Stebbi Hilmars og Anna Björk: Ást við fyrsta símtal

Tveimur árum eftir að Stefán Hilmarsson steig fram í sviðsljósið hringdi hann eitt kvöldið í Bylgjuna til að óska eftir að fá leikið dúndrandi rokklag. Fyrir svörum varð Anna Björk Birgisdóttir dagskrárgerðarkona, sem var nú heldur á því að spila hugljúf lög fyrir hlustendur. Samtalið varði í hálftíma og varð strax rafmagnað. Á meðan var lítið um kynningar. Þetta var eiginlega ást við fyrsta símtal.



Þetta var vorið 1987 og ári síðar höfðu þau látið pússa sig saman í heilagt hjónaband. Skömmu síðar átti Gunnlaugur Rögnvaldsson, aðstoðarritstjóri Samúels, við þau viðtal þar sem þau rifjuðu upp fyrstu kynnin.

„Þegar ég hitti Stefán í fyrsta skipti augliti til auglitis hafði hann boðið mér í ellefu-bíó gegnum símann. Ég hafði hringt daginn áður því ég ætlaði að taka viðtal við hann um sönglistina en hann hafði getið sér gott orð með Sniglabandinu og sungið lagið 18 rauðar rósir með annarri hljómsveit. Ég settist upp í bílinn hjá honum þegar hann kom að sækja mig og kíkti annað slagið á hann útundan mér. Við höfðum talast við í síma daginn áður í á annan klukkutíma en ég vissi ekkert hvernig hann leit út. Ég hafði einhvern tímann séð hann en aldrei talað við hann augliti til auglitis og mundi ekkert hvernig hann leit út. Ég var því bæði kvíðin og spennt þegar ég hitti hann,” sagði Anna Björk í viðtalinu við Samúel í september 1988.

„Mér leið eins og ég væri orðin fjórtán ára aftur Við vorum farin að haldast í hendur fyrir hlé. Ég hafði spáð mikið í það hvort ég gæti farið á klossunum í bíó það það voru uppáhalds skórnir mínir á þessum tíma. Ég þorði það hins vegar ekki þar sem ég vissi ekki hvað Stefán var hár og vildi ekki láta hann fá minnimáttarkennd. Þegar við svo hittumst varð ég fúl yfir að hafa ekki farið í klossunum því hann var höfðinu hærri en ég.”

Stefán var á þessum tíma að spila á fullu með Sniglabandinu og þeysti víða um land. Anna fór ekki varhluta af því. „Strax helgina eftir bíóferðina bauð hann með mér í mótorhjólaferð með Sniglabandinu. Ég fékk pláss aftan á einu hjólinu og mamma stóð skjálfandi í dyragættinni þegar þeir komu að sækja mig nokkrir gæjar á mótorhjólum … Eftir þetta þróaðist samband okkar Stefáns hratt. Við skruppum í Evrópureisu, þvældumst um í tíu daga og fórum meðal annars til Parísar. Þaðan hringdum við heim því við vissum um íbúð og vorum búin að ákveða að byrja að búa saman. Við fluttum inn í nóvember, en þá voru sex mánuðir liðnir frá því við hittumst fyrst. Þetta gerðist allt frekar hratt.  Trúlofunin kom á annan í jólunum og var ekki mjög rómantísk,” sagði Anna. “Nei! Ekki það?!” Stefán var ekki alveg sammála.

“Við vorum að horfa á vídeó fram eftir nóttu og trúlofunarhringarnir lágu á borðinu fyrr framan okkur,” hélt Anna áfram frásögninni. “Annað veifið gáfum við hringunum auga og svo allt í einu sögðum við: Trúlofum okkur.” Þau ýttu á biðtakkann, Stefán fór á hnén. Þau settu upp hreingana og héldu svo áfram að horfa á vídeómyndina.

“Við drógum giftinguna í nokkra mánuði,” sagði Stefán. “Ég vildi hugsa ráð mitt vel. Var ekki alveg á því að giftast svona fljótt, en á endanum sannfærðist ég um að Anna væri mikill kvenkostur,” bæyyi hann við og segist hafa farið aftur á hnéhlífarnar og stungið upp á brúðkaupsdegi við Önnu. “Gifting er ekkert stórmál ef ástin er fyrir hendi. Hjónaband treystir andlegu tryggðarböndinog er innsigli á kærleikan, svo við tölum hátíðlega. Ef maður getur hugsað sér að eyða ævinni með einhverri konu, þá finnst mér gifting rökrétt framhald,” sagði söngvarinn vinsæli.

“Stúlkur spá kannski í aðeins öðruvísi mál en strákar,” sagði Anna. “Ég hugsaði til dæmis um það hvort ég væri reiðubúin að eignast barn með þessum Stefáni þegar við vorum að velta hjónavígslu fyrir okkur.”

Anna segist hafa óttast það mest að hún mundi springa úr hlátri þegar hún gengi inn eftir kirkjugólfinu. En þegar stóra stundin rann upp kom annað upp úr dúrnum. “Þear dyrnar opnuðust og pabbi gekk með mér inn í takt við Brúðarmarsinn þá stirðnaði ég upp og kiknaði hnjánum. Pabbi ríghélt í höndina á mér, sagði mér að anda djúpt og ganga í takt. Ég náði að kreista fram einhverja geiflu sem átti að vera bros og komst á leiðarenda.”

Presturinn gaf hjónakornunum gott veganesti. Sagði þeim að rífast ef það bætti eitthvað ástand mála og var hinn skemmtilegasti í ræðunni. Tvinnaði saman hugtökum úr tónlistinni og sambúð þeirra. Hann sagði þeim líka að eignast marga Sókratesa. Þau Stefán og Anna eiga í dag tvo syni, þá Birgi Stein og Steingrím, sem eru 6 og 18 ára í dag.

Það er algengt að brúðhjón láti sig hverfa af landi brott eftir brúðkaup eða stingi af upp í sveit til að vera í friði. Þau Anna og Stefán ákváðu að verja viku saman í sveitasælu, en áður en af því gat orðið klessti Anna bílinn þeirra illa. “Það var einhver gamall karl sem drap á bílnum og ég sá fullt af bremsuljósum en bremsurnar hjá mér læstust og ég skall með dynk aftan á einum. Framhlutinn fór í köku og við Stefán sátum bara heima þessa viku sem við höfðum tekið okkur frí til að vera saman.”

Stefán og Anna Björk hófu búskapin í lítilli íbúð í Þingholtunum í Reykjavík. Einna fyrirferðarmest í sendiferðabílnum sem flutti eigur þeirra á staðinn voru plötusöfn þeirra sem fytllti marga kassa, enda bæði á kafi í tónlistinni. Hún sem sem plötusnúður í útvarpi og hann sem tónlistarmaður. Það var mat blaðammanns Samúels, að þau ættu vel saman. Bæði jafn róleg í fasi með það á hreinu um hvað lífið snýst. Lokaorðin: Þau lifa fyrir tónlistina, hjúfra sig upp að hvort öðru, láta tímann líða og lifa fyrir líðandi stund.