Það er ögurstund - sýnið ábyrgð

Íslendingar hafa eignast nýja þjóðhetju í óreiðumanni eftir að stórtækustu óreiðumennirnir sem settu þjóðina á hausinn eru fallnir í ónáð. Athafnamaður með óviðráðanlegan skuldaklafa og slóð af svikum, sem farinn var á hausinn áður en bankarnir féllu í haust - hann er nú um stundir fyrirmynd þorra manna og sannkölluð alþýðuhetja, eftir að hafa af einstakri tillitsemi við allt og alla, og þá sérstaklega nágranna sína, jafnað húsið sem hann hafði tapað við jörðu með jarðýtu.

Lítill lýðskrumari úr Borgarahreyfingunni lét mynda sig með spýtnabrak úr rústunum og lýsti því yfir að hann ætlaði að sýna forsætisráðherra minjagripinn. Það var ljótur leikur gagnvart Jóhönnu Sigurðardóttur. Botnlaus er sú lágkúra að notfæra sér hið erfiða ástand sem stórnvöld glíma við núna til að upphefja sig í augum trúgjarnra.

Menn tala um  Icesave-samningana á svipuðum forsendum og væru þeir að ræða um aðildarsamning að ESB. Rétt eins og Icesave sé einhver valkostur. Íslenskur banki á íslenskri ríkisábyrgð stofnaði til þessara innlána. Íslenska ríkið tryggði innlendar innistæður eftir að hann fór á hausinn. Heilbrigð skynsemi segir að Íslendingar beri ábyrgð á þessu. Skaðinn er skeður fyrir löngu og nú verið að reyna að ljúka málinu á sem allra mögulegasta þolanlega hátt. Menn hengja sig á ákvæði um veð og ábyrgðir. En þannig er það bara í lánasamningum, ef ekki er borgað, þá er gengið að veðum. Kosturinn er sá að Íslendingar eiga að geta staðið í skilum með afborganirnar. Þeir sem reyna að stöðva þetta mál bjóða engan annan möguleika en einangrun og efnahagslegt neyðarástand þar sem þeir sjálfir baða sig í athyglinni af eigin lýðskrumi.

Ég á eftir að sjá það gerast að allir þingmenn Sjálfstæðisflokksins greiði atkvæði gegn Icesave-samningunum. Illugi Gunnarsson. Þorgerður Katrín. Guðlaugur Þór. Pétur Blöndal. Birgir Ármannsson. Ég vil trúa því að þetta fólk hafi ábyrgðartilfinningu ásamt fleiri þingmönnum flokksins. Þetta fólk veit að þessi samningar eru forsenda fyrir því að hér geti eðlileg uppbygging hafist í samvinnu við vinaríki okkar.

Helsti gallinn við þessa ríkisstjórn er hik hennar og fum við niðurskurð ríkisútgjalda. Skatttekjur eru aldrei fastar í hendi. Með niðurskurði veit maður nokkurn veginn hvað maður er að spara. Í þessum efnum sýnir Sjálfstæðisflokkurinn ábyrgð og skynsemi og vill réttilega minni skattahækkanir en meiri niðurskurð. Sjálfstæðismenn verða líka að sýna ábyrgð í Icesave-málinu og greiða þessari illu nauðsyn braut. Svo við sjáum eitthvað annað framundan en rústir fjárglæframanna og blekkingar lýðskrumara.