18. feb. 2010 - 08:00Snæfríður Ingadóttir
Íslendingar kvarta m.a. yfir verðlagi úti á landi, skorti á nektarnýlendum og of fáum tjaldstæðum sem leyfa hunda. Mynd:Getty
Í nýrri könnun Ferðamálastofu um ferðalög Íslendinga innanlands kvarta margir yfir vondum mat í vegasjoppum, skítugum salernum og háu verðlagi. Þrátt fyrir óánægju með ýmis atriði ferðuðust landsmenn samt óvenju mikið um landið á síðasta ári.
Könnun Ferðamálastofu var framkvæmd í janúar síðastliðnum og þar kemur fram að níu Íslendingar af hverjum tíu ferðuðust innanlands á árinu 2009. Það er nokkuð hærra hlutfall en fyrri kannanir Ferðamálastofu hafa sýnt.
Þrátt fyrir að það séu vissulega góðar fréttir að Íslendingar séu duglegri við að ferðast innanlands er ekki þar með sagt að þeir séu ánægðir með það sem í boði er. Það kemur berlega í ljós í svörum þeirra við spurningu Ferðamálastofu um það hvað mætti bæta í íslenskri ferðaþjónustu.
Hér eru 25 dæmi um það sem pirrar Íslendinga á ferð um landið:
- Það vantar fleiri tjaldstæði og gististaði þar sem má hafa hunda.
- Það vantar fleiri skilti og göngustíga.
- Það vantar íslenska nektarnýlendu.
- Auglýsa þarf betur það sem hægt er að gera og sjá. Oft fær maður upplýsingar um eitthvað áhugavert og skemmtilegt of seint.
- Það vantar meiri þjónustulund og lipurð í þjónustuaðila. Fólk í þjónustustörfum á að tala íslensku og brosa. Afgreiðslufólk þarf að læra kurteisi.
- Það mætti bjóða fjölskyldum upp á fleiri fjölskyldupakka varðandi afþreyingu. Það er óþolandi að þurfa að tæma veskið ef fjölskyldan ætlar sér að gera eitthvað saman.
- Húsbíla- og hjólhýsaeigendur ættu ekki að greiða fullt gjald á tjaldsvæðum, þar sem að þeir parkera bara bílnum og nota ekkert af þjónustunni.
- Það vantar fleiri skjólbelti á tjaldstæðin.
- Sundlaugar úti á landi mættu hafa lengri opnunartíma.
- Ferðamenn ættu að greiða fyrir að skoða náttúruperlur Íslands, samanber víða erlendis. Rukka mætti inn á staði eins og Geysi og Djúpalónssand. Peningana ætti að nota til þess að bæta aðstöðuna á staðnum.
- Auka þarf eftirlit á tjaldstæðum varðandi almenna umgengni og næturró.
- Of mikil græðgi er í gangi í íslenskri ferðaþjónustu. Um leið og komið er út fyrir borgina þá tvöfaldast verðið.
- Það vantar meira framboð af íslenskum mat á borð við skyr, rúgbrauð og kjötsúpu. Óskað er eftir meira úrvali af hollum mat í vegasjoppurnar. Það vilja ekki allir sveitta hamborgara, pylsur og franskar.
- Ferðasumarið byrjar of seint. Á mörgum stöðum er ekki búið að opna í byrjun júní.
- Það vantar fleiri tjaldstæði fyrir aldurshópinn 18-30 ára sem víða er óvelkominn.
- Stéttarfélögin mættu greiða niður leigu á sumarhúsum í einkaeign.
- Aðgangur að salernum þarf að vera betri og þau verða að vera snyrtileg og hrein.
- Auka þarf pláss fyrir húsbíla á tjaldstæðum eða hafa sérstæði fyrir húsbíla.
- Aðgangur að ferðamannastöðum ætti að vera ódýrari fyrir Íslendinga, eins og t.d. í Bláa lónið. Það ætti að vera nóg að sýna íslenskt vegabréf.
- Ekki ætti að loka almennum tjaldstæðum vegna ættarmóta og slíks. Fólk á að geta gengið að tjaldstæðunum vísum.
- Leiksvæði fyrir börn á tjaldsvæðum mættu vera betri.
- Áhugaverðir staðir eru líka fyrir fatlaða, víða þarf að bæta aðgengi fyrir þá.
- Huga mætti betur að því að hafa kynningarefni á íslensku en ekki bara á ensku.
- Það vantar aukinn íslenskan sjarma og alúð í gistiumhverfi.
- Það vantar betri aðgang að rafmagni á tjaldstæðum og gjaldtakan mætti vera sanngjarnari. Ekki rukka fyrir heilan dag þegar rafmagnið er bara notað í hálfan.