Skrökvandi, Rösk og Vakandi

Úrslit kosninga til Stúdentaráðs og Háskólaráðs í HÍ eru ljós. Í Stúdentaráð fékk Vaka 44,62% (2.424 stk.) atkvæða, Röskva 41,66% (2.263 stk.) atkvæða og Skrökva 13,72% eða 745 atkvæði. Í Háskólaráð fékk Röskva 2.272 atkvæði og Vaka fjórum atkvæðum færri. Skrökva bauð ekki fram í Háskólaráð.

Eftiráskýring og spuni Vökuliða er þannig að fylkingin sé ennþá langstærsta fylkingin í Stúdentaráði. Dæmi hver um sig hvað sé langstærst og hvað ekki. Hjá Röskvu hljómar skýringin þannig að ef ekki hefði verið fyrir Skrökvu hefði Röskva náð meirihluta á ný í Stúdentaráði, því í Háskólaráði, þegar Röskva keppti einungis á móti Vöku, bar hún sigur úr bítum. Helvísk ósamstaðan alltaf á vinstri vængnum! Í pólitík eru allir guðlegir snillingar samkvæmt sjálfum sér sem getur verið ákveðin snilld í réttu ljósi.

Í nýju Stúdentaráði eru Röskva og Vaka með 9 menn hvor og Skrökva með 2 sem gerir líf Skrökvu þess virði að lifa og framlengir kosningabaráttuna um háskólalöndin í einhverja daga.

Það er áfellisdómur yfir Stúdentaráði og hinum rótgrónu fylkingunum tveimur, Röskvu og Vöku, að Skrökva, félag flokksbundinna framapotara, nái tæplega 14% atkvæðum undir því yfirskyni að koma þurfi á stjórnsýsluumbótum í Stúdentaráði. Það er til marks um að í litrófi baráttumála hafi myndast tómarúm sem hvorki Röskva né Vaka kærði sig um að fylla í, tómarúm sem 13,72% nemenda HÍ samsamaði sig með. Þess ber að geta að önnur framboð hafa sprottið útfrá sömu stefnumálum og Skrökva, Háskólalistinn, sem náði inn í ráðið og Öskra, sem varð þó aldrei neitt nema rebel-ráðstefna korter í kosningar í HÍ í fyrra.

Að einhverju leyti má bera Skrökvu saman við Borgarahreyfinguna sem hlaut 7,2% atkvæða í Alþingiskosningum 25. apríl 2009. Að minnsta kosti nota bæði framboðin órans-litinn til þess að innramma stefnumálin. Einnig berjast þau bæði fyrir breytingum á núverandi fyrirkomulagi og eiga það sammerkt að benda á fávitaskap ríkjandi kerfis. Það sama er að gerast í borginni með Besta flokk Jóns Gnarrs, sem er með framboði sínu að hrista kjósendur til lífs um að það sé ekki endilega réttlætanlegt né best að styðja við ríkjandi kerfi. Ég velti því fyrir mér hvort þessi óhefðbundnu framboð séu hluti af nýja Íslandi. Er stækkandi hópur kjósenda búinn að fá nóg af því sem hefur alltaf verið og vill einfaldlega endurskilgreina og endurskipuleggja? Ég skal ekki segja, en atkvæðamagn þessara framboða er umhugsunarefni fyrir hefðbundin, aldagömul framboð. Aðlagist eða deyjið, stendur einhvers staðar - mögulega eitthvað í tengslum við Google vs. Kína.

Nú beinast spjót að Skrökvuliðum. Annað hvort stendur fylkingin við stóru orðin og knýr hinar fylkingar til samstarfs eða fellur í sama forarpytt og Borgarahreyfingin; sannar að hún sé ekkert skárri en það sem hún var sköpuð til þess að vera ekki, fyrir utan það að springa síðan í loft upp í beinni. Þó að tíminn einn muni leiða í ljós hvernig málum verður háttað hjá Stúdentaráði HÍ er ekki hægt að líta framhjá þeirri staðreynd að gott tækifæri hefur komið upp í hendurnar á ráðinu í formi skilaboða frá kjósendum. Þeim gefst tækifæri til þess að leggja til hliðar deilur um það hver gerði hvað hvenær og hver gerði ekki hvað hvenær, hver gaf smokka til þess að útrýma eigin fylkingu, hver setti síld í heimagerðar túnfiskssamlokur sem voru gefnar nemendum, hver laug í kosningablaðinu eða í besta falli ýkti...og deilur um annan þunglyndislegan áróður sem eru að gera vel þenkjandi námsmenn við HÍ æra.

Í staðinn fyrir að fylkingarnar Röskva og Vaka haldi áfram að endurtaka fyrir sjálfum sér að þær séu hinn raunverulegi sigurvegari kosninganna hvet ég þær til þess að líta í eigin barm, skoða aðdraganda kosninganna í ljósi úrslitanna og læra síðan af fortíð svo hægt sé að gera betur í framtíð.

Að endingu óska ég nýju Stúdentaráði farsældar á komandi starfsári, því það er ljóst að mörg baráttumálin bíða.

Höfundur er fyrrum formaður Stúdentaráðs f.h. Röskvu.