefna skrattann líka

Fleira kemur til álita í þessu. Miðstöðvar Evrópusambandsins fara aðeins með tæp 2% af hagkerfum aðildarþjóðanna. Lengi vel var sæmilegur friður um framþróun Evrópusambandsins. Flestallir voru sáttir á að forystumenn stærstu þjóðanna, ásamt embættismönnum, kæmu fram fyrir hönd heildarinnar. Nú hefur þetta alveg snúist við. Nú er þetta ,,lokuð foréttindastétt valdamanna og skriffinna sem vinnur gegn almenningi". Öll óánægja beinist allt í einu að forystu Evrópusambandsins, án nokkurs tillits til málsatvika. Og víða höfða hugsjónasnauðir framagosar til heilbrigðrar þjóðrækni almennings og verður ágengt. 

            Nú eru vandamál Grikkja, svo grátleg sem þau eru, sögð að öllu leyti Evrópusambandinu að kenna. Spilltir stjórnmálamenn, bankamenn og auðstétt Grikklands glotta. Nú gleyma menn Berlusconi þegar rætt er um vanda Ítala. Kanslara Þýskalands er kennt um flóttamennina og talið ósanngjarnt að aðildarríkin hjálpist að. Nú er sligandi ofurbákn Frakklands alls ekki sagt heimasmíðað. Nú er enginn maður með mönnum í Ungverjalandi eða Póllandi nema hann nefni skrattann alltaf þegar Evrópusambandsins er minnst. Þetta er nefnilega prýðileg grýla fyrir vandræði sem menn valda sjálfir heima fyrir.

            Evran er ekki orðin tvítug og hefur staðist mikinn öldugang. Hún er enn í mótun. Bandaríkjadalur þurfti meira en öld til að mótast. En nú er fjöldamargt orðið að stórsyndum evrunnar. Sumir halda því fram, að því er virðist í alvöru, að gengisfellingar séu ,,blessun". Meira að segja margir Íslendingar eru farnir að trúa þessu. Hér er þá komið nýtt skálkaskjól og evrunni kennt um flest það sem afvega fer.

            Hugsanlega ganga nokkur ríki úr Evrópusambandinu á næstu árum. Styrkur sambandsins og vægi miðast aftur á móti mest við Þjóðverja, Frakka og Niðurlendinga, og jafnvel einnig Ítala, Íra og Spánverja. Úrsögn sumra ríkja mun líklega helst hreinsa loftið. Margt bendir til að útþensla Evrópusambandsins hafi gengið of hratt og miklu hægari þróun sé heppilegari.

Hagsmunir, sérstaða og réttur

Það er margstaðfest á löngum tíma að sterkur meirihluti Íslendinga er andvígur aðild að Evrópusambandinu. Menn sjá Evrópusambandið sem ólýðræðislegt skriffinnsku- og valdabákn og tilræði við þjóðlegt fullveldi. Það er ráðgáta að ríkisstjórn Íslands efndi ekki til þjóðaratkvæðagreiðslu til að drepa málið. Fullyrða má að rækileg umskipti þarf til að afstaða meirihluta þjóðarinnar breytist.

            Áratugum saman var unnið að auknum viðskiptum þjóða og samþættingu atvinnulífs, markaða og þróunar. Nú telja margir þetta samsæri auðvalds og forráðahópa. Nú sjá menn í þessu byggðaröskun og atvinnuleysi, yfirgang auðhringa, lokuð valdakerfi og ofsagróða ofur-auðmanna. Og víst er hæfa í þessu. En þó hefur almenningur líka fengið að njóta mikilla ávaxta alþjóðaþróunarinnar.

            Afstaða Íslendinga til samskipta og viðskipta við aðra greinist þannig að annars vegar  er vernd + öryggi + aðhald og hins vegar breyting + áhætta + opnun. Þessi öxull gengur í ólíkum hlutföllum gegnum alla íslenska stjórnmálaflokka og helstu hagsmunasamtök. Flestir hérlendis fylgja þessum öxli þegar þeir taka afstöðu til Evrópusambandsins.

            Hagsmunum, sérstöðu og rétti Íslendinga er best lýst í samþykkt flokksþings Framsóknarmanna 2009 um aðildarviðræður. Enda þótt þessi samþykkt hafi verið gerð við aðstæður sem nú eru að baki, er mikilvægt að sem flestir kynni sér efnisatriði hennar. Þau eru í fullu gildi fyrir þjóðina.

 

                                                           Höf. er fv. skólastjóri




18.des. 2016 - 11:38 Jón Sigurðsson

Framsóknarflokkurinn aldargamall

Framsóknarflokkurinn ber svip af fólki við búsmala, fisk og handverk, ekki síst úti á landsbyggðinni. Flokksmenn hafa alltaf verið fálátir um hugmyndafræði, en í flokknum lifa ómar af ungmennafélagsanda, sveitamennsku, samvinnu og þjóðernisrómantík. Þetta er stolt flokksmanna, en reyndar bæði styrkur og veikleiki í fylgisöflun. Löngum gaf þetta mörgum góðborgara og háskólamanni aðkenningu af óþægindum, og á sumum þrepum þjóðfélagsins hefur þótt frekar ófínt að láta uppi stuðning við Framsóknarflokkinn.

21.maí 2016 - 16:00 Jón Sigurðsson

Icesave - enn og aftur

Nú er lokið fullnaðargreiðslum Icesave-skuldarinnar. Slitabú Landsbanka Íslands stóð undir greiðslunum en ekki almenningur. En þess var aldrei kostur að komast hjá óþægindum vegna Icesave eftir hrunið. Engin niðurstaða um Icesave gat orðið annað en byrði.
14.maí 2016 - 18:35 Jón Sigurðsson

Aflandsreikningar

Gjaldeyrishöft setja ýmsar skorður, en það er ekki óheimilt að eiga fé á banka erlendis. Það er ekki óheimilt að stunda viðskipti erlendis, afla tekna, eiga eignir eða undirgangast skuldbindingar þar. Aðilar í útflutningi og innflutningi komast ekki hjá þessu. Hins vegar getur það skipt máli hvernig og hvar tekna er aflað og einnig hvernig og hvert er farið með þær.
16.mar. 2016 - 10:30 Jón Sigurðsson

Grikkir áttu annan kost

Grikkir lentu í ægilegum efnahags- og samfélagsóförum fyrir skömmu og takast enn á við mikla erfiðleika. Þeir sem til þekkja benda á að vandræðin voru að talsverðu leyti afleiðingar eigin athafna grískra stjórnvalda, atvinnulífs og fjármálastofnana. En þjóðin fékk skellinn. Grískum almenningi hefur sárnað að sitja undir umvöndunarorðum frá öðrum ríkjum, enda höfðu stjórnmálamenn og auðstéttin ráðið för en ekki alþýðan.
25.jan. 2016 - 13:30 Jón Sigurðsson

Sumum ljúft en öðrum leitt

Öll tungumál breytast smám saman og stöðugt meðan þau lifa á vörum einhverra. Engin ástæða er til að amast við því. Það væri tilgangslaust og verður þá helst til að hraða hnignun og dauða tungumálsins.
14.jan. 2016 - 18:59 Jón Sigurðsson

Könnun um trú landsmanna

Samtökin ,,Siðmennt" hafa látið gera könnun um trúarafstöðu Íslendinga um þessar mundir. Í fljótu bragði virðist þetta athyglisverðasta könnun.
09.jan. 2016 - 14:37 Jón Sigurðsson

Fáum erlendum mönnum meira að þakka

Frederik Grundtvig var aðdáandi íslenskrar menningar og hafði mikil áhrif til skilnings á þjóðfrelsiskröfum Íslendinga, reyndar ekki síður meðal Íslendinga sjálfra en Dana. Hann var áhrifamikill kennimaður og skáld, uppreisnargjarn lengi, og einn af stjórnarskrárhöfundum Dana og þar með Íslendinga.
31.des. 2015 - 11:54 Jón Sigurðsson

Þjóðhyggja er þjóðarnauðsyn

Sema Erla Serdar, formaður framkvæmdastjórnar Samfylkingarinnar, skrifar grein á Pressan.is nú um áramótin. Hún fjallar um hættuna á þjóðrembingi og um þjóðernishyggju. Margt er skynsamlegt í grein hennar. Aðalboðskapur greinarinnar er réttmætur, orð í tíma töluð.
05.sep. 2015 - 13:02 Jón Sigurðsson

Krían, lóan, gæsin og álftin

Tvær þjóðsögur ráða hugmyndum okkar allra um fund og landnám Íslands. Annars vegar segjum við Íslendingar alltaf að fundur Íslands og landnám hafi verið hluti hetjulegra víkingaferða, hernaðar og landvinninga. Hins vegar segjum við öll að fyrstu landnámsmennirnir hafi lagt út í algera óvissu, siglt út á úfin norðurhöf á alls ókunnar slóðir, og að þetta staðfesti hetjulund þeirra.
01.ágú. 2015 - 16:00 Jón Sigurðsson

Um ,,barnatrú" Jóns Gnarrs

Ég er aðdáandi Jóns Gnarrs og hef um margra ára skeið reynt að lesa sem mest eftir hann. Ég kynntist honum nokkuð sem borgarstjóra og gat séð störf hans á mikilvægu sviði. Þetta breytti skoðun minni á honum ekki. Laugardaginn 1. ágúst sl. skrifar Jón grein í Fréttablaðið, um barnatrú. Ég er ekki sammála öllu sem þar segir.
15.júl. 2015 - 13:15 Jón Sigurðsson

Grikkland: Margir leikir framundan

Þegar þetta er skrifað (15. júlí 2015) getur enginn séð fyrir um niðurstöður í brýnum málefnum Grikkja innan evrusamstarfsins. Og enginn getur sagt fyrir um áhrif á framtíð evrusamstarfsins eða á ESB. Margir og tímafrekir leikir eru enn framundan. Taflmennirnir sem sitja andspænis Grikkjum hafa á ný skipt með sér verkum. Þjóðverjar og Finnar hafa tekið að sér ,,vonda“ hlutverkið og nú síðast hefur Alþjóðagjaldeyrissjóðurinn tekið að sér að leika ,,góðan“ leik.
09.júl. 2015 - 14:46 Jón Sigurðsson

Hvað má læra af Grikklandi?

Nú spyrja menn víða: Hvað má læra af hörmungum Grikkja og stöðu Grikklands innan Evrópusambandsins (ESB)? Málinu er alls ekki lokið. Nokkrar hugleiðingar geta átt rétt á sér, en ná varla langt.
08.apr. 2015 - 15:50 Jón Sigurðsson

„Ástandið“ í Evrópu

Stöðugt berast fregnir af vandræðum Evrópusambandsins og evrunnar. Varla líður svo dagur um þessar mundir að forystumenn Grikkja gefi ekki tilefni til frétta. En þetta virðist allt á fallanda fæti. Hér verður ekki reynt að lýsa þessu eða skýra þetta allt, en nokkur dæmi tekin.
31.mar. 2015 - 19:03 Jón Sigurðsson

Lofsverð viðleitni - en miklir agnúar

Frosti Sigurjónsson alþingismaður á hrós skilið fyrir að sökkva sér niður í fjármálafræðin og leita eftir valkosti til að leysa af hólmi það fjármálakerfi sem við höfum búið við. Framtak hans í þessu er lofsvert, og ný skýrsla hans allrar athygli verð. Aftur á móti er íslenska opinbert mál og störf Alþingis og stjórnsýslunnar eiga að fara fram á íslensku. Því hneyksli og þeirri skömm verður ekki trúað að það sé annað en hugsunarleysi og fljótræði að skýrslan er birt á ensku.
22.mar. 2015 - 20:36 Jón Sigurðsson

Fullveldisumræða

Engan hef ég heyrt eða séð halda því fram að Írar, Danir, Eistar, Hollendingar, Finnar, Svíar eða aðrar þjóðir Evrópusambandsins hafi afsalað sér fullveldi sínu. Þvert á móti líta þjóðhyggjumenn í þessum löndum svo á að aðild að Evrópusambandinu styrki, efli og tryggi fullveldi þjóðanna. Aðild að Evrópusambandinu felur ekki í sér afsal fullveldis, heldur aðeins skilyrt framsal stjórnvaldsþátta til sameiginlegrar umsjónar.
20.mar. 2015 - 15:24 Jón Sigurðsson

Athyglisverð ummæli í Morgunblaðinu

Jón Steinar Gunnlaugsson ritar athyglisverða grein í Mbl. föstud. 20. mars um aðildarviðræður að Evrópusambandinu. Þar segir hann m.a.:
14.feb. 2015 - 19:49 Jón Sigurðsson

Trú og siður Jóns Gnarrs

Jón Gnarr skrifar athyglisverðan pistil í Fréttablaðið laugardaginn 14. febrúar 2015. Eins og jafnan er Jón einlægur, opinskár og hugkvæmur - og hefur gaman af að ögra með óvæntum ábendingum og samlíkingum. Sumir hneykslast á þessu, aðrir fagna, og enn aðrir fá skemmtilegt tækifæri til að velta málum fyrir sér frá nýju sjónarmiði.

21.des. 2014 - 12:15 Jón Sigurðsson

Kirkjuferðir barna

Enn einu sinni verða deilur um kirkjuferðir barna. Sem fyrr verður meirihlutinn alveg dolfallinn yfir þessu, því að fátt hollara eða betra geta flestir foreldrar hugsað börnum sínum. Kolbrún Bergþórsdóttir skrifaði um þetta stutta grein í Morgunblaðið (Er boðskapur Krists hættulegur - 18.12.2014) af þeirri snilld, hófsemi og réttsýni sem henni er af Guði sjálfum gefin.
01.nóv. 2014 - 13:13 Jón Sigurðsson

Burt með betl og væl

Sumir halda að viðskiptasvæði eigi að vera það sama og þjóðríki eða þjóðmenning. Svo er öllu ruglað saman. Þá vakna gamlar spurningar: Væri ekki ódýrara að Íslendingar verði fylki í Noregi? Áttum við nokkuð að afsegja Danakonung? Væri ekki þægilegara að sameina Norðurlöndin? Verðum við ekki að fá útlendinga sem Seðlabankastjóra, sem dómendur um efnahagsbrot, sem Hæstaréttardómara?

Jón Sigurðsson
Fv. ráðherra, seðlabankastjóri, formaður Framsóknarflokksins og rektor.
Hannes Hólmsteinn Gissurarson
Hannes Hólmsteinn Gissurarson - 20.4.2017
Hvert skal stefna í utanríkismálum?
Hannes Hólmsteinn Gissurarson
Hannes Hólmsteinn Gissurarson - 22.4.2017
Þegar kóngur heimtaði Ísland
Börkur Gunnarsson
Börkur Gunnarsson - 25.4.2017
Einbýlishús eða ekki einbýlishús?
Elín Ósk Arnarsdóttir
Elín Ósk Arnarsdóttir - 25.4.2017
Hvíla ekki hætta
Börkur Gunnarsson
Börkur Gunnarsson - 26.4.2017
Ég þarf að finna nýjar götur
Björgvin G. Sigurðsson
Björgvin G. Sigurðsson - 28.4.2017
Lýðræðið og listamenn skrumsins
Kristinn H. Gunnarsson
Kristinn H. Gunnarsson - 28.4.2017
Áfram vestur
Kristinn Karl Brynjarsson
Kristinn Karl Brynjarsson - 28.4.2017
Manifesto stráks úr Breiðholtinu
Suðri
Suðri - 28.4.2017
Að vera fyrirmyndar fyrirmynd
Hannes Hólmsteinn Gissurarson
Hannes Hólmsteinn Gissurarson - 29.4.2017
Minningin um fórnarlömbin
Magnús Þór Hafsteinsson
Magnús Þór Hafsteinsson - 29.4.2017
Sílikondalur sjávarútvegsins
Fleiri pressupennar