Ritstjórinn sér rautt

Leiðarahöfundur Morgunblaðsins skammar Arion banka fyrir þá ákvörðun að setja Haga á markað í opnu og gegnsæju ferli. Það sem fer fyrir brjóstið á honum er að Jóhannesi Jónssyni skuli vera boðið að kaupa 10 prósenta hlut í félaginu. Það þolir ritstjóri Morgunblaðsins ekki vegna þess að hann sér rautt í hvert sinn sem nöfn Jóhannesar og Jóns Ásgeirs Jóhannessonar eru nefnd. Stríð Davíðs Oddssonar gegn þeim feðgum hefur staðið í meira en áratug með miklum herkostnaði fyrir land og þjóð.

Ritstjórinn virðist í seinni tíð helst leita í smiðju Páls Vilhjálmssonar blaðamanns er hann leitar röksemda fyrir málflutningi sínum. Það er skondið. Páll er alkunnur vinstri maður. Ritstjórinn og Páll eiga það hins vegar sameiginlegt að vera blindaðir af heift í garð Bónusfeðga.

Finnur Sveinbjörnsson bankastjóri Arion banka kom í Kastljós fyrir helgi og skýrði út hvernig bankinn hefur staðið að málum varðandi Samskip og Haga. Hvað Samskip varðar þurfti bankinn að ná samkomulagi við annan banka, sem átti stóra kröfu á skipafélagið. Lausnin fólst í því að selja félagi, sem Ólafur Ólafsson á að stærstum hluta, ráðandi hlut í Samskipum. En ritstjóri Morgunblaðsins hefur engan áhuga á Samskipum vegna þess að Bónusfeðgar koma þar hvergi að.

Það verður að gera ráð fyrir því að Arion banki hafi fyrst og fremst verið að hugsa um að verja sína hagsmuni með afgreiðslu beggja mála. Það er mjög virðingarvert að bankinn skuli setja í gang opið og gegnsætt ferli um sölu á eignarhlut sínum í Högum. Líkast til mun skráning Haga styrkja mjög Kauphöllina og íslenskan hlutabréfamarkað. Þá verður ekki séð, að neitt óeðlilegt sé við það að Jóhannesi Jónssyni og öðrum stjórnendum sé gefinn kostur á því að kaupa 15 prósenta hlut í félaginu á sömu kjörum og aðrir fá að kaupa. Það er enginn af gefa þeim neitt og aðkoma þeirra að fyrirtækinu er talin styrkja það og þannig auka verðmæti eignar bankans.

Hagar eru nefnilega vel rekið fyrirtæki. Vandi félagsins er skuldavandi, sem stafar af því að íslenska krónan hrundi. Ábyrgð á hruni krónunnar liggur hjá Seðlabankanum, sem rak kolvitlausa peningamálastefnu, sem á endanum stútaði krónunni og setti fyrirtæki og almenning á Íslandi í gríðarlegan vanda.

Ritstjóri Morgunblaðsins er vitanlega ófær um að fjalla um Seðlabanka Íslands og hina vitlausu peningamálastefnu, sem þar var rekin allan þann tíma sem ritstjórinn var seðlabankastjóri. Morgunblaðið er heldur ekki fært um að fjalla um eina seðlabankann í heiminum, sem fór á hausinn vegna ævintýralega glæfralegra útlána gegn haldlausum tryggingum. Gjaldþrot Seðlabankans var upp á 350 milljarða. Þá upphæð er hægt að skrifa á reikning ritstjóra Morgunblaðsins, sem telur sig þess umkominn að gagnrýna aðra.

Það má með sanni segja að við Íslendingar höfum átt lélegasta seðlabankastjóra á byggðu bóli frá 2005 til febrúar 2009. Getuleysið virðist ekki vera bundið við peningamálastjórnun vegna þess að ekki verður betur séð en að Morgunblaðið sé á svipaðri leið og Seðlabankinn undir stjórn Davíðs Oddssonar ef marka má nýlega könnun á lestri dagblaða.

Arion Banki á hrós skilið fyrir að tryggja gegnsæi á sölu hlutar bankans í Högum. Betur væri ef Landsbankinn ástundaði viðlíka gegnsæi í stað þess að byggja laumulega upp stærsta eignarhaldsfélag landsins í Vestia. Hvers vegna skoðar ekki ritstjóri Morgunblaðsins hvað Landsbankinn og Vestia eru að gera með fyrirtæki, sem bankinn sölsar undir sig? Er það kannski óþægilega nálægt Icesave, sem vinir ritstjórans stóðu fyrir? Það eru meira að segja sömu mennirnir og stóðu fyrir Icesave, sem tróna nú yfir stærsta eignarhaldsfélagi landsins.

En ritstjóri Moggans hefur engan áhuga á því af því að þar er enginn Jóhannes eða Jón Ásgeir.