Susan baðaði sig á Íslandi sjö ár í röð

Enginn erlendur skemmtikraftur hefur komið til að skemmta Íslendingum sjö ár í röð annar en Susan Haslund. Hún kom hingað frá Árósum í Danmörku á hverju sumri frá árinu 1974 til 1981 til að baða sig opinberlega við miklar vinsældir í minnsta baðkari heims.


Meðan aðrir háskólanemar unnu fyrir sér í fiski, garðvinnu eða á skrifstofum baðaði hún sig fyrir framan fjölda áhorfenda til að fjármagna sálfræðinám sitt við Árósarháskóla. Íslenskir karlaklúbbar og veitingahúsagestir lögðu þannig drjúgan skerf til menntunar hennar, en hún kom iðulega fram á fjórum eða fimm stöðum sama kvöldið. Ámundi Ámundason var umboðsmaður hennar hér á landi og í samtali við Samúel sagðist hann telja nokkuð víst að hún hafi komið fram í öllum karlaklúbbum landsins … nema hjá Frímúrurum.


Fékk höfðinglegar móttökur út um allt land

Þegar Ámundi rifjar upp samskipti sín við Susan tekur hann skýrt fram að hún hafi hvorki snert dóp eða áfengi. „Hingað kom hún af fúsum og frjálsum vilja og ekki var um neina mansalssamninga að ræða,” segir Ámundi. „Eldklár stelpa sem kunni að bjarga sér og stóð sína plikt með sóma. Í fyrstu var henni ekið á milli staða í borginni en þegar hún var orðin kunnug ók hún gjarnan sjálf.”

Ámundi segir að varla sé til sá kaupstaður eða þorp á landinu sem ekki hafi fengið Susan í heimsókn. „Hennar var beðið með mikilli eftirvæntingu og fagnað ákaft hvar sem hún kom og iðulega slegið upp veislum líkt og um opinbera heimsókn þjóðhöfðingja væri að ræða,” segir Ámundi. Hann segist ekkert hafa heyrt frá Susan síðan hún hætti að skemmta landsmönnum. „Nú er hún bara að öllum líkindum starfandi sálfræðingur heima í Árósum, komin á sjötugs aldurinn og farið að styttast í ellistyrkinn.”


Börnaleikföngin gáfu betur af sér en nektardansinn

Samúel átti viðtal við Susan þriðja sumarið sem hún kom hingað til að baða sig. Hún sagðist þá ekki þurfa að kvarta undan skorti á veraldlegum gæðum. Hún ætti gott hús í nágrenni Árósa, tvo bíla og seglbát. Þessu deildi hún með sambýlismanni sínum.

Susan er dönsk og lærður leikskólakennari. Í framhaldi af fóstrunáminu hóf hún nám í barnasálfræði við Árósarháskóla og hugðist afla sér m.a. tekna með nektardansinum þar til hún hefði lokið námi. Samhliða starfaði hún sem ljósmyndafyrirsæta og sölumaður barnaleikfanga. Sagðist hún þéna betur á því að kynna barnaleikföng en að dansa nakin þó að í fjögurra síðna grein í danska tímaritinu rapport væri talað um hana sem vinsælustu nektardansmey Dana.

Íslendingar áhugasamari áhorfendur en Danir

„Ég mundi ekki koma hingað svona aftur og aftur ef mér líkaði ekki við íslenska áhorfendur,” sagði hún. „Þeir sýna atriðinu mínu mun meiri áhuga en danskir áhorfendur og það kann ég meta. Heima fyrir starfa ég við sitthvað fleira en að sýna mig nakta og legg í rauninni minna upp úr nektardansinum nú en þegar ég var að byrja. Þarf ekkert á honum að halda í rauninni. Ég hef bara of gaman af þessu til að vilja hætta. Ég fæ mikið út úr því að koma fram fyrir áhorfendur og fá góðar undirtektir eins og hér á Íslandi. Líklega er ég svona mikill leikari í mér. Ég er ekki að þessu vegna þess að mér þyki gaman af að sýna líkamann. Ég er að vísu ekki feimin við að sýna hann, en gæti líka alveg verið án þess.”

Samúel vildi vita hvort það færi saman að sýna nektardans og stunda barnasálfræði. „Ég sé ekkert athugavert við það. Mórallinn í Danmörku er þanng að enginn fettir fingur út í þessa samtvinnun. Þetta er eins og hver önnur atvinna sem ég stunda til að hjálpa mér áfram við námið. Foreldrar barnanna sem ég sinnti á meðan ég var í fóstrunáminu hreyfðu aldrei andmælum þótt þeir fréttu af aukavinnunni.”


Í Læragjá, Laugardalslauginni og minnsta baðakari í heimi

Þótt atriði Susan í minnsta baðkari heims, eins og það nefndist í auglýsingunum, væri þekktast þá var hún með tíu önnur atriði á takteiknunum. Kom meðal annars fram sem jólaveinn og brúður í búningum sem hún saumaði sjálf. „Ég sleppti baðinu einu sinni, en því var ekki vel tekið og síðan sleppti ég því aldrei úr dagskránni aftur.”

Samúel þykir ólíkt að karlaklúbbar borgarinnar væru æstir í að fá Susan með baðkarið inn á gólf til sín í dag, en þeir hafa kannski gaman af að líta á nokkrar gamlar myndir Magnúsar Hjörleifssonar og Lofts Ásgeirssonar frá Íslandsheimsóknum hennar. Annas vegar af henni að baða sig í minnsta baðkari í heimi og hins vegar í Læragjánni í Nauthólsvík.