Þingmaður vill skýringar á ráð- stöfun Haga og Samskipa: Arion banki svari hvaða reglum er fylgt

„Ég ætla ekki að fella neinn dóm en krafan er sú að það sé jafnræði og gagnsæi og ég held að menn séu sammála um að bankarnir hafi ekki verið að vinna eftir því.“ Þetta segir Guðlaugur Þór Þórðarsson, þingmaður Sjálfstæðisflokks, sem óskað hefur eftir því að fulltrúar Arionbanka geri grein fyrir ráðstöfun Haga og Samskipa.

Guðlaugur Þór hefur óskað eftir því að fulltrúar bankans verði kallaðir fyrir viðskiptanefnd Alþingis og skýri hvernig ráðstöfun þessara fyrirtækja samrýmist verklagsreglum bankans. Telur hann að þær fréttir sem birst hafa um meðferð þessara fyrirtækja veki upp spurningar hvort verklagsreglum hafi verið fylgt.

„Ég vil að þeir skýri þetta út fyrir okkur. Það sem þessir bankar eru að afgreiða hlýtur að eiga við alla aðra. 70 prósent fyrirtækja þurfa á einhvers konar aðstoða að halda. Ætli þeir sér að fara þessar leiðir sem fjallað hefur verið um í fjölmiðlum hlýtur það að hafa einhvers konar fordæmisgildi.“

Guðlaugur hefur hvatt til þess að nefndin standi að gerð skýrslu um þessi mál sem síðan verði kynnt Alþingi. Það sé ljóst að aldrei muni skapast friður um þau vinnubrögð sem stunduð eru í bönkunum núna.

„Þetta er ekki það upplegg sem var lagt af stað með í upphafi. Ríkið á 13 prósent í Arionbanka sem og heila stofnun sem kostar 100 milljónir á ári, Bankasýslu Ríkisins. Það var keyrt í gegnum þingið til að tryggja að þessir hlutir yrðu í fínu lagi. En svo virðist bara alls ekki vera.“