14. jún. 2010 - 17:30Steingrímur Sævarr Ólafsson

Hvað er hægt að gera í Amsterdam?

Síkjasiglingar eru frábær leið til að skoða Amsterdam

Síkjasiglingar eru frábær leið til að skoða Amsterdam

Fyrir utan frábær söfn, fjölbreytta flóru veitingastaða og ótrúlegt magn skemmtistaða og pöbba - er fjölmargt hægt að gera í hinni margbreytilegu Amsterdamborg. Þar er fátt sem er ómögulegt.

Það er að sjálfsögðu hægt að gera næstum allt sem hægt er að gera á hefðbundnum ferðamannastöðum í stórborg.  En Amsterdam hefur sína sérstöku möguleika og tækifæri sem mig langar að benda ykkur á.

Má ég sérstaklega mæla með:

Síkjaferð. Fjölmargir bátar bjóða upp á skoðunarferð um borgina í síkjaferðum þar sem hægt að er að kynnast borginni og sjá hana frá annarri hlið.  Þetta er ekki of dýrt og hægt er að velja um mislangar ferðir.  Í sumum þeirra er hægt að fá létta rétti meðan skoðað er.  Sjálfur er ég verulega sjóveikur...en síkjaferðir klikka ekki!

Hjólaleiga. Það er ódýrt að leigja reiðhjól í Amsterdam og þannig er hægt að komast hratt og ódýrt yfir.  Tilvalinn ferðamáti í þessari flötu og reiðhjólavænu borg.  Passið ykkur bara á sporvagnateinunum og horfið vel í kringum ykkur. Þetta finnst mér stórskemmtilegur ferðamáti í borginni.

Kaffihús.  Ef veðrið er gott, er fátt sem slær út að sitja á útikaffishúsi og skoða mannlífið.  Ódýrt og hversu lengi þetta varir er algjörlega undir þér komið.

Rauðahverfið.  Það er ekki hægt að fara til Amsterdam öðruvísi en að ganga í gegnum Rauðahverfið. Engar myndir samt en forvitnilegt er það.

Safnaferðir.  Í Amsterdam er mikið magn safna, hvort sem um er að ræða listasöfn, sögusöfn eða annað.  Þau eru á hverju strái og ómögulegt að fara frá borginni án þess að hafa kíkt inn í nokkur þeirra.

Kíkja í úthverfin.  Alltof margir ferðamenn fara til Amsterdam og eru bara á aðalverslunargötunum eða í miðbænum.  Það er um að gera að kíkja í úthverfin. Þar má finna frábæra veitingastaði, skemmtilegar verslanir og hliðina á Amsterdam sem aðeins heimamenn upplifa.

Fara á flóamarkaði.  Það eru margir frábærir markaðir í Amsterdam, sérstaklega um helgar.  Þar má gera reyfarakaup á öllu frá barmmerkjum til uppstoppaðra ísbjarna, stríðsminjum til heimilistækja, fötum til listaverka.  Markaðurinn á Waterlooplein stendur alltaf fyrir sínu.

Amsterdam býður hreinlega upp á svo marga möguleika að ferð þangað er alltaf þess virði!

Left Right



28.jún. 2010 - 06:10 Snæfríður Ingadóttir

Töff hönnunarhótel í Amsterdam: Klósettið út á miðju gólfi í gegnsæju röri -MYNDIR

Á Citizen M hótelinu í Amsterdam pissar maður í klósett sem er staðsett í gegnsærri súlu út á miðju gólfi á hótelherberginu. Hönnunin er smart, en þú vilt kannski ekki deila slíku herbergi með hverjum sem er. Á Citizen M hótelinu í Amsterdam snýst allt um rétta „lúkkið“.  Herbergin eru pínuítil en afar nýtískuleg með opnu salerni og sturtu. Með hverju herbergi fylgir lítið tæki sem passar upp á að rétta stemmingin sé á staðnum.

21.jún. 2010 - 13:00 Snæfríður Ingadóttir

Fullkominn dagur í Amsterdam: Framúrstefnulegir skartgripir, bíó og pönnukökur

Það er margt spennandi að gerast í hönnun í Amsterdam, ekki síst í skartlist. Mörg skartgripagallerí selja afar framúrstefnulega hluti. „Allir sem fara til Amsterdam verða að fá sér hollenska pönnuköku með stroop,“ segir Rannveig Gissurardóttir kennari í Waldorfskólanum í Lækjarbotnum. Sjálf þræðir hún líka alltaf skartgalleríin þegar hún er í borginni og fer gjarnan í bíó.
08.jún. 2010 - 11:00 Snæfríður Ingadóttir

8 hlutir sem þú verður að smakka í Amsterdam: Má bjóða þér smá bleikt á brauðið?

Litríkt sykurskraut er notað sem álegg ofan á brauð í Hollandi. Litríkt kökuskraut ofan á brauð, pönnukökur með sírópi og hollenskur lakkrís er meðal þess sem ferðamenn í Hollandi verða að smakka.
22.maí 2010 - 11:45 Steingrímur Sævarr Ólafsson

Amsterdam – Frá kaffibolla til „kaffihúsa“ og allt þar á milli

Þú veist alveg hvenær þú ert í Rauðahverfinu Viltu bjór, Sjéniver, eða  reykja kannabis? Viltu sitja á útikaffihúsum og sötra léttvín, fá þér ekta hollenskan bjór eða dansa við dúndrandi diskó eða teknó?  Rjúkandi espresso eða borða hasskökur?  Það er sama hverju leitað er að, Amsterdam býður upp á það í skemmtanalífinu.
19.maí 2010 - 08:30 Snæfríður Ingadóttir

Stærsti flóamarkaður Amsterdam: Inni á veturna, úti á sumrin

Um 700 sölubásar eru á stærsta flóamarkaði Amsterdam, IJ-Hallen. Einu sinni í mánuði er risastór flóamarkaður haldinn í norðurhluta Amsterdam. Markaðurinn er stærsti flóamarkaður borgarinnar og þar er hægt að kaupa allt milli himins og jarðar. Ekki spillir umhverfið fyrir þar sem markaðurinn er haldinn í iðnaðarhverfi sem gaman er að skoða.
16.maí 2010 - 08:00 Steingrímur Sævarr Ólafsson

Amsterdam – Borg bragðlaukanna

Persónuleg þjónusta er í hávegum höfð á Blue Pepper Viltu indónesískan, argentínskan, tælenskan, japanskan, indverskan eða hollenskan sælkeramat?  Safaríkar steikur eða gómsæta grænmetisrétti? Þá þarftu ekki að leita lengi í Amsterdam því fáar borgir hafa jafn marga og jafn fjölbreytta veitingahúsaflóru á jafn litlu svæði.  Það eru yfir 1000 veitingastaðir í borginni sem þjóna bragðlaukunum eins og best verður á kosið og verðið er jafn mismunandi og staðirnir eru margir.
12.maí 2010 - 08:00 Steingrímur Sævarr Ólafsson

Amsterdam – Menningar-, safna- og listaborg

Ein fjölmargra sjálfsmynd af Van Gogh Fyrir áhugamenn um listir og söfn þá er af nógu að taka í Amsterdam.  Meira að segja fyrir mann eins og mig, sem telst nú seint í flokki áhugasömustu manna um málverk og listasögu, er aðdráttarafl safnanna í Amsterdam of mikið og ég stenst aldrei mátið að kíkja inn á safn eða tvö.
10.maí 2010 - 15:00 Steingrímur Sævarr Ólafsson

Amsterdam – Litla stóra borgin

Þeir kunna að nota ljós og liti í Amsterdam Það er óhætt að segja að fáar borgir í Evrópu séu jafn líflegar og stífluborgin við ánna Amstel. Fyrir þá sem ekki hafa leitt hugann að því, þá er nafnið Amsterdam einmitt dregið af orðunum „dam“ eða stífla og ánni Amstel – og ætti því kannski frekar að heita Amsteldam.
08.maí 2010 - 13:00 Snæfríður Ingadóttir

Kaffi og hvaðeina: Kaffihús þar sem allt er til sölu

EItt skemmtilegasta kaffihús Amsterdam er Latei. Þar er allt til sölu. Á kaffihúsinu Latei í Amsterdam færðu ekki bara gott kaffi, kökur, súpur og samlokur heldur geturðu nánast keypt allt sem er þar inni. Borðin, bollarnir, ljósin, myndirnar á veggnum – allt er til sölu.