Siv Friðleifsdóttir útskrifast sem leiðsögumaður: Ísland einstakt land

Á föstudaginn útskrifuðust fyrstu leiðsögumennirnir úr leiðsögunámi á háskólastig frá Endurmenntun Háskóla Íslands. Þeirra á meðal var Siv Friðleifsdóttir, fyrrum ráðherra, sem hyggst leiðsegja ferðamönnum á norsku og ensku.

„Ég mæli hiklaust með þessu námi. Það er bæði áhugavert og skemmtilegt. Ég hafði sérstaklega gaman af því að rifja jarðfræðina upp og kafa enn dýpra í hana, enda Íslands einstakt land út frá jarðfræðilegu sjónarhorni,“ segir Siv.

Aðspurð að því hvernig hún hyggist nýta námið þá segist hún halda öllum möguleikum opnum. Hún ætli sér ekki að gerast leiðsögumaður í fullu starfi, eins og er, en sjái jafnvel fyrir sér að leiðsegja eitthvað í sumarfríi sínu í sumar.

Leiðsögustörf eru Siv ekki alveg ókunn því hún hefur margoft aðstoðað erlenda gesti sem átt hafa leið um alþingishúsið og einnig hefur hún leiðsagt erlendum ferðamönnum um Reykjavík.  Það er svo mikið sem hægt er að sýna erlendum ferðmönnum hér á landi og þegar maður sér hvað landið kemur gestunum mikið á óvart og hversu ánægðir þeir eru þá verður maður afar stoltur af landinu. Leiðsögunámið hefur einnig nýst Siv í starfi hennar sem þingmaður, enda kemur námið inn á öll þau svið sem snerta land og þjóð. Þannig var Siv nýlega fyrsti fluttningsmaður tillögu um landnýtingu fyrir ferðamennsku á miðhálendinu. Sjá nánar hér.

Alls voru 24 leiðsögumenn í útskriftarhópnum, 16 konur og 9 karlar (sjá myndina hér fyrir neðan) en annar hópur hóf nám síðastliðið haust og eru 40 nemendur í honum. Það er því ljóst að fagmenntuðum leiðsögumönnum mun fjölga til muna á næstunni.

Þeir sem hafa áhuga á því að kynna sér leiðsögunámið nánar geta lesið sér til hér.