Leiðtogi óskast

Hubert Humphrey, fyrrum varaforseti Bandaríkjanna, sagði eitt sinn:

Að gera mistök er mannlegt, að kenna öðrum um eru stjórnmál. 

Í Kastljósinu í gær sáum við stjórnmálamanninn Steingrím J.  Hann viðurkenndi engin mistök vegna Icesave. 

Mistök sem blasa þó við og flestum ljós.  

Steingrímur er ekki forsætisráðherra en þó helsti forkólfur ríkisstjórnarinnar.  Forsætisráðherratitill einn og sér gerir engan að leiðtoga.  Það þarf meira til.  Það er stundum sagt að munurinn á leiðtoga og stjórnmálamanni er að leiðtoginn lætur hugsjónir sínar móta umhverfið en stjórnmálamaðurinn lætur umhverfið móta sig.  Þá hafa stjórnmálamenn ekki endilega hæfileika leiðtoga þó leiðtogar hafi hæfileika stjórnmálamanna.
 
Vissulega þarf leiðtogi stundum að samræma raunsæi og hugsjónir til að koma stefnumálum í gegn og það má Steingrímur eiga að hafa gert ríkulega.   Þvert á yfirlýsta eigin sannfæringu greiðir hann nú atkvæði með aðildarviðræðum við ESB.  Þvert á  hugsjón umhverfisvæns flokks síns styður hann nú byggingu álvera.  Þvert á fyrri stóryrtar yfirlýsingar  um Icesave keppist hann nú við að réttlæta fullkomlega óásættanlegan Icesave samning.  

Og hver er sú stefna sem er þess virði að fórna öllu þessu fyrir?  

Mér fannst hann svara því ágætlega í Kastljósinu í gær þegar hann sagðist vera tilbúinn að leggja ýmislegt á sig fyrir samstarfið við Samfylkinguna í ríkisstjórn.  Tilbúinn að leggja ýmislegt á sig til að tryggja að þessi vinstri stjórn haldi völdum.  Haldi völdum  og það "lengi"  eins og hann orðaði það. 

Þá höfum við það.  Markmiðið er að halda völdum.   Vonandi er það ekki helsta markmiðið.  Leiðtoginn deyr með hugsjónum sem verða aukaatriði og stjórnmálamaðurinn lifnar við þar sem völdin verða helsta markmiðið. 

Er það skaði?  Já, það er skaði fyrir Ísland að Ísland hefur ekki leiðtoga sem talar máli landsins og ver hagsmuni okkar.  Að verja hagsmuni Íslands kostar m.a. staðfestu, stjórnmálakænsku og hugsjón leiðtogans. 

Stjórnmálamaður sem er tilbúinn að fórna öllum hugsjónum til þess eins að halda völdum með Samfylkingunni verður aldrei leiðtogi.