04. maí 2012 - 12:00
Vigfús Ægir Vigfússon
Breskri fjölskyldu, sem varð innlyksa á Spáni vegna eldgossins í Eyjafjallajökli árið 2010, hafa verið dæmdar bætur frá spænska flugfélaginu Iberia. Það tók fjölskylduna fjóra daga að komast heim til Englands með tilheyrandi kostnaði vegna bílaleigubíla, lestarferða og gistingar.
Fjölskyldan hafið verið í tvær vikur í Ekvador og hugðist fljúga heim til London frá Madrid. Starfsmaður Iberia sagði að vegna ösku í háloftunum yrði ekki flogið til Englands þann daginn og skynsamlegast væri fyrir þau að skipuleggja för sína þangað með öðrum hætti. Þau gerðu það en daginn eftir þessa ráðgjöf flaug Iberia reyndar til London.
Samkvæmt reglum Evrópusambandsins skal endurgreiða flugmiða þeirra sem urðu fyrir vandræðum vegna öskunnar frá Eyjafjallajökli 2010. Iberia hafði endurgreitt fjölskyldunni flugmiðana en neitaði að standa straum að ferðakostnaði þeirra að öðru leyti.
Undirréttur í London tók undir sjónarmið flugfélagsins á grundvelli Evrópulöggjafarinnar. En málinu var áfrýjað og fjölskyldan vann það. Það sem réði úrslitum var að flugfélagið fór ekki að reglum í flugrekstri með því að heykjast á því að innrita fjölskylduna í næsta flug.
Iberia flugfélagið var dæmt til að greiða fjölskyldunni 8.000 sterlingspund í útlagðan ferðakostnað og 2.000 sterlingspund að auki í miskabætur.
Það er augljóst að flugfélögin gera allt sem þau geta til að draga kjarkinn úr þeim sem vilja sækja rétt sinn. Ég vona að þetta mál verði til þess að sýna öðrum fram á að þeir hafa tækifæri til að sækja bætur til flugfélaganna,
sagði fjölskyldufaðirinn.
Iberia flugfélagið er talið hafa varið a.m.k. 50.000 sterlingspundum, yfir 10 milljónum ÍSK, í málskostnað.