Skatturinn rannsakar smábókhald í 5 ár

Unnur telur enga von til þess að hún verði á lífi þegar dómur fellur um fjárglæfrastarfssemi, skattsvik og aðra plógsstarfssemi þeirra sem voru á toppnum í Hruninu. Það er einfaldlega kalt mat.  Unnur lenti nefnilega í skattinum, réttara sagt tók Skattstjórinn í Reykjavík bókhald Unnar til rannsóknar fyrir fimm árum. Til þess að gera langa sögu stutta vann Unnur þá sem verktaki í fjölmiðlageiranum. Það var tvennt sem Skattstjórinn í Reykjavík taldi vert að rannsaka almennt í geiranum, annars vegar hvort að þeir sem væru í raun og veru að vinna sem fastir starfsmenn og ættu að vera launþegar samkvæmt lögum væru að vinna sem verktakar hjá fyrirtækjum og hins vegar var verið að kanna hvort fjölmiðlamenn í verktöku væru að telja rétt fram. Já, jafnvel hjá starfsmönnum fjórða valdsins gætu fundist skattsvikarar.

Árið 2005 vildi Skattstjórinn í Reykjavík fá bókhald Unnar frá árinu 2003. Það var auðvelt að leggja það fram enda ekki mikið að vöxtum, rúmaðist í þunnri Egla möppu en með fylgdi hálf A4 síða þar sem Unnur gerði grein fyrir því helsta í því. Líður nú og bíður og ekkert heyrist frá Skattstjóranum í Reykjavík árið 2005. Ekki heldur árið 2006. Ekki heldur árið 2007, 2008 eða 2009.  Snemma árs 2010 átti Unnur afmæli og tveimur dögum síðar fær hún seðil frá Póstinum um að hún eigi þar pakka. Með tilhlökkun í brjósti keyrði hún á Appelsínunni sinni upp á pósthús, framvísar miðanum og stígur fram á tærnar af eftirvæntingi. Tilhlökkunin hins vegar snarminnkaði þegar hún fékk pakkann, innpakkaðan í brúnan pappír, merktan Skattstjóranum í Reykjavík.

Unnur reif umbúðirnar utan af pakkann og viti konur og menn – þarna var Egla mappann. Það var þó afmælisgjöf! En þó. Límd við möppuna var orðsending:

„Kallað var eftir meðfylgjandi gögnum í framhaldi af skoðun skattstjóra á málefnum yðar. Ríkisskattstjóri hefur lokið skoðun á meðfylgjandi gögnum.“

Unni finnst vitaskuld tær snilld að geta sagt jafn mikið án þess að segja nokkuð. Unnur hefur ekki hugmynd um hvort Skattstjórinn í Reykjavík muni árið 2015 rukka hana um endurgreiðslu eða hvort málinu sé lokið. En það sem Unnur vill benda á er þetta: Taki það embætti skatttstjóra fimm ára að rannsaka bókhald í lítill Egla möppu, er þá nokkur von til þess að það taki minna en 100 ár að rannsaka bókhald allra þeirra hrunfyrirtækja, hvers bókhald nær áreiðanlega samfellt allan þjóðveg hringveg 1?

Unnur ætlar samt að fylgjast vel með af himnum, þar verður stofnaður sérstakur áhugahópur um að ljúka málinu. Það eru áreiðanlega fleiri en hún sem vilja sjá öll kurl koma til grafar.